ಕುರುಕ್ಷೇತ್ರ ಪ್ರಮೋಷನ್ ವಿಚಾರ...'ಡಿ ಬಾಸ್'​ ಪಡೆ ಮನವಿಗೆ ಸ್ಪಂದಿಸ್ತಾರಾ ನಿರ್ಮಾಪಕ ಮುನಿರತ್ನ ?

ಕುರುಕ್ಷೇತ್ರದ ಪ್ರಮೋಷನ್ ವಿಚಾರವಾಗಿ ಡಿ ಬಾಸ್ ಅಭಿಮಾನಿಗಳು ಬೇಸರಗೊಂಡಿದ್ದಾರೆ. ಈ ಚಿತ್ರಕ್ಕೆ ಸರಿಯಾದ ಪ್ರಚಾರ ಸಿಗುತ್ತಿಲ್ಲ ಎಂದು ಚಿತ್ರತಂಡದ ಮೇಲೆ ಅಸಮಾಧಾನ ಹೊರಹಾಕಿದ್ದಾರೆ.

ಇತ್ತೀಚಿಗಷ್ಟೆ ಟ್ರೇಲರ್ ಹಾಗೂ ಆಡಿಯೋ ರಿಲೀಸ್​ ಕಾರ್ಯಕ್ರಮದ ಪಾಸ್​ ವಿಚಾರವಾಗಿ 'ಕುರುಕ್ಷೇತ್ರ' ನಿರ್ಮಾಪಕ ಮುನಿರತ್ನ ಮೇಲೆ ಡಿ ಬಾಸ್​ ಪಡೆ ಅಸಮಾಧಾನಗೊಂಡಿತ್ತು. ಈಗ ಮತ್ತೆ ದಾಸನ ಫ್ಯಾನ್ಸ್​ ಬೇಸರಗೊಂಡಿದ್ದಾರೆ.

ಸಾರಥಿಯ 50 ನೇ ಚಿತ್ರ 'ಕುರುಕ್ಷೇತ್ರ' ಮುಂದಿನ ತಿಂಗಳು ರಿಲೀಸ್ ಆಗುತ್ತಿದೆ. ಹೇಳಿ ಕೇಳಿ ಇದು ಪ್ಯಾನ್​ ಇಂಡಿಯಾ ಸಿನಿಮಾ. ಚಿತ್ರ ಎಲ್ಲರಿಗೂ ರೀಚ್ ಆಗಬೇಕಂದ್ರೆ ಭರ್ಜರಿ ಪ್ರಮೋಷನ್ ಬೇಕೇ ಬೇಕು. ಆದರೆ, ಚಿತ್ರತಂಡದಿಂದ ಹೇಳಿಕೊಳ್ಳುವಂತ ಪ್ರಚಾರ ನಡೆಯುತ್ತಿಲ್ಲ. ಪಂಚ ಭಾಷೆಗಳಲ್ಲಿ ತೆರೆ ಕಾಣುತ್ತಿರುವ ಕುರುಕ್ಷೇತ್ರಕ್ಕೆ ದೊಡ್ಡದಾಗಿ ಪ್ರಮೋಷನ್ ಮಾಡಿ. ಕರ್ನಾಟಕದಲ್ಲಿ ಪ್ರಚಾರದ ಅಗತ್ಯವಿಲ್ಲ, ಇಲ್ಲಿ ಡಿ ಬಾಸ್​ ಹೆಸರೇ ಸಾಕು. ದಯವಿಟ್ಟು ಪರಭಾಷೆಯಲ್ಲಾದರೂ ಪ್ರಮೋಷನ್ ಮಾಡಿ ಎಂದು ದರ್ಶನ್ ಅಭಿಮಾನಿಗಳು ಚಿತ್ರತಂಡಕ್ಕೆ ಒತ್ತಾಯಿಸುತ್ತಿದ್ದಾರೆ.

ಇನ್ನು ಬಹುಕೋಟಿ ವೆಚ್ಚದಲ್ಲಿ ತಯಾರಾಗಿರುವ ಕುರುಕ್ಷೇತ್ರ ಆಗಸ್ಟ್​ ಮೊದಲ ವಾರದಲ್ಲಿ ತೆರೆಗೆ ಬರುತ್ತಿದೆ. ದರ್ಶನ್​, ರವಿಚಂದ್ರನ್​, ದಿವಂಗತ ನಟ ಅಂಬರೀಶ್ ಸೇರಿದಂತೆ ಬಹುತಾರಾಗಣದ ಈ ಚಿತ್ರ ಕಣ್ತುಂಬಿಕೊಳ್ಳಲು ಅಭಿಮಾನಿಗಳು ಕಾತುರದಿಂದ ಕಾಯುತ್ತಿದ್ದಾರೆ.