ಬಿಗ್‌ಬಾಸ್ ಮನೆಯಲ್ಲಿದೆ ದೊಡ್ಡ ಗೆಸ್ಸಿಂಗ್ ಗೇಮ್, ಏನದು?

ಇಂದು ಪ್ರಸಾರವಾಗುವ ಸಂಚಿಕೆಯಲ್ಲಿ ಬಿಗ್​ಬಾಸ್​ ಆದೇಶದಂತೆ ಒಬ್ಬೊಬ್ಬರು ತಮಗೆ ತಮ್ಮ ಬಳಿ ಇರುವ ಲಕೋಟೆಯನ್ನು ತೆಗೆದು ಅದರಲ್ಲಿ ಬರೆದಿರುವುದನ್ನು ಕ್ಯಾಮರಾ ಮುಂದೆ ಓದಬೇಕಾಗಿದೆ. ಈ ಮೂಲಕ ಅದರಲ್ಲಿರುವ ಗುಟ್ಟು ಯಾರದ್ದು ಎಂದು ಪತ್ತೆ ಹಚ್ಚಬೇಕಾಗಿದೆ.

ಬಿಗ್​ ಬಾಸ್ ಶೋ ಎರಡನೇ ದಿನಕ್ಕೆ ಕಾಲಿಟ್ಟಿದ್ದು, ಇಂದು ಅನೇಕ ಕುತೂಹಲಗಳು ಕಾದಿವೆ ಎಂಬುದನ್ನು ವಾಹಿನಿ ಬಿಡುಗಡೆ ಮಾಡಿರುವ ಪ್ರೋಮೋ ಹೇಳುತ್ತಿದೆ.

ಗ್ರ್ಯಾಂಡ್​ ಓಪನಿಂಗ್​ ದಿನದಂದು ಕಾರ್ಯಕ್ರಮದ ರೂವಾರಿ ಕಿಚ್ಚ ಸುದೀಪ್​ ಒಬ್ಬೊಬ್ಬ ಸ್ಪರ್ಧಿಗಳನ್ನು ಕರೆದು ಪರಿಚಯ ಮಾಡಿ ಮನೆಯೊಳಗೆ ಕಳುಹಿಸಿಕೊಡುವ ಮುನ್ನ ಅವರ ಕೈಗೆ ಒಂದೊಂದು ಲಕೋಟೆಯನ್ನು ನೀಡಿದ್ದರು. ಇದೇ ವೇಳೆ ಮುಂದಿನ ಬಿಗ್​ಬಾಸ್​ ಆದೇಶದವರೆಗೂ ಅದನ್ನು ತೆರೆಯುವಂತಿಲ್ಲ ಎಂದು ಕಟ್ಟುನಿಟ್ಟಿನ ಸೂಚನೆ ಕೊಟ್ಟಿದ್ದರು. ಈ ವೇಳೆ ಪ್ರೇಕ್ಷಕರ ಮನದಲ್ಲಿ ಅದ್ರಲ್ಲೇನಿರಬಹುದು ಎಂಬ ಕುತೂಹಲ ಮನೆಮಾಡಿತ್ತು, ಇದೀಗ ಆ ಗುಟ್ಟು ರಟ್ಟಾಗುವ ಸಮಯ ಬಂದಿದೆ.

ಪ್ರೋಮೊದಲ್ಲಿ ವಾಸುಕಿ ವೈಭವ್​ ಹೇಳುವ ಪೈಲಟೇ ಆಗಿಬಿಡಬಹುದಿತ್ತು ಹಾಗೂ ಚಂದನ್​ ಹೇಳುವ ಹೆಣ್ಣು ಮಗೂನೇ ಬೇಡ ಅಂದುಕೊಂಡಿದ್ದ ಅಮ್ಮನ ಮಗಳು ಎಂಬ ಗುಟ್ಟು ವೀಕ್ಷಕರ ಮನದಲ್ಲಿ ಸಾಕಷ್ಟು ಕುತೂಹಲ ಮೂಡಿಸಿದೆ.

ಇದರೊಂದಿಗೆ ಇತರೆ ಸ್ಪರ್ಧಿಗಳ ಗುಟ್ಟಿನ ಬಗ್ಗೆಯೂ ಆಸಕ್ತಿ ಕೆರಳಿಸಿದೆ. ಈ ಸಂಚಿಕೆಯ ನಂತರ ಮನೆಯಲ್ಲಿ ಯಾವ ಕಿಡಿ ಹೊತ್ತಬಹುದು ಎಂಬ ಆಲೋಚನೆಯು ವೀಕ್ಷಕರಲ್ಲಿ ಮನೆ ಮಾಡಿದೆ.