ಕೊರೊನಾ ಕರಿ ನೆರಳಿಗೆ ಗುರಿಯಾದ ಕನ್ನಡದ ಸ್ಟಾರ್​ ನಟರ ಸಿನಿಮಾಗಳು​..

ಲಾಕ್‌ಡೌನ್ ಸಡಲಿಕೆ ನಂತರ ಚಿತ್ರಮಂದಿರ ಹಾಗೂ ಸಿನಿಮಾ ಶೂಟಿಂಗ್ ಶುರುಮಾಡೋದಕ್ಕೆ ಕನ್ನಡ ಚಿತ್ರರಂಗ ಸಜ್ಜಾಗಿದೆ. ಆದರೆ, ಈ ಕೊರೊನಾ ಎಫೆಕ್ಟ್, ಬಿಗ್ ಸ್ಟಾರ್ ನಟರ ಸಿನಿಮಾಗಳ ಮೇಲೆ ದೊಡ್ಡ ಮಟ್ಟದಲ್ಲಿ ಪರಿಣಾಮ ಬೀರಿರುವುದು ಸತ್ಯ.

ಕೊರೊನಾದಿಂದಾಗಿ ದೇಶದೆಲ್ಲೆಡೆ ಆರ್ಥಿಕ ವ್ಯವಸ್ಥೆ ಕುಸಿದಿದೆ. ಇದರ ಎಫೆಕ್ಟ್ ಕನ್ನಡ ಚಿತ್ರರಂಗಕ್ಕೂ ತಟ್ಟಿದೆ. ಕಳೆದ ಎರಡೂವರೆ ತಿಂಗಳಿನಿಂದ ಯಾವುದೇ ಸಿನಿಮಾ ಶೂಟಿಂಗ್, ಚಿತ್ರ ಪ್ರದರ್ಶನ ಇಲ್ಲದೆ ‌ಇರುವುದರಿಂದ ಕೋಟ್ಯಂತರ ರೂಪಾಯಿ ನಷ್ಟ ಆಗಿದೆ. ಇನ್ನೇನು ಲಾಕ್‌ಡೌನ್ ಸಡಿಲಿಕೆ ನಂತರ, ಚಿತ್ರಮಂದಿರ ಹಾಗೂ ಸಿನಿಮಾ ಶೂಟಿಂಗ್ ಶುರು ಮಾಡೋದಕ್ಕೆ ಚಿತ್ರರಂಗ ಸಜ್ಜಾಗಿದೆ. ಆದರೆ, ಈ ಕೊರೊನಾ ಎಫೆಕ್ಟ್, ಬಿಗ್ ಸ್ಟಾರ್ ನಟರ ಸಿನಿಮಾಗಳ ಮೇಲೆ ದೊಡ್ಡ ಮಟ್ಟದಲ್ಲಿ ಪರಿಣಾಮ ಬೀರಿರುವುದು ಸತ್ಯ.

ಕೊರೊನಾ ಬರುವುದಕ್ಕಿಂತ ಮುಂಚೆ, ಪುನೀತ್‌ ರಾಜ್‍ಕುಮಾರ್, ಸುದೀಪ್, ಯಶ್, ದರ್ಶನ್, ಉಪೇಂದ್ರ ಹೀಗೆ ಸ್ಟಾರ್ ನಟರು ನಟಿಸಿದ್ದ ಸಿನಿಮಾಗಳು ರಿಲೀಸ್ ಆಗೋದಕ್ಕೆ ಒಂದೊಂದು ಡೇಟ್ ಫಿಕ್ಸ್ ಮಾಡಿಕೊಂಡಿದ್ರು. ಆದರೆ, ಈ ಸ್ಟಾರ್ ನಟರ ಸಿನಿಮಾಗಳ ರಿಲೀಸ್ ಡೇಟ್ ಈಗ ತಲೆಕೆಳಗಾಗಿದೆ.

ಏಪ್ರಿಲ್ ತಿಂಗಳಲ್ಲಿ ರಿಲೀಸ್ ಆಗೋದಕ್ಕೆ ಸಜ್ಜಾಗಿದ್ದ ಬಿಗ್ ಸ್ಟಾರ್ಸ್​​​ ಸಿನಿಮಾಗಳಲ್ಲಿ ಚಾಲೆಂಜಿಂಗ್ ಸ್ಟಾರ್ ಅಭಿನಯದ ರಾಬರ್ಟ್ ಚಿತ್ರ ಕೂಡ ಒಂದು. ಈ ಚಿತ್ರ ಟೈಟಲ್ ಹಾಗೂ ದರ್ಶನ್ ಗ್ಯಾಂಗ್ ಸ್ಟಾರ್ ಲುಕ್​ನಿಂದಾಗಿ ಸೌತ್‌ ಸಿನಿಮಾ ಇಂಡಸ್ಟ್ರಿಯಲ್ಲಿ ಗಮನ ಸೆಳೆದಿದೆ. ನಿರ್ದೇಶಕ ತರುಣ್ ಸುಧೀರ್ ನಿರ್ದೇಶನದ ರಾಬರ್ಟ್ ಚಿತ್ರ, ಎಲ್ಲಾ ಅಂದುಕೊಂಡಂತೆ ನಡೆದಿದ್ರೆ, ಇಷ್ಟೊತ್ತಿಗಾಗಲೇ ತೆರೆಕಂಡು ಎರಡು ತಿಂಗಳು ಆಗ್ತಾ ಇತ್ತು. ಆದರೆ, ಈ ಕೊರೊನಾದಿಂದಾಗಿ ರಾಬರ್ಟ್ ಸಿನಿಮಾ ಈಗ ಜುಲೈ 30ಕ್ಕೆ ರಿಲೀಸ್ ಮಾಡಲು ಸಿದ್ಧತೆ ನಡೆದಿದೆಯಂತೆ.

ದರ್ಶನ್​​

ಸ್ಯಾಂಡಲ್​​ವುಡ್​ನಲ್ಲಿ ಶೀರ್ಷಿಕೆಯಿಂದ ಸದ್ದು ಮಾಡ್ತಿರೋ ಸಿನಿಮಾ ಸಲಗ. ದುನಿಯಾ ವಿಜಯ್ ಫಸ್ಟ್ ಟೈಮ್ ನಿರ್ದೇಶನ ಮಾಡಿರೋ ಸಲಗ ಚಿತ್ರ, ಗೌರಿ ಗಣೇಶ ಹಬ್ಬಕ್ಕೆ ತೆರೆ ಕಾಣೋದಕ್ಕೆ ಸಜ್ಜಾಗಿದೆ. ಸದ್ಯ ಸಲಗ ಸಿನಿಮಾ ಸೆನ್ಸಾರ್ ಟೇಬಲ್​​ನಲ್ಲಿದ್ದು, ನಿರ್ಮಾಪಕ ಕೆ.ಪಿ‌ ಶ್ರೀಕಾಂತ್ ಅಗಸ್ಟ್ 21ರಂದು ಸಿನಿಮಾವನ್ನ ಬಿಡುಗಡೆ ಮಾಡಲು ಪ್ಲಾನ್ ಮಾಡಿದ್ದಾರೆ ಎನ್ನಲಾಗಿದೆ.

ಪುನೀತ್​​ ರಾಜ್​ ಕುಮಾರ್​​

ಕನ್ನಡ ಚಿತ್ರರಂಗದ ಪವರ್ ಸ್ಟಾರ್ ಆಗಿರುವ ಪುನೀತ್ ರಾಜ್‍ಕುಮಾರ್ ನಟನೆಯ ಬಹು ನಿರೀಕ್ಷಿತ ಚಿತ್ರ ಯುವರತ್ನ ಸದ್ಯಕ್ಕೆ ಟೀಸರ್ ನಿಂದಲೇ ಸೋಷಿಯಲ್ ಮೀಡಿಯಾದಲ್ಲಿ ಸದ್ದು ಮಾಡಿದೆ. ಕೊರೊನಾ ಇಲ್ಲದಿದ್ರೆ ಯುವರತ್ನ ಸಿನಿಮಾ ಇಷ್ಟು ಹೊತ್ತಿಗೆ ರಿಲೀಸ್ ಆಗಬೇಕಿತ್ತು. ರಾಜಕುಮಾರ ಸಿನಿಮಾದ ಬಳಿಕ ಪವರ್ ಸ್ಟಾರ್​​ಗೆ ಆ್ಯಕ್ಷನ್ ಕಟ್ ಹೇಳಿರುವ ಸಂತೋಷ್ ಆನಂದ್ ರಾಮ್, ಮತ್ತೊಂದು ಹಿಟ್ ಕೊಡಲು ರೆಡಿಯಾಗಿದ್ದಾರೆ.

ಈಗಾಗಲೇ ಟೀಸರ್​​ನಲ್ಲಿ ಪವರ್ ಸ್ಟಾರ್ ಎರಡು ಶೇಡ್​ನಲ್ಲಿ ಕಾಣಿಸಿದ್ದಾರೆ. ಮಲಯಾಳಿ ಸುಂದರಿ ಸಯೇಶಾ ಸೈಗಾಲ್ ಜೋಡಿಯಾಗಿದ್ದಾರೆ. ಯುವರತ್ನ ಸಿನಿಮಾವನ್ನ ಹೊಂಬಾಳೆ ಫಿಲ್ಮ್ ಬ್ಯಾನರ್​​ ನಿರ್ಮಾಣ ಮಾಡಿದ್ದು, ದಸರಾ ಹಬ್ಬಕ್ಕೆ ರಿಲೀಸ್ ಮಾಡಲು ನಿರ್ಮಾಪಕ ವಿಜಯ್ ಕಿರಗಂದೂರ್ ಸಿದ್ಧತೆ ನಡೆಸಿದ್ದಾರೆ.

ಸುದೀಪ್​​

ಕಿಚ್ಚ ಸುದೀಪ್ ಅಭಿನಯದ‌ ಕೋಟಿಗೊಬ್ಬ-3 ಸಿನಿಮಾ ಕೂಡ ರಿಲೀಸ್​​ಗೆ ಸಜ್ಜಾಗಿದೆ. ಹಲವು ವಿಚಾರಗಳಿಗೆ ಸೌಂಡ್ ಮಾಡ್ತಿರೋ ಕೋಟಿಗೊಬ್ಬ-3 ಸಿನಿಮಾ ಕಿಚ್ಚನ ಹುಟ್ಟು ಹಬ್ಬಕ್ಕೆ ತೆರೆ ಕಾಣಲಿದೆ. ಕಿಚ್ಚ ಈ ಚಿತ್ರದಲ್ಲಿ ಇಂಟರ್ ನ್ಯಾಷನಲ್ ಸ್ಮಗ್ಲರ್​​​​​ ಆಗಿ ಕಾಣಿಸಿಕೊಂಡಿದ್ದಾರೆ. ಅದ್ದೂರಿ ಮೇಕಿಂಗ್​​ನಿಂದ ಕೂಡಿರುವ ಕೋಟಿಗೊಬ್ಬ-3 ಸಿನಿಮಾವನ್ನ ನಿರ್ಮಾಪಕ ಸೂರಪ್ಪ ಬಾಬು ಸೆಪ್ಟೆಂಬರ್ 4ಕ್ಕೆ ರಿಲೀಸ್ ಮಾಡುವ ಪ್ಲಾನ್ ಮಾಡಿದ್ದಾರೆ.

ಉಪೇಂದ್ರ

ಐ ಲವ್ ಯೂ ಚಿತ್ರದ ಮೂಲಕ ಸ್ಯಾಂಡಲ್​​ವುಡ್​ನಲ್ಲಿ ಸ್ಟಾರ್ ಡಮ್ ಗಿಟ್ಟಿಸಿರುವ ಉಪೇಂದ್ರ ಈಗ ಬ್ಯಾಕ್ ಟು ಬ್ಯಾಕ್ ಚಿತ್ರಗಳನ್ನ ಮಾಡ್ತಾ ಇದ್ದಾರೆ. ಸದ್ಯ ಉಪೇಂದ್ರ ಅಭಿನಯದ ಹೋಂ‌‌ ಮಿನಿಸ್ಟರ್ ರಿಲೀಸ್​​ಗೆ ರೆಡಿಯಾಗಿದೆ. ಆದರೆ, ಈ ಸಿನಿಮಾ ರಾಬರ್ಟ್ ಸಿನಿಮಾ ರಿಲೀಸ್ ಆದ ಒಂದು ವಾರಕ್ಕೆ ರಿಲೀಸ್ ಆಗಲಿದೆ ಎಂದು ಹೇಳಲಾಗುತ್ತಿದೆ.

ಧ್ರುವಾ ಸರ್ಜಾ

ಇನ್ನು ಧ್ರುವ ಸರ್ಜಾ ಅಭಿನಯದ ಪೊಗರು ಸಿನಿಮಾ ಕೂಡ ಕ್ರಿಸ್‌ಮಸ್ ಹಬ್ಬಕ್ಕೆ ಬರೋದಕ್ಕೆ ರೆಡಿಯಾಗಿದೆ. ಯಾಕೆಂದರೆ, ಈ ಚಿತ್ರದಲ್ಲಿ ಎರಡು ಹಾಡುಗಳ ಚಿತ್ರೀಕರಣ ಬಾಕಿ ಇರುವ ಕಾರಣ, ನಿರ್ದೇಶಕ ನಂದ ಕಿಶೋರ್ ಒಂದು ಸಾಂಗ್‌ ಮಾತ್ರ ಚಿತ್ರೀಕರಣ ಮಾಡಿ, ಡಿಸೆಂಬರ್​ನಲ್ಲಿ ಬಿಡುಗಡೆ ಮಾಡಲಿದ್ದಾರೆ.

ಕೆಜಿಎಫ್​​​​

ಕೆಜಿಎಫ್ ಸಿನಿಮಾ ಮೂಲಕ ವಿಶ್ವದ ಗಮನ ಸೆಳೆದ ರಾಕಿಂಗ್ ಸ್ಟಾರ್ ಯಶ್, ಈ ವರ್ಷವೂ ಪ್ರೇಕ್ಷಕರಿಗೆ ದರ್ಶನ ಇಲ್ಲಾ. ಕೆಜಿಎಫ್ ಚಾಪ್ಟರ್ 2 ಸಿನಿಮಾ ಇದೇ ಅಕ್ಟೋಬರ್​ಗೆ ರಿಲೀಸ್ ಆಗುತ್ತೆ ಅಂತಾ ಅನೌನ್ಸ್​​​ ಮಾಡಲಾಗಿತ್ತು. ಆದರೆ, ಈ ಕೊರೊನಾದಿಂದಾಗಿ ಕೆಜಿಎಫ್ ಚಾಪ್ಟರ್ 2 ಸಿನಿಮಾ ಅಕ್ಟೋಬರ್​​ನಲ್ಲಿ ರಿಲೀಸ್ ಆಗೋದು ಡೌಟ್ ಎನ್ನಲಾಗುತ್ತಿದೆ.

ಸಿನಿಮಾ ಥಿಯೇಟರ್ ಓಪನ್ ಆಗಿ ಬಿಗ್ ಸ್ಟಾರ್ ಸಿನಿಮಾಗಳು ತೆರೆಕಂಡ್ರೂ‌‌ ಮೊದಲಿನ ರೀತಿ ಕೋಟಿ ಕೋಟಿ ಕಲೆಕ್ಷನ್ ಆಗೋದು ಡೌಟ್. ಯಾಕೆಂದರೆ, ಕೊರೊನಾದಿಂದಾಗಿ ಪ್ರೇಕ್ಷಕರು ಚಿತ್ರಮಂದಿರಗಳಿಗೆ ಬರೋದು ಕಷ್ಟ. ಹೀಗಾಗಿ ಈ ಬಿಗ್ ಸ್ಟಾರ್ ಸಿನಿಮಾಗಳ ಮೇಲೆ ಕೊರೊನಾ ಕರಿ ನೆರಳು ಅವರಿಸಿರೊದಂತು ನಿಜ.