ಸ್ಯಾಂಡಲ್ವುಡ್ನಲ್ಲಿ ಇತ್ತೀಚೆಗೆ ಸಿನಿಮಾ ಹೆಸರಿಗಿಂತ ಟ್ಯಾಗ್ಲೈನ್ಗಳು ಹೆಚ್ಚು ಸದ್ದು ಮಾಡುತ್ತಿವೆ. ಇತ್ತೀಚೆಗೆ ದಯಾಳ್ ಪದ್ಮನಾಭನ್ ಅವರ ಹೊಸ ಚಿತ್ರ 'ರಂಗನಾಯಕಿ' ಚಿತ್ರದ ಮುಹೂರ್ತ ನೆರವೇರಿದ್ದು, ಅದರ ಟ್ಯಾಗ್ಲೈನ್ ಕೂಡಾ ಚರ್ಚೆಗೆ ಗ್ರಾಸವಾಗಿದೆ.
ಟ್ಯಾಗ್ಲೈನ್ ಬಗ್ಗೆ ಸ್ಪಷ್ಟನೆ ನೀಡಿದ ದಯಾಳ್ ಪದ್ಮನಾಭನ್ ಮುಹೂರ್ತದಂದು ಚಿತ್ರದ ಟೀಸರ್ ಹಾಗೂ ಮೊದಲ ಪೋಸ್ಟರ್ ಕೂಡಾ ಬಿಡುಗಡೆಯಾಗಿದ್ದು, 'ವಾಲ್ಯೂಮ್ 1 - ವರ್ಜಿನಿಟಿ' ಎಂಬ ಟ್ಯಾಗ್ ಲೈನ್ ನೀಡಲಾಗಿತ್ತು. ಇದು ಹಲವರ ಕೆಂಗಣ್ಣಿಗೆ ಗುರಿಯಾಗಿತ್ತು. ಪುಟ್ಟಣ್ಣ ಕಣಗಾಲ್ ನಿರ್ದೇಶನದಲ್ಲಿ ಆರತಿ ಅಭಿನಯಿಸಿದ್ದ 'ರಂಗನಾಯಕಿ' ಸಿನಿಮಾ ಇಂದಿಗೂ ಜನರ ಮನಸಿನಲ್ಲಿದ್ದು, ಅದೊಂದು ಉತ್ತಮ ಚಿತ್ರವಾಗಿತ್ತು. ಅಂತಹ ಚಿತ್ರದ ಹೆಸರನ್ನು ಇರಿಸಿಕೊಂಡು ಆ ಚಿತ್ರಕ್ಕೆ ಈ ರೀತಿಯ ಟ್ಯಾಗ್ಲೈನ್ ನೀಡಿದ್ದಾರೆ ಎಂದು ಕೆಲವರು ಮುಜುಗರ ವ್ಯಕ್ತಪಡಿಸಿದ್ದರು. ಈ ವಿಷಯ ಚರ್ಚೆಗೆ ಕೂಡಾ ಗ್ರಾಸವಾಗಿತ್ತು. ಈಗ ಈ ಕಾಂಟ್ರವರ್ಸಿಗೆ ನಿರ್ದೇಶಕ ದಯಾಳ್ ಪದ್ಮನಾಭನ್ ಸ್ಪಷ್ಟನೆ ನೀಡಿದ್ದಾರೆ.
ಇದರಲ್ಲಿ ಮುಜುಗರವಾಗುವಂತಹ ಅಂಶ ಇಲ್ಲ. ಅಂದಿನ 'ರಂಗನಾಯಕಿ' ಮಹಿಳಾ ಪ್ರಧಾನ ಚಿತ್ರವಾಗಿತ್ತು. ಅದೇ ರೀತಿ ಈ ರಂಗನಾಯಕಿ ಚಿತ್ರವೂ ಸಹ ಮಹಿಳಾ ಪ್ರಧಾನ ಚಿತ್ರವಾಗಿದೆ. ನಿರ್ದೇಶಕ ಪುಟ್ಟಣ್ಣ ಕಣಗಾಲ್ ಅವರು ನೂರು ಚಿತ್ರಗಳನ್ನು ಮಾಡಬಹುದಾದಂತ ಟೈಟಲನ್ನು ನಮಗೆ ಕೊಟ್ಟು ಹೋಗಿದ್ದಾರೆ. 'ರಂಗನಾಯಕಿ' ಟೈಟಲ್ನಿಂದ ನೂರಾರು ನಾಯಕಿಯರನ್ನು ಹುಟ್ಟು ಹಾಕ‌ಬಹುದು. ಅಲ್ಲದೆ ನಾನು ಮುಂದಿನ ದಿನಗಳಲ್ಲಿ ಇದೇ ಟೈಟಲ್ ಬಳಸಿ ಮತ್ತೆ ಮಹಿಳಾ ಪ್ರಧಾನ ಸಿನಿಮಾ ಮಾಡಲು ನಿರ್ಧರಿಸಿದ್ದೇನೆ. ಆ ಕಾರಣಕ್ಕಾಗಿ 'ವಾಲ್ಯೂಮ್ 1 - ವರ್ಜಿನಿಟಿ' ಎಂದು ಚಿತ್ರಕ್ಕೆ ಟ್ಯಾಗ್ಲೈನ್ ಕೊಡಲಾಗಿದೆ ಎಂದು ಹೇಳಿದ್ದಾರೆ.
ಅಲ್ಲದೆ ಈ ಚಿತ್ರ ಅತ್ಯಾಚಾರಕ್ಕೆ ಒಳಗಾದ ಹೆಣ್ಣಿನ ಸುತ್ತ ಹೆಣೆದಿರುವ ಕಥೆಯಾಗಿದ್ದು, 'ವರ್ಜಿನಿಟಿ' ಸೂಕ್ತವಾದ ಟ್ಯಾಗ್ಲೈನ್. ಈಗಾಗಲೇ ನಾನು ನಾಲ್ಕೈದು ಮಹಿಳಾ ಪ್ರಧಾನ ಸಿನಿಮಾ ಕಥೆಗಳನ್ನು ರೆಡಿ ಮಾಡಿಕೊಂಡಿದ್ದೇನೆ. ವರ್ಷಕ್ಕೆ ಒಂದೊಂದು ಸಿನಿಮಾ ಮಾಡುತ್ತೇನೆ ಎಂದು ದಯಾಳ್ ಸ್ಪಷ್ಟನೆ ನೀಡಿದ್ದಾರೆ.
