ಕೊರೊನಾ ನಿಧಿ ಸಂಗ್ರಹಕ್ಕೆ ತನ್ನ ನಗ್ನ ಭಾವಚಿತ್ರ ಹರಾಜಿಗಿಡಲು ಮುಂದಾದ ನಟಿ!

ವಿಶ್ವವ್ಯಾಪಿ ಹರಡಿರುವ ಕೊರೊನಾ ಮಹಾಮಾರಿ ಜಗತ್ತನ್ನೇ ತಲ್ಲಣಗೊಳಿಸಿದೆ. ಕೊರೊನಾ ವಿರುದ್ಧದ ಹೋರಾಟದಲ್ಲಿ ಕೋಟ್ಯಂತರ ಜನ ಭಾಗಿಯಾಗಿದ್ದಾರೆ. ಇದೀಗ ಹಾಲಲಿವುಡ್​ ನಟಿ ಜೆನ್ನಿಫರ್ ಅನಿಸ್ಟನ್ ತನ್ನ ನಗ್ನ ಭಾವಚಿತ್ರವನ್ನು ಹರಾಜು ಹಾಕುವ ಮೂಲಕ ಕೊರೊನಾ ನಿಧಿ ಸಂಗ್ರಹಕ್ಕೆ ಮುಂದಾಗಿದ್ದಾರೆ.

ವಾಷಿಂಗ್ಟನ್(ಅಮೆರಿಕಾ):ಕೊರೊನಾ ವೈರಸ್​​ಗಾಗಿ ಪರಿಹಾರ ನಿಧಿಯನ್ನು ಸಂಗ್ರಹಿಸಲು ನಟಿ ಜೆನ್ನಿಫರ್ ಅನಿಸ್ಟನ್ ತನ್ನ 25 ವರ್ಷದ ಹಳೆಯ ನಗ್ನ ಭಾವಚಿತ್ರವನ್ನು ಹರಾಜು ಹಾಕುವುದಾಗಿ ತಿಳಿಸಿದ್ದಾರೆ. 1995 ರ ನವೆಂಬರ್‌ನಲ್ಲಿ ಮಾರ್ಕ್ ಸೆಲಿಗರ್ ತೆಗೆದಿದ್ದ ಭಾವಚಿತ್ರವಿದು ಎಂದಿದ್ದಾರೆ.

ಈ ಫೊಟೋ ಹರಾಜಿನ ಬಗ್ಗೆ ನಟಿ ಜೆನ್ನಿಫರ್​​, ಇನ್ಸ್ಟಾಗ್ರಾಮ್​ನಲ್ಲಿ ಚಿತ್ರ ಸಂಸ್ಕರಣೆ ಮಾಡುತ್ತಿರುವ ವಿಡಿಯೋವೊಂದನ್ನ ಪೋಸ್ಟ್ ಮಾಡಿದ್ದಾರೆ. ಈ ವಿಡಿಯೋದಲ್ಲಿ, ನನ್ನ ಆತ್ಮೀಯ ಗೆಳೆಯ ಮಾರ್ಕ್‌ಸೆಲಿಗರ್, ರಾಡ್‌ವೊಕಸಿ ಮತ್ತು ಕ್ರಿಸ್ಟಿಸಿಂಕ್‌ ಸೇರಿದಂತೆ ನನ್ನ ಭಾವಚಿತ್ರವನ್ನೂ ಒಟ್ಟುಗೂಡಿಸಿ 25 ಭಾವಚಿತ್ರಗಳನ್ನು ಹರಾಜು ಹಾಕಲಿದ್ದೇವೆ. ಇವೆಲ್ಲವೂ ಕೊರೊನಾ ವೈರಸ್​​ ನಿಧಿ ಸಂಗ್ರಹಕ್ಕಾಗಿ ಎಂದು ಶೀರ್ಷಿಕೆಯೊಂದನ್ನ ಬರೆದಿದ್ದಾರೆ.

ಈ ಭಾವಚಿತ್ರದ ಶೇ.100ರಷ್ಟು ಮಾರಾಟದ ಆದಾಯವು ಎನ್‌ಎಎಫ್ ಚಿಕಿತ್ಸಾಲಯ(NAFClinics) ಗೆ ಹೋಗುತ್ತದೆ. ಎನ್​ಎಎಫ್​​ ಕ್ಲಿನಿಕ್​​ಗಳು ಬಡ ರೋಗಿಗಳಿಗೆ ಹಾಗೂ ವೈದ್ಯಕೀಯ ವೆಚ್ಚ ಭರಿಸಲು ಸಾಧ್ಯವಾಗದವರಿಗೆ ರಾಷ್ಟ್ರವ್ಯಾಪಿ ಉಚಿತ ಕೊರೊನಾ ವೈರಸ್ ಪರೀಕ್ಷೆ ಮತ್ತು ಆರೈಕೆಯನ್ನು ಮಾಡುತ್ತಿದೆ ಎಂದು ಜೆನ್ನಿಫರ್​​ ಹೇಳಿದ್ದಾರೆ.

ಫೋಟೋ ಹರಾಜಿನ ಬಗ್ಗೆ ಇನ್ನಷ್ಟು ತಿಳಿದುಕೊಳ್ಳಲು ನನ್ನ ಬಯೋದಲ್ಲಿನ ಲಿಂಕ್​​ನ್ನು ಫಾಲೋ ಮಾಡಿ. ಇದರ ಭಾಗವಾಗಲು ನನಗೆ ಅವಕಾಶ ನೀಡಿದ ಮಾರ್ಕ್‌ಗೆ ಮತ್ತೊಮ್ಮೆ ಧನ್ಯವಾದಗಳು ಎಂದು ಜೆನ್ನಿಫರ್​ ಇನ್ಸ್ಟಾಗ್ರಾಮ್​​ನಲ್ಲಿ ಬರೆದುಕೊಂಡಿದ್ದಾರೆ.