50 ವರ್ಷಗಳ ಹಿಂದೆಯೇ ತಮಗೆ ದೊರೆತ ರಾಜ್ಯಪ್ರಶಸ್ತಿ ನಿರಾಕರಿಸಿದ್ದ ಬಿ.ಆರ್. ಪಂತುಲು

'ಶ್ರೀ ಕೃಷ್ಣದೇವರಾಯ' ಚಿತ್ರಕ್ಕಾಗಿ ತಮಗೆ ದೊರೆತಿದ್ದ ರಾಜ್ಯಪ್ರಶಸ್ತಿಯನ್ನು ನಟ, ನಿರ್ದೇಶಕ, ನಿರ್ಮಾಪಕ ಬಿ.ಆರ್. ಪಂತುಲು ನಿರಾಕರಿಸಿ 23 ಸೆಪ್ಟೆಂಬರ್ 1970ರಲ್ಲಿ ರಾಜ್ಯ ಸರ್ಕಾರಕ್ಕೆ ಪತ್ರ ಬರೆದಿದ್ದರು. ಆ ಪ್ರಶಸ್ತಿ ದೊರೆಯಬೇಕಾಗಿರುವುದು ಡಾ. ರಾಜ್​​​ಕುಮಾರ್ ಅವರಿಗೆ ಎಂದು ಆ ಪತ್ರದಲ್ಲಿ ಉಲ್ಲೇಖಿಸಿದ್ದರು.

ಕನ್ನಡ ಚಿತ್ರರಂಗದಲ್ಲಿ ಬಿ.ಆರ್. ಪಂತುಲು ಇತಿಹಾಸ ಸೃಷ್ಟಿಸಿದ ನಿರ್ದೇಶಕ, ನಟ, ನಿರ್ಮಾಪಕ. ಚಿತ್ರರಂಗಕ್ಕೆ ಸಾಕಷ್ಟು ಎವರ್​​​ಗ್ರೀನ್ ಸಿನಿಮಾಗಳನ್ನು ನೀಡಿದವರು ಅವರು. 'ಶ್ರೀ ಕೃಷ್ಣದೇವರಾಯ' ಚಿತ್ರಕ್ಕಾಗಿ ತಮಗೆ ಒಲಿದುಬಂದ ಶ್ರೇಷ್ಠ ನಟ ಪ್ರಶಸ್ತಿಯನ್ನು ನಯವಾಗಿ ತಿರಸ್ಕರಿಸಿದವರು ಬಿ.ಆರ್. ಪಂತುಲು.

ಡಾ. ರಾಜ್​​​​ಕುಮಾರ್​ ಅಭಿನಯದ 'ಶ್ರೀಕೃಷ್ಣದೇವರಾಯ' ಅಂದಿನ ಕಾಲದಲ್ಲಿ ದೊಡ್ಡ ಜಯಭೇರಿ ಬಾರಿಸಿತ್ತು. ಈ ಚಿತ್ರವನ್ನು ಬಿ.ಆರ್. ಪಂತುಲು ನಿರ್ಮಿಸಿ, ನಿರ್ದೇಶಿಸಿ ನಟಿಸಿದ್ದರು. ಚಿತ್ರದಲ್ಲಿ ಅವರು ಮಹಾಮಂತ್ರಿ ತಿಮ್ಮರಸು ಆಗಿ ನಟಿಸಿದ್ದರು. ಈ ಚಿತ್ರಕ್ಕಾಗಿ ರಾಜ್ಯ ಸರ್ಕಾರ ಬಿ.ಆರ್. ಪಂತುಲು ಅವರಿಗೆ ಶ್ರೇಷ್ಠನಟ ಪ್ರಶಸ್ತಿ ಘೋಷಿಸಿತ್ತು. ಆದರೆ 50 ವರ್ಷಗಳ ಹಿಂದೆ ಇದೇ ತಿಂಗಳ 23 ರಂದು ಬಿ.ಆರ್. ಪಂತುಲು ತಮಗೆ ದೊರೆತ ರಾಜ್ಯಪ್ರಶಸ್ತಿಯನ್ನು ನಿರಾಕರಿಸಿ ರಾಜ್ಯ ಸರ್ಕಾರಕ್ಕೆ ಪತ್ರ ಬರೆದಿದ್ದರು.

'ಶ್ರೀ ಕೃಷ್ಣದೇವರಾಯ' ಸಿನಿಮಾ

ಈ ಪ್ರಶಸ್ತಿ ದೊರೆಯಬೇಕಾಗಿರುವುದು ನನಗಲ್ಲ, ಡಾ. ರಾಜ್​ಕುಮಾರ್ ಅವರಿಗೆ ಎಂದು ಪತ್ರದಲ್ಲಿ ಬಿ.ಆರ್. ಪಂತುಲು ಉಲ್ಲೇಖಿಸಿದ್ದರು. ಸಾಮಾನ್ಯವಾಗಿ ನಮಗೆ ಪ್ರಶಸ್ತಿ ಬರುತ್ತಿದೆ ಎಂದರೆ ಯಾರೂ ನಿರಾಕರಿಸುವುದಿಲ್ಲ. ಆದರೆ ತಮಗೆ ಒಲಿದು ಬಂದ ರಾಜ್ಯಸರ್ಕಾರ ಪ್ರಶಸ್ತಿಯನ್ನು ಬಿ.ಆರ್. ಪಂತುಲು ಸ್ವೀಕರಿಸಲಿಲ್ಲ. ಬಿ.ಆರ್. ಪಂತುಲು ಎಂದರೆ ಈಗಲೂ ನೆನಪಿಗೆ ಬರುವುದು ಈ ರೀತಿಯ ನಿರ್ಧಾರಗಳಿಗೆ. ಇದು ನಿಜಕ್ಕೂ ಇತರರಿಗೆ ಮಾದರಿ ಎನ್ನಬಹುದು.

1970 ರಲ್ಲಿ ಬಿಡುಗಡೆ ಆಗಿದ್ದ ಶ್ರೀ ಕೃಷ್ಣದೇವರಾಯ ಚಿತ್ರಕ್ಕೆ ನಟಿ ಭಾರತಿ ಹಾಗೂ ಸಂಗೀತ ನಿರ್ದೇಶಕ ಟಿ.ಜಿ. ನಿಜಲಿಂಗಪ್ಪ ಅವರಿಗೂ ರಾಜ್ಯಪ್ರಶಸ್ತಿ ನೀಡಲಾಗಿತ್ತು.