ನಟ ನಿರ್ದೇಶಕ ರಿಷಭ್ ಶೆಟ್ಟಿ ಮೊದಲ ಬಾರಿಗೆ ನಾಯಕನಾಗಿ ಅಭಿನಯಿಸಿರುವ 'ಬೆಲ್ ಬಾಟಂ' ಯಶಸ್ವಿಯಾಗಿ 50 ದಿನಗಳನ್ನು ಪೂರೈಸಿದೆ. ಚಿತ್ರತಂಡ ಈ ಖುಷಿಯನ್ನು ಮಾಧ್ಯಮಗಳ ಜೊತೆ ಹಂಚಿ‌ಕೊಂಡು ಕನ್ನಡ ಸಿನಿಪ್ರಿಯರಿಗೆ ಧನ್ಯವಾದ ಹೇಳಿದೆ.
'ಬೆಲ್ ಬಾಟಂ' ಚಿತ್ರ ಐವತ್ತು ದಿನಗಳನ್ನು ಪೂರೈಸಿದರೂ ಸಹ ಮಲ್ಟಿಪ್ಲೆಕ್ಸ್ಗಳಲ್ಲಿ ಈಗಲೂ ಹೌಸ್ಫುಲ್ ಪ್ರದರ್ಶನ ಕಾಣುತ್ತಿದೆ ಎಂದು ನಿರ್ದೇಶಕ ಜಯತೀರ್ಥ ಹೇಳಿದರು. ಅಲ್ಲದೆ ಈಗಾಗಲೇ ಹಿಂದಿ, ತೆಲುಗು, ತಮಿಳಿಗೆ 'ಬೆಲ್ ಬಾಟಂ' ರಿಮೇಕ್ ರೈಟ್ಸ್ ಸೇಲಾಗಿದೆ. ಈಗ ಮಲಯಾಳಂಗೂ ಕೂಡಾ ರೈಟ್ಸ್ ಕೇಳುತ್ತಿದ್ದು, ಇನ್ನೆರಡು ದಿನಗಳಲ್ಲಿ ಅದೂ ಕೂಡಾ ಫೈನಲ್ ಆಗಲಿದೆ ಎಂದು ನಿರ್ದೇಶಕ ಖುಷಿ ಹೇಳಿಕೊಂಡರು. ವಿಶೇಷ ಎಂದರೆ ತೆಲುಗಿನಲ್ಲಿ ಜಯತೀರ್ಥ ಅವರನ್ನೇ ನಿರ್ದೇಶನಕ್ಕೆ ಆಫರ್ ಮಾಡಿರುವುದು ಕೂಡಾ ಖುಷಿಯ ವಿಚಾರವಾಗಿದೆ. ಆದರೆ ಜಯತೀರ್ಥ ಇದರ ಬಗ್ಗೆ ಇನ್ನೂ ನಿರ್ಧರಿಸಿಲ್ಲ. ಮುಂದಿನ ದಿನಗಳಲ್ಲಿ ಅವರ ನಿರ್ಧಾರ ತಿಳಿಸಲಿದ್ದಾರೆ.