ಹೈದರಾಬಾದ್:ಟಾಲಿವುಡ್ ಪ್ರಿನ್ಸ್ ಮಹೇಶ್ ಬಾಬು ಸಹೋದರರಾದ ನಟ ಹಾಗೂ ನಿರ್ಮಾಪಕ ರಮೇಶ್ ಬಾಬು (56) ಅನಾರೋಗ್ಯ ಕಾರಣದಿಂದಾಗಿ ನಿನ್ನೆ ನಿಧನರಾಗಿದ್ದು, ಹೈದರಾಬಾದ್ನ ಜ್ಯೂಬಿಲಿಹಿಲ್ಸ್ನಲ್ಲಿ ಇಂದು ಮಧ್ಯಾಹ್ನ ಅಂತ್ಯಕ್ರಿಯೆ ಜರುಗಲಿದೆ.
ತೆಲುಗು ಚಿತ್ರರಂಗದ ಹಿರಿಯ ನಟ ಕೃಷ್ಣ ಅವರ ಹಿರಿಯ ಮಗ ರಮೇಶ್ ಬಾಬು ಯಕೃತ್ತು ಸಂಬಂಧಿತ ಕಾಯಿಲೆಯಿಂದ ಬಳಲುತ್ತಿದ್ದರು. ಶನಿವಾರ ಸಂಜೆ ಅವರು ತೀವ್ರ ಅಸ್ವಸ್ಥರಾದ ಕಾರಣದಿಂದ ಗಚ್ಚಿಬೌಲಿ ಎಐಜಿ ಆಸ್ಪತ್ರೆಗೆ ದಾಖಲಿಸಲಾಗಿತ್ತು.
ರಮೇಶ್ ಬಾಬು ಅವರ ಪಾರ್ಥಿವ ಶರೀರವನ್ನು ಅಂತಿಮ ದರ್ಶನಕ್ಕಾಗಿ ಪದ್ಮಾಲಯ ಸ್ಟುಡಿಯೋಗೆ ರವಾನಿಸಲಾಗುತ್ತಿದ್ದು, ಅಂತಿಮ ದರ್ಶನ ಮತ್ತು ಅಂತ್ಯಕ್ರಿಯೆಯ ವೇಳೆ ಅಭಿಮಾನಿಗಳು ಕೋವಿಡ್ ಮಾರ್ಗಸೂಚಿ ಪಾಲನೆ ಮಾಡುವಂತೆ ಮನವಿ ಮಾಡಲಾಗಿದೆ.
ರಮೇಶ್ ಬಾಬು ಅವರು ಅಲ್ಲೂರಿ ಸೀತಾರಾಮರಾಜು (1974) ಚಿತ್ರದ ಮೂಲಕ ತೆಲುಗು ಚಿತ್ರರಂಗಕ್ಕೆ ಪದಾರ್ಪಣೆ ಮಾಡಿದ್ದರು. ತಮ್ಮ ತಂದೆ ಹಾಗು ಮಹೇಶ್ ಬಾಬು ಅವರೊಂದಿಗೆ ರಮೇಶ್ ಬಾಬು ಹಲವಾರು ಚಿತ್ರಗಳಲ್ಲಿ ನಟಿಸಿದ್ದಾರೆ. ಸುಮಾರು 15 ಚಿತ್ರಗಳಲ್ಲಿ ಪ್ರಮುಖ ಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದು 1997ರಿಂದ ನಟನೆಯಿಂದ ದೂರವೇ ಉಳಿದರು. 2004ರಲ್ಲಿ ನಿರ್ಮಾಪಕರಾಗಿ ಅರ್ಜುನ್ ಮತ್ತು ಅತಿಥಿ ಚಿತ್ರಗಳನ್ನು ನಿರ್ಮಿಸಿದ್ದಾರೆ.
ಇದನ್ನೂ ಓದಿ:Yash Birthday : ಲೋಡೆಡ್ ಗನ್ ಹಿಡಿದು ನಿಂತ ಸ್ಪೆಷಲ್ ಕೇಕ್ ಕಟ್ ಮಾಡಿದ ರಾಕಿ ಭಾಯ್