‘ಒನ್​ ಕಟ್​, ಟೂ ಕಟ್​’ ಚಿತ್ರದ ಮೂಲಕ ಮತ್ತೆ ಒಂದಾದ ಪುನೀತ್​ - ಡಾನಿಷ್​ ಸೇಠ್​

ತಮ್ಮ ವಿಚಿತ್ರ ಮ್ಯಾನರಿಸಂ ಮತ್ತು ಮಾತಿನ ಶೈಲಿಯ ಮೂಲಕ ಎಲ್ಲರಿಗೂ ಇಷ್ಟವಾಗುವವರು ಡಾನಿಷ್​​ ಸೇಠ್​ ಅಲಿಯಾಸ್​ ನೊಗರಾಜ್​. ಅದರಲ್ಲೂ 'ಪವರ್ ಸ್ಟಾರ್​' ಪುನೀತ್​ ರಾಜಕುಮಾರ್​ ಅವರಿಗಂತೂ ಡಾನಿಷ್ ಅಂದರೆ ಬಹಳ ಇಷ್ಟ.

'ಹಂಬಲ್​ ಪೊಲಿಟೀಶಿಯನ್​ ನೊಗರಾಜ್​' ಚಿತ್ರದಲ್ಲಿ ಪುನೀತ್​ ಅತಿಥಿ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. ಆ ನಂತರ ಡಾನಿಷ್​ ಅಭಿನಯದಲ್ಲಿ 'ಫ್ರೆಂಚ್​ ಬಿರಿಯಾನಿ' ಚಿತ್ರವನ್ನು ನಿರ್ಮಿಸಿದ್ದರು.

ಇದೀಗ ಪುನೀತ್​ ಮತ್ತು ಡಾನಿಷ್​ ಇನ್ನೊಂದು ಚಿತ್ರದಲ್ಲಿ ಜೊತೆಗೆ ಕೆಲಸ ಮಾಡುತ್ತಿದ್ದಾರೆ. ಪುನೀತ್​ ತಮ್ಮ ಪಿಆರ್​ಕೆ ಪ್ರೊಡಕ್ಷನ್ಸ್​ನಡಿ ನಿರ್ಮಿಸುತ್ತಿರುವನ 'ಒನ್​ ಕಟ್​ ಟೂ ಕಟ್​' ಎಂಬ ಹೊಸ ಚಿತ್ರದಲ್ಲಿ ಡಾನಿಷ್​​ ನಾಯಕನಾಗಿ ಕಾಣಿಸಿಕೊಳ್ಳುತ್ತಿರುವುದು ವಿಶೇಷ.

ಇದೊಂದು ಪಕ್ಕಾ ಕಾಮಿಡಿ ಚಿತ್ರವಾಗಿದ್ದು, ಇಂಗ್ಲಿಷ್​ ಸರಿಯಾಗಿ ಬರದ ಇಂಗ್ಲಿಷ್​ ಮೇಷ್ಟ್ರು ಗೋಪಿಯಾಗಿ ಡಾನಿಷ್​ ಈ ಚಿತ್ರದಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ಈ ಚಿತ್ರವನ್ನು ವಂಸಿಧರ್​ ಭೋಗರಾಜು ಎನ್ನುವವರು ನಿರ್ದೇಶನ ಮಾಡುತ್ತಿದ್ದಾರೆ.

ಸದ್ಯಕ್ಕೆ ಈ ಚಿತ್ರದ ಬಗ್ಗೆ ಇಷ್ಟೇ ಮಾಹಿತಿ. ಹೊಸ ವರ್ಷದ ನಿಮಿತ್ತ ಪುನೀತ್​, ಈ ಚಿತ್ರದ ಫಸ್ಟ್​ ಲುಕ್​ ಪೋಸ್ಟರ್​ ಬಿಡುಗಡೆ ಮಾಡಿ, ಡಾನಿಷ್ ಜತೆಗೆ ಇನ್ನೊಂದು ಹೊಸ ಚಿತ್ರ ಮಾಡುವುದಾಗಿ ಹೇಳಿಕೊಂಡಿದ್ದಾರೆ.

ಈ ಚಿತ್ರ ಫೆಬ್ರವರಿಯಲ್ಲಿ ಪ್ರಾರಂಭವಾಗಲಿದೆ ಎಂಬ ಮಾಹಿತಿ ಬಿಟ್ಟರೆ, ಮಿಕ್ಕಂತೆ ರಹಸ್ಯವನ್ನು ಕಾಪಾಡಿಕೊಂಡಿದ್ದಾರೆ. ಹಾಗಾಗಿ, 'ಒನ್​ ಕಟ್​ ಟೂ ಕಟ್​' ಬಗ್ಗೆ ಇನ್ನಷ್ಟು ಮಾಹಿತಿ ಬೇಕಾದರೆ ಇನ್ನೊಂದಿಷ್ಟು ಸಮಯ ಕಾಯದೇ ಬೇರೆ ದಾರಿಯಿಲ್ಲ.