ಬಾಕ್ಸ್‌ ಆಫೀಸ್​ಲ್ಲಿ ಚಿಂದಿ ಉಡಾಯಿಸಿದ ಕುರುಕ್ಷೇತ್ರ.. ನಿಜವಾಯ್ತು ಜಗ್ಗೇಶ ನುಡಿದ ಭವಿಷ್ಯ..

ದರ್ಶನ್ ನಟಿಸಿರುವ ಯಜಮಾನ ಚಿತ್ರವೂ ನೂರು ದಿನಗಳ ಪ್ರದರ್ಶನ ಕಂಡು ದಾಖಲೆ ಬರೆದಿತ್ತು. ಇದೀಗ ಕುರುಕ್ಷೇತ್ರ ಸಿನಿಮಾ ಕೂಡ ಅದೇ ಹಾದಿಯಲ್ಲಿ ಸಾಗುತ್ತಿದೆ.

ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಬಾಕ್ಸಾಫೀಸ್ ಸುಲ್ತಾನ್ ಅಂತಾ ಮತ್ತೆ ಪ್ರೂವ್ ಮಾಡಿದ್ದಾರೆ. ಗಲ್ಲಾ ಪೆಟ್ಟಿಗೆಯಲ್ಲಿ ಧೂಳೆಬ್ಬಿಸಿ ದಾಖಲೆ ಬರೆದಿದ್ದಾನೆ ಸ್ಯಾಂಡಲ್​​ವುಡ್​​ನ ದುರ್ಯೋಧನ.

ಸ್ಯಾಂಡಲ್​​ವುಡ್​​ ಸಾರಥಿ ಬ್ಯಾಕ್ ಟು ಬ್ಯಾಕ್​ ಗೆಲುವು ಪಡೆಯುತ್ತಿದ್ದಾರೆ. ದಾಸ ಸುಯೋಧನನಾಗಿ ನಟಿಸಿರುವ ಕುರುಕ್ಷೇತ್ರ ಸಿನಿಮಾ ಇದೀಗ ಬಾಕ್ಸಾಫೀಸ್​​ನಲ್ಲಿ ಕೊಳ್ಳೆ ಹೊಡೆಯುತ್ತಿದೆ. ಎರಡನೇ ವಾರದಲ್ಲಿ ಅಮೋಘ ಪ್ರದರ್ಶನ ಕಾಣುತ್ತಿರುವ ಕೌರವ-ಪಾಂಡವರ ಕದನದ ಹೂರಣ ಕುರುಕ್ಷೇತ್ರ. ಬರೋಬ್ಬರಿ ₹100 ಕೋಟಿ ಬಾಚಿಕೊಂಡಿದೆ. ಈ ಮೂಲಕ ಕೆಜಿಎಫ್ ನಂತರ ನೂರು ಕೋಟಿ ಕ್ಲಬ್​ನ ಸಿನಿಮಾ ಸಾಲಿಗೆ ಕುರುಕ್ಷೇತ್ರ ಸೇರಿದೆ.

ಬಹುಕೋಟಿ ತಾರಾಗಣದ ಪ್ಯಾನ್ ಇಂಡಿಯಾ ಸಿನಿಮಾ ಕುರುಕ್ಷೇತ್ರ ಭರ್ಜರಿ ಕಲೆಕ್ಷನ್ ಮಾಡುತ್ತಿದೆ. ರಾಜ್ಯ,ಹೊರರಾಜ್ಯ ಹಾಗೂ ವಿದೇಶದಲ್ಲಿಯೂ ದುರ್ಯೋಧನನ ಅಬ್ಬರ ಜೋರಾಗಿದೆ. ಬಿಡುಗಡೆಯಾದ ಮೊದಲ ದಿನವೇ ಗಲ್ಲಾ ಪೆಟ್ಟಿಗೆ ಶೇಖ್ ಮಾಡಿದ್ದ ಈ ಸಿನಿಮಾ, ಇದೀಗ 15 ದಿನಗಳಲ್ಲಿ ನೂರು ಕೋಟಿ ಜೇಬಿಗಿಳಿಸಿಕೊಂಡು ಬೀಗುತ್ತಿದೆ.

ನಿಜವಾಯ್ತು ಜಗ್ಗೇಶ ಮಾತು :

ಕೆಲ ದಿನಗಳ ಹಿಂದೆಯಷ್ಟೇ ನವರಸ ನಾಯಕ ಜಗ್ಗೇಶ್,ದರ್ಶನ್ ಕುರಿತು ಒಂದು ಮಾತು ಹೇಳಿದ್ದರು. ನಮ್ಮ ದರ್ಶನ್ ಯಾವ ಬಾಲಿವುಡ್ ಹೀರೋಗಿಂತಲೂ ಕಡಿಮೆ ಇಲ್ಲ. ಇವರನ್ನು ಹಾಕಿಕೊಂಡು ಒಳ್ಳೆಯ ಸಿನಿಮಾ ಮಾಡಿದ್ರೆ,ಅದು 100 ಕೋಟಿ ಗಳಿಸುವುದರಲ್ಲಿ ಯಾವುದೇ ಅನುಮಾನ ಇಲ್ಲ. ನಮ್ಮ ಡಿ ಬಾಸ್ ಸ್ಯಾಂಡಲ್​​ವುಡ್​ನ ಸಲ್ಮಾನ್ ಖಾನ್ ಎಂದು ಭವಿಷ್ಯ ನುಡಿದಿದ್ದರು. ಇದೀಗ ಜಗ್ಗೇಶ್ ಅವರ ಈ ಮಾತು ಸತ್ಯವಾದಂತಿದೆ. ಕುರುಕ್ಷೇತ್ರ ₹100 ಕೋಟಿ ಗಳಿಸಿರುವ ಸಂದರ್ಭದಲ್ಲಿ ಜಗ್ಗೇಶ್ ಅವರ ಈ ಮಾತಿನ ವಿಡಿಯೋ ಸಖತ್ ವೈರಲ್ ಆಗುತ್ತಿದೆ..