'ದಿ ಟರ್ಮಿನೇಟರ್​​​'ಖ್ಯಾತಿಯ ಅರ್ನಾಲ್ಡ್ ಶ್ವಾಜ್​​​ನೆಗರ್ ಮೇಲೆ ದಾಳಿ,ವ್ಯಾಪಕ ಖಂಡನೆ

ವಿಶ್ವವಿಖ್ಯಾತ ನಟ ಅರ್ನಾಲ್ಡ್ ಶ್ವಾಜ್​​​ನೆಗರ್ ಮೇಲೆ ವ್ಯಕ್ತಿಯೊಬ್ಬ ದಾಳಿ ಮಾಡಿದ್ದು, ಪ್ರಕರಣದ ಸಂಬಂಧ ಎಲ್ಲೆಡೆ ಖಂಡನೆ ವ್ಯಕ್ತವಾಗಿದೆ. ತಮ್ಮ ವೃತ್ತಿ ಜೀವನದಲ್ಲಿ ಯಾವುದೇ ವಿವಾದಗಳನ್ನು ಮೈಮೇಲೆ ಎಳೆದುಕೊಳ್ಳದ 71 ವರ್ಷದ ಅರ್ನಾಲ್ಡ್​​​ ಬಹುಮುಖ ಪ್ರತಿಭೆ.

'ದಿ ಟರ್ಮಿನೇಟರ್​​​' ಸಿನಿಮಾ ನೋಡಿರುವವರಿಗೆ ಅರ್ನಾಲ್ಡ್ ಶ್ವಾಜ್​​​ನೆಗರ್​ ಪರಿಚಯ ಇರುತ್ತೆ. ಆಸ್ಟ್ರೇಲಿಯಾದ ಪ್ರಜೆಯಾದ ಇವರು ಅದ್ಭುತ ನಟ ಮಾತ್ರವಲ್ಲ, ಉದ್ಯಮಿ, ರಾಜಕಾರಣಿ ಹಾಗೂ ದೇಹದಾರ್ಢ್ಯ ಪಟು ಕೂಡಾ.

ಹಾಲಿವುಡ್​ ಸಾಹಸಮಯ ಚಿತ್ರಗಳ ಮೂಲಕ ಅರ್ನಾಲ್ಡ್ ಶ್ವಾಜ್​​​ನೆಗರ್​ ಜಗತ್ತಿನಾದ್ಯಂತ ಹೆಸರು ಮಾಡಿದವರು. ಅರ್ನಾಲ್ಡ್ ಇತ್ತೀಚೆಗೆ ಜೊಹಾನ್ಸ್​ಬರ್ಗ್​ನಲ್ಲಿ ಕ್ರೀಡಾಕೂಟದಲ್ಲಿ ಪಾಲ್ಗೊಂಡಿದ್ದ ವೇಳೆ ಅಭಿಮಾನಿಗಳೊಂದಿಗೆ ಮಾತನಾಡುವಾಗ ವ್ಯಕ್ತಿಯೊಬ್ಬ ಹಿಂದಿನಿಂದ ಬಂದು ಅರ್ನಾಲ್ಡ್​​ಗೆ ಕಾಲಿನಿಂದ ಒದ್ದಿದ್ದಾನೆ. ಹೊಡೆತದ ರಭಸಕ್ಕೆ ಅವರು ಕೆಳಗೆ ಬಿದ್ದಿದ್ದಾರೆ. ತಕ್ಷಣವೇ ಅಭಿಮಾನಿಗಳು ಆ ದುಷ್ಕರ್ಮಿಯನ್ನು ಹಿಡಿದು ಥಳಿಸಿ ಪೊಲೀಸರಿಗೆ ಒಪ್ಪಿಸಿದ್ದಾರೆ. ಈ ಬಗ್ಗೆ ತಮ್ಮ ಸೋಶಿಯಲ್ ಮೀಡಿಯಾದಲ್ಲಿ ಪ್ರತಿಕ್ರಿಯಿಸಿರುವ ಅರ್ನಾಲ್ಡ್​ 'ಆ ಜನಸಂದಣಿಯಲ್ಲಿ ಯಾರೋ ನೂಕಿದರು ಎಂದುಕೊಂಡಿದ್ದೆ, ಆದರೆ ವಿಡಿಯೋ ನೋಡಿದಾಗಲೇ ನನ್ನ ಮೇಲೆ ದಾಳಿ ನಡೆದಿದ್ದು ತಿಳಿಯಿತು. ಅಭಿಮಾನಿಗಳು ಈ ಬಗ್ಗೆ ಚಿಂತಿಸುವುದು ಬೇಡ. ನಾನು ಆರೋಗ್ಯವಾಗಿದ್ದೇನೆ. ನನಗೇನೂ ಆಗಿಲ್ಲ ಎಂದು ಹೇಳಿದ್ದಾರೆ.

ವಿಶ್ವವಿಖ್ಯಾತ ಸಿನಿಮಾ ನಟನಾಗಿದ್ದರೂ ಇದುವರೆಗೂ ಒಂದೂ ಕಪ್ಪುಚುಕ್ಕೆ ಇಲ್ಲದ ಅರ್ನಾಲ್ಡ್ ಅತ್ಯಂತ ಮೃದು ಸ್ವಭಾವದವರಾಗಿದ್ದು,ಸಮಾಜ ಸೇವೆ ಹಾಗೂ ಕ್ರೀಡೆಗಾಗಿ ಸಾಕಷ್ಟು ಹಣ ಖರ್ಚು ಮಾಡುತ್ತಿದ್ದಾರೆ.

ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಹೆಸರು ಮಾಡಿರುವ ಗಣ್ಯವ್ಯಕ್ತಿ ಮೇಲೆ ಹಲ್ಲೆ ನಡೆದಿರುವುದಕ್ಕೆ ಎಲ್ಲೆಡೆ ಬೇಸರ,ಖಂಡನೆ ವ್ಯಕ್ತವಾಗಿದೆ.