ಕೋಟ್ಯಂತರ ಅಭಿಮಾನಿಗಳು ಎದುರು ನೋಡುತ್ತಿರುವ ಸಿನಿಮಾ ಕೆಜಿಎಫ್ ಭಾಗ 2. ಎರಡು ವರ್ಷಗಳ ಹಿಂದೆ ಬಿಡುಗಡೆಯಾದ ಕೆಜಿಎಫ್ 1 ಚಿತ್ರವನ್ನು ನೋಡಿದವರು ಸೀಕ್ವೆಲ್ ನೋಡಲು ಕಾತರದಿಂದ ಕಾಯುತ್ತಿದ್ದಾರೆ. ಸದ್ಯಕ್ಕೆ ಕೆಜಿಎಫ್ ಸೀಕ್ವೆಲ್ ಕ್ಲೈಮಾಕ್ಸ್ ಚಿತ್ರೀಕರಣ ನಡೆಯುತ್ತಿದ್ದು ಶೀಘ್ರವೇ ಚಿತ್ರವನ್ನು ಅಭಿಮಾನಿಗಳ ಮುಂದೆ ತರುವುದಾಗಿ ನಿರ್ದೇಶಕ ಪ್ರಶಾಂತ್ ನೀಲ್ ಹೇಳಿದ್ದಾರೆ.
ಅನ್ಬರಿವ್ ಸಹಯೋಗದೊಂದಿಗೆ ಕೆಜಿಎಫ್ ಸೀಕ್ವೆಲ್ ರಾಕಿ-ಅಧೀರ ಕ್ಲೈಮಾಕ್ಸ್ ಫೈಟ್ ಚಿತ್ರೀಕರಣ
ಸಾಹಸ ನಿರ್ದೇಶಕ ಸಹೋದರರಾದ ಅನ್ಬು ಹಾಗೂ ಅರಿವು ಸಹಯೋಗದಲ್ಲಿ ಕೆಜಿಎಫ್ ಸೀಕ್ವೆಲ್ ಕ್ಲೈಮಾಕ್ಸ್ ಫೈಟ್ ಚಿತ್ರೀಕರಣ ನಡೆಯುತ್ತಿರುವುದಾಗಿ ಪ್ರಶಾಂತ್ ನೀಲ್ ತಮ್ಮ ಟ್ವಿಟ್ಟರ್ನಲ್ಲಿ ಟ್ವೀಟ್ ಮಾಡಿದ್ದಾರೆ. ಶೀಘ್ರದಲ್ಲೇ ಸಿನಿಮಾವನ್ನು ಅಭಿಮಾನಿಗಳ ಮುಂದೆ ತರುವುದಾಗಿ ಕೂಡಾ ಪ್ರಶಾಂತ್ ನೀಲ್ ಹೇಳಿದ್ದಾರೆ.
ಕೆಜಿಎಫ್ ಸೀಕ್ವೆಲ್ ಫೈಟ್ ಚಿತ್ರೀಕರಣ
ತಮ್ಮ ಸೋಷಿಯಲ್ ಮೀಡಿಯಾದಲ್ಲಿ ಖ್ಯಾತ ಸಾಹಸ ನಿರ್ದೇಶಕ ಸಹೋದರರಾದ ಅನ್ಬು-ಅರಿವು (ಅನ್ಬರಿವ್) ಅವರೊಂದಿಗೆ ಇರುವ ಫೋಟೋವೊಂದನ್ನು ಹಂಚಿಕೊಂಡಿರುವ ಪ್ರಶಾಂತ್ ನೀಲ್, ಅನ್ಬರಿವ್ ಫೈಟ್ ಮಾಸ್ಟರ್ಸ್ ಕೊರಿಯೋಗ್ರಫಿಯೊಂದಿಗೆ ರಾಕಿ ಹಾಗೂ ಅಧೀರ ನಡುವೆ ಕ್ಲೈಮಾಕ್ಸ್ ಫೈಟ್ ಚಿತ್ರೀಕರಣ ನಡೆಯುತ್ತಿದೆ ಎಂದು ಟ್ವೀಟ್ ಮಾಡಿದ್ದಾರೆ. ಚಿತ್ರದಲ್ಲಿ ಯಶ್ ಎದುರು ಸಂಜಯ್ ದತ್ ಅಧೀರನ ಪಾತ್ರದಲ್ಲಿ ನಟಿಸಿದ್ದಾರೆ. ಸಂಜಯ್ ದತ್ ಶ್ವಾಸಕೋಶದ ಕ್ಯಾನ್ಸರ್ಗಾಗಿ ಚಿಕಿತ್ಸೆ ಪಡೆಯಲು ವಿದೇಶಕ್ಕೆ ತೆರಳಿದ್ದರಿಂದ ಕೆಜಿಎಫ್ ಸೀಕ್ವೆಲ್ ಸಂಜಯ್ ದತ್ ಭಾಗದ ಚಿತ್ರೀಕರಣ ತಡವಾಗಿದೆ. ಈ ಕ್ಲೈಮಾಕ್ಸ್ ಚಿತ್ರೀಕರಣ ಹೈದರಾಬಾದ್ನಲ್ಲಿ ಸುಮಾರು 10 ದಿನಗಳ ಕಾಲ ನಡೆಯಲಿದೆ ಎಂದು ಚಿತ್ರತಂಡ ಹೇಳಿದೆ.
ಶರವೇಗದಲ್ಲಿ ಕೆಜಿಎಫ್-2 ಚಿತ್ರೀಕರಣ ಜರುಗುತ್ತಿದ್ದು ಶೀಘ್ರದಲ್ಲೇ ಸಿನಿಮಾ ಬಿಡುಗಡೆ ಮಾಡುವುದಾಗಿ ಚಿತ್ರತಂಡ ತಿಳಿಸಿದೆ. ಸೀನಿಯರ್ ನಟಿ ರವೀನಾ ಟಂಡನ್, ರಾವ್ ರಮೇಶ್ ಹಾಗೂ ಇನ್ನಿತರ ಸ್ಟಾರ್ ನಟ-ನಟಿಯರು ನಟಿಸುತ್ತಿರುವ ಸಿನಿಮಾವನ್ನು ಹೊಂಬಾಳೆ ಫಿಲ್ಮ್ಸ್ ಬ್ಯಾನರ್ ಅಡಿ ವಿಜಯ್ ಕಿರಗಂದೂರ್ ನಿರ್ಮಿಸುತ್ತಿದ್ದಾರೆ. ಈ ಸಿನಿಮಾ ನಂತರ ಪ್ರಶಾಂತ್ ನೀಲ್ ಮತ್ತೆ ಹೊಂಬಾಳೆ ಫಿಲ್ಮ್ ಬ್ಯಾನರ್ ಅಡಿಯಲ್ಲಿ ಪ್ರಭಾಸ್ ನಿರ್ದೇಶನದ 'ಸಲಾರ್' ಚಿತ್ರೀಕರಣ ಆರಂಭಿಸಲಿದ್ದಾರೆ.
Last Updated : Dec 8, 2020, 8:47 AM IST