ಹ್ಯಾಟ್ರಿಕ್ ನಿರ್ದೇಶಕ ಜೋಗಿ ಪ್ರೇಮ್ ಅವರ ಶಿಷ್ಯ ಭರತ್ ನವುಂದ ನಿರ್ದೇಶನದ ಸಸ್ಪೆನ್ಸ್ ಥ್ರಿಲ್ಲರ್ ಚಿತ್ರ 'ಅಡಚಣೆಗಾಗಿ ಕ್ಷಮಿಸಿ' ಸಿನಿಮಾದ ಆಡಿಯೋ ಮತ್ತು ಟ್ರೇಲರ್ ನಿನ್ನೆ ಬಿಡುಗಡೆಯಾಗಿದೆ. ಕಾರ್ಯಕ್ರಮಕ್ಕೆ ಆಗಮಿಸಿದ್ದ ಮನೋರಂಜನ್ ರವಿಚಂದ್ರನ್, ಪಾರುಲ್ ಯಾದವ್ ಹಾಗೂ ಸಾ.ರಾ.ಗೋವಿಂದು ಆಡಿಯೋ ಹಾಗೂ ಟ್ರೇಲರ್ ಲಾಂಚ್ ಮಾಡಿ ಚಿತ್ರತಂಡಕ್ಕೆ ವಿಶ್ ಮಾಡಿದರು.
ಇದೇ ವೇಳೆ ಚಿತ್ರತಂಡ ಸಿನಿಮಾದ ಬಿಡುಗಡೆ ದಿನಾಂಕವನ್ನೂ ಘೋಷಿಸಿದೆ. ಮಾರ್ಚ್ 22 ರಂದು ಸಿನಿಮಾ ರಾಜ್ಯಾದ್ಯಂತ ಬಿಡುಗಡೆಯಾಗಲಿದೆ. ಸಿನಿಮಾದಲ್ಲಿ 9 ಮುಖ್ಯ ಪಾತ್ರಗಳಿದ್ದು, ಈ ಪಾತ್ರಗಳ ಸುತ್ತ ಚಿತ್ರದ ಕಥೆ ಸಾಗಲಿದೆ. ನಾಯಕನಾಗಿ ಪ್ರದೀಪ್ ವರ್ಮ ಕಾಣಿಸಿಕೊಂಡಿದ್ದಾರೆ. ಮೇಘ, ಅರ್ಪಿತ ಗೌಡ ಹಾಗೂ ಪ್ರೀತಿ ಪ್ರದೀಪ್ ಎಂಬ ಮೂವರು ನಾಯಕಿಯರಾಗಿ ನಟಿಸಿದ್ದಾರೆ.
ಇದು ಸೈಕಾಲಜಿಕಲ್, ಹಾರರ್, ಸಸ್ಪೆನ್ಸ್ ಚಿತ್ರವಾಗಿದ್ದು, ಚಿತ್ರದಲ್ಲಿ ನಾಯಕ ಮೂರು ಶೇಡ್ಗಳಲ್ಲಿ ಕಾಣಿಸಿಕೊಂಡಿದ್ದಾರೆ. ಚಿತ್ರವನ್ನು ಭರತ್ ನಿರ್ದೇಶಿಸಿದ್ದಾರೆ. ನಾಯಕ ಪ್ರದೀಪ್ ಈ ಚಿತ್ರಕ್ಕೆ ಸಂಗೀತ ನೀಡಿರುವುದು ವಿಶೇಷ. ಶ್ರೀ ಭೂಮಿಕಾ ಪ್ರೊಡಕ್ಷನ್ ಮತ್ತು ಎಸ್ಬಿಎನ್ ಟಾಕೀಸ್ ಅಡಿ ನಾಯಕ ಪ್ರದೀಪ್ ತಂದೆ ಸದ್ಗುಣ ಮೂರ್ತಿ ಚಿತ್ರವನ್ನು ನಿರ್ಮಿಸಿದ್ದಾರೆ.
