ನಿರ್ದೇಶಕ ಪ್ರೇಮ್ ಪುತ್ರನಿಗೆ ಕಾಲಿವುಡ್ ಸ್ಟಂಟ್ ಮಾಸ್ಟರ್ ಆ್ಯಕ್ಷನ್ ಪಾಠ

ರಕ್ಷಿತಾ ಸಹೋದರ ರಾಣಾ ಅಭಿನಯದ ಮೊದಲ ಸಿನಿಮಾ 'ಏಕ್​ ಲವ್ ಯಾ' ಶೂಟಿಂಗ್ ಭರದಿಂದ ಸಾಗುತ್ತಿದೆ. ಶೂಟಿಂಗ್ ಸ್ಪಾಟ್​ನಲ್ಲಿ ಪ್ರೇಮ್​​​-ರಕ್ಷಿತಾ ಪುತ್ರ ಸೂರ್ಯ ಕಾಲಿವುಡ್​ ಸ್ಟಂಟ್ ಮಾಸ್ಟರ್​​ನಿಂದ ಆ್ಯಕ್ಷನ್ ಕಲಿಯುವುದರಲ್ಲಿ ಬ್ಯುಸಿಯಾಗಿದ್ದಾರೆ.

ನಿರ್ದೇಶಕ ಪ್ರೇಮ್ ತಮ್ಮ ಭಾವಮೈದುನ ರಾಣಾಗಾಗಿ 'ಏಕ್ ಲವ್ ಯಾ' ಸಿನಿಮಾ ಮಾಡುತ್ತಿರುವುದು ತಿಳಿದ ವಿಚಾರ. ಕಳೆದ ತಿಂಗಳು ರಕ್ಷಿತಾ ಬರ್ತಡೇಯಂದು ಚಿತ್ರದ ಬಗ್ಗೆ ಅಧಿಕೃತವಾಗಿ ಅನೌನ್ಸ್ ಮಾಡಿ ಫಸ್ಟ್​ ಲುಕ್​ ಕೂಡಾ ಬಿಡುಗಡೆ ಮಾಡಲಾಗಿತ್ತು.

ಕೆಲ‌ವು ದಿನಗಳ ಹಿಂದೆ ಮಹದೇಶ್ವರ ಬೆಟ್ಟದಲ್ಲಿ ಸಿಂಪಲ್ ಆಗಿ ಮುಹೂರ್ತ ಮುಗಿಸಿದ ನಿರ್ದೇಶಕ ಪ್ರೇಮ್ ಈಗ ಶೂಟಿಂಗ್​​​​​​ನಲ್ಲಿ ಬ್ಯುಸಿಯಾಗಿದ್ದಾರೆ. ಬೆಂಗಳೂರಲ್ಲಿ ಚಿತ್ರದ ಶೂಟಿಂಗ್ ನಡೆಯುತ್ತಿದೆ. ಶೂಟಿಂಗ್ ಸ್ಪಾಟ್​​​​ಗೆ ರಕ್ಷಿತಾ ಹಾಗೂ ಪುತ್ರ ಸೂರ್ಯ ಭೇಟಿ ನೀಡಿದ್ದಾರೆ. ಒಂದು ಕಡೆ ಅಪ್ಪ ಆ್ಯಕ್ಷನ್ ಕಟ್​​ ಹೇಳುವಲ್ಲಿ ಬ್ಯುಸಿಯಾಗಿದ್ದರೆ,ಮತ್ತೊಂದೆಡೆ ಮಗ ಆ್ಯಕ್ಷನ್ ಪಾಠ ಕಲಿಯುತ್ತಿದ್ದಾರೆ. ದಕ್ಷಿಣ ಭಾರತದ ಖ್ಯಾತ ಸ್ಟಂಟ್ ಮಾಸ್ಟರ್​ ಸೆಲ್ವ ಪ್ರೇಮ್ ಮಗನಿಗೆ ಆ್ಯಕ್ಷನ್ ಬಗ್ಗೆ ಪಾಠ ಮಾಡಿದ್ದಾರೆ.

'ಏಕ್​ ಲವ್ ಯಾ' ಮುಹೂರ್ತ

ಸೂಪರ್ ಸ್ಟಾರ್ ರಜನೀಕಾಂತ್, ಪ್ರಭಾಸ್, ತಮಿಳು ನಟ ವಿಜಯ್ ಸೇರಿ ಬಹುತೇಕ ಎಲ್ಲಾ ನಟರ ಸಿನಿಮಾಗಳಿಗೆ ಸಾಹಸ ನಿರ್ದೇಶನ ಮಾಡಿರುವ ಸೆಲ್ವ ಬಹಳ ವರ್ಷಗಳ ನಂತರ ಕನ್ನಡಕ್ಕೆ ಬಂದಿದ್ದಾರೆ. ಈ ಹಿಂದೆ ಪುನೀತ್ ಅಭಿನಯದ 'ಚಕ್ರವ್ಯೂಹ' ಸಿನಿಮಾಗೆ ಸೆಲ್ವ ಸ್ಟಂಟ್ ಕಂಪೋಸ್ ಮಾಡಿದ್ದರು. 'ಏಕ್​​ ಲವ್​ ಯಾ' ಚಿತ್ರದ ಶೂಟಿಂಗ್ ಸಮಯದಲ್ಲಿ ಪ್ರೇಮ್ ಹಾಗು ರಕ್ಷಿತಾ ಪುತ್ರ ಸೂರ್ಯನಿಗೆ ಬಾಟಲನ್ನು ಕಿಕ್ ಮಾಡುವ ಸ್ಟಂಟ್ ಹೇಳಿಕೊಟ್ಟಿದ್ದಾರೆ ಸೆಲ್ವ. ಸೂರ್ಯ ಕೂಡಾ ಆಸಕ್ತಿಯಿಂದ ಬಾಟಲ್ ಕಿಕ್ ಮಾಡಲು ಪ್ರಯತ್ನಿಸಿದ್ದಾನೆ. ಪ್ರೇಮ್​ ಪುತ್ರನ ಈ ಆಸಕ್ತಿ ನೋಡಿದರೆ ಆತ ಕೂಡಾ ಆದಷ್ಟು ಬೇಗ ಆ್ಯಕ್ಟಿಂಗ್​​​ಗೆ ಬರೋದು ಪಕ್ಕಾ ಎನಿಸುತ್ತಿದೆ.