ನಿರ್ದೇಶಕ ದಯಾಳ್ ಪದ್ಮನಾಭನ್ ಡಬಲ್ ಖುಷಿಯಲ್ಲಿದ್ದಾರೆ. ಅವರ 18ನೇ ಸಿನಿಮಾ ಒಂಭತ್ತನೇ ದಿಕ್ಕು ಶೀಘ್ರದಲ್ಲೇ ಬಿಡುಗಡೆಗೆ ತಯಾರಾಗಿದೆ. ಜೊತೆಗೆ ಮೊದಲ ಬಾರಿಗೆ ತೆಲುಗು ಚಿತ್ರವನ್ನು ನಿರ್ದೇಶಿಸುವ ಮೂಲಕ ಟಾಲಿವುಡ್ಗೂ ಕಾಲಿಟ್ಟಿದ್ದಾರೆ.
ಬಿಗ್ಬಾಸ್ಗೆ ಹೋಗಿ ಬಂದಾಗಿನಿಂದ ಬಹಳ ಬ್ಯುಸಿ ಆಗಿದ್ದಾರೆ ದಯಾಳ್ ಪದ್ಮನಾಭನ್. 17 ವರ್ಷಗಳ ಸಿನಿಪಯಣದಲ್ಲಿ ಸುಮಾರು 18 ಚಿತ್ರಗಳನ್ನು ನಿರ್ದೇಶಿಸಿ 8 ಸಿನಿಮಾಗಳನ್ನು ನಿರ್ಮಿಸಿ ನಿರ್ಮಾಪಕರಾಗಿ ಕೂಡಾ ಗುರುತಿಸಿಕೊಂಡಿದ್ದಾರೆ. ದಯಾಳ್ ಪದ್ಮನಾಭನ್ಗೆ ರಾಜ್ಯ ಪ್ರಶಸ್ತಿ ತಂದುಕೊಟ್ಟ 'ಆ ಕರಾಳ ರಾತ್ರಿ' ತೆಲುಗಿಗೆ ರೀಮೇಕ್ ಆಗುತ್ತಿದೆ. ಅಲ್ಲು ಅರವಿಂದ್ ಅವರು ತಮ್ಮ ಗೀತಾ ಆರ್ಟ್ಸ್ ಬ್ಯಾನರ್ ಮೂಲಕ ದಯಾಳ್ ಅವರನ್ನು ತೆಲುಗು ರೀಮೇಕ್ ಮಾಡಲು ಆಹ್ವಾನಿಸಿದ್ದಾರೆ.
ಈ ತೆಲುಗು ಚಿತ್ರದಲ್ಲಿ ಪ್ರಮುಖ ಸಹ ನಿರ್ದೇಶಕ ಆಗಿ ನವೀನ್ ಕೃಷ್ಣ ಕೆಲಸ ಮಾಡುತ್ತಿದ್ದಾರೆ. ಕನ್ನಡ ಸಿನಿಮಾದಲ್ಲಿ ಭವಿಷ್ಯ ಹೇಳುವ ಪಾತ್ರವನ್ನು ನವೀನ್ ಕೃಷ್ಣ ತೆಲುಗು ಚಿತ್ರದಲ್ಲೂ ಮಾಡುತ್ತಿದ್ದಾರೆ. ಇವರೊಂದಿಗೆ ಛಾಯಾಗ್ರಾಹಕ ಆಗಿ ರಾಕೇಶ್, ಉತ್ತಮ ಪೋಷಕ ನಟಿ ಪ್ರಶಸ್ತಿ ಪಡೆದ ವೀಣಾ ಸುಂದರ್, ಸಂಗೀತ ನಿರ್ದೇಶಕ ಮಣಿಕಾಂತ್ ಕದ್ರಿ, ಸಂಕಲನಕಾರರನ್ನಾಗಿ ಪ್ರೀತಿ-ಬಾಬು ಅವರನ್ನು ದಯಾಳ್ ಪದ್ಮನಾಭನ್ ಆಯ್ಕೆ ಮಾಡಿಕೊಂಡಿದ್ದಾರೆ.
ಅರ್ಹ ಮೀಡಿಯಾ ಹಾಗೂ ಟ್ರೆಂಡ್ ಲೌಡ್ ಜೊತೆ ಸೇರಿ ಅಲ್ಲು ಅರವಿಂದ್ ನಿರ್ಮಿಸುತ್ತಿರುವ ಈ ಚಿತ್ರ ಸೆಪ್ಟೆಂಬರ್ 20 ರಿಂದ ಆರಂಭವಾಗಲಿದೆ. ತೆಲುಗು ರೀಮೇಕ್ ನಂತರ ತಮಿಳು ಭಾಷೆಗೆ ಕೂಡಾ ಈ ಚಿತ್ರವನ್ನು ನಿರ್ದೇಶಿಸುತ್ತಾರಂತೆ ದಯಾಳ್ ಪದ್ಮನಾಭನ್. ರೆಡ್ ಕಾರ್ಪೆಟ್ ರಮೇಶ್ ಪಿಳ್ಳೈ ತಮಿಳು ಭಾಷೆಯಲ್ಲಿ ಈ ಚಿತ್ರವನ್ನು ನಿರ್ಮಿಸಲಿದ್ದಾರೆ ಎನ್ನಲಾಗಿದೆ.
