''R'' ನಿಮ್ಮ ಲಕ್ಕಿ ಅಕ್ಷರವೇ? ಮಾಧ್ಯಮದವರ ಪ್ರಶ್ನೆಗೆ ನಾಚಿ ನೀರಾದ ಆಲಿಯಾ ಭಟ್

ನಟಿ ಆಲಿಯಾ ಭಟ್​ ಅವರಿಗೆ ಆರ್ ಅಕ್ಷರ ನಿಮಗೆ ಲಕ್ಕಿ ಅಕ್ಷರವೇ ಎಂದು ಕೇಳಿದ್ದಾರೆ. ಇದನ್ನು ಕೇಳಿದ ಆಲಿಯಾ ಅವರ ಮುಖ ಕೆಂಪೇರಿ, ನಾಚಿ ನೀರಾಗಿದ್ದಾರೆ. ಕೊನೆಗೆ, ಹೌದು ಆರ್​ ಇಂಗ್ಲಿಷ್​ ವರ್ಣಮಾಲೆಯ ಸುಂದರ ಅಕ್ಷರ. ನನ್ನ ಅದೃಷ್ಟದ ಅಕ್ಷರ ಎಂದು ಒಪ್ಪಿಕೊಂಡಿದ್ದಾರೆ.

ಹೈದರಾಬಾದ್ (ತೆಲಂಗಾಣ): 'ಬಾಹುಬಲಿ' ಖ್ಯಾತಿಯ​ ಎಸ್‌.ಎಸ್‌. ರಾಜಮೌಳಿ ನಿರ್ದೇಶನದ ಬಹುನಿರೀಕ್ಷಿತ ‘ಆರ್‌ಆರ್‌ಆರ್‌’ (RRR) ಚಿತ್ರದ ಟ್ರೈಲರ್ ಕೊನೆಗೂ ಬಿಡುಗಡೆಯಾಗಿದ್ದು, ಚಿತ್ರ ಬಗ್ಗೆ ಸಿನಿಪ್ರಿಯರಲ್ಲಿ ಸಾಕಷ್ಟು ಕುತೂಹಲ ಮೂಡಿಸಿದೆ.

ಆರ್ ಆರ್ ಆರ್ ಚಿತ್ರದ ಟ್ರೇಲರ್​ ಬಿಡುಗಡೆ ಸಮಾರಂಭದಲ್ಲಿ ನಿರ್ದೇಶಕ ರಾಜಮೌಳಿ, ಅಜಯ್​ ದೇವ್​ಗನ್​, ಆಲಿಯಾ ಭಟ್​, ಜೂನಿಯರ್​ ಎನ್​ಟಿಆರ್​ ವೇದಿಕೆ ಮೇಲಿದ್ದು, ಎಲ್ಲರ ಗಮನ ಸೆಳೆದರು. ಆಲಿಯಾ ಭಟ್​ ಕೆಂಪು ಸೀರೆಯನ್ನು ಧರಿಸಿ ಕಾರ್ಯಕ್ರಮದ ಆಕರ್ಷಣೀಯ ಬಿಂದುವಾಗಿ ಗುರುತಿಸಿಕೊಂಡರು.

ಮಾಧ್ಯಮದವರೊಂದಿಗೆ ಮಾತನಾಡುವ ವೇಳೆ ವರದಿಗಾರರೊಬ್ಬರು ಆರ್ ಅಕ್ಷರ ನಿಮಗೆ ಲಕ್ಕಿ ಅಕ್ಷರವೇ ಎಂದು ಕೇಳಿದ್ದಾರೆ. ಇದನ್ನು ಕೇಳಿದ ಆಲಿಯಾ ಅವರ ಮುಖ ಕೆಂಪೇರಿ, ನಾಚಿ ನೀರಾಗಿದ್ದಾರೆ. ಇದಕ್ಕೆ ನನ್ನ ಬಳಿ ಉತ್ತರವಿಲ್ಲ ಎಂದು ಜಾರಿಕೊಳ್ಳಲು ಯತ್ನಿಸಿದರು. ಆದರೂ ಉತ್ತರ ಹೇಳಬೇಕೆಂದು ಎಲ್ಲರೂ ಕೇಳಿಕೊಂಡಿದ್ದು, ವೇದಿಕೆ ಮೇಲಿದ್ದ ಚಿತ್ರತಂಡದವರೂ ನಗುವಂತೆ ಮಾಡಿತು.

ನೆರೆದಿದ್ದವರು ಉತ್ತರ ಹೇಳಬೇಕೆಂದು ಕೇಳಿಕೊಂಡಾಗ, ಹೌದು ಇಂಗ್ಲಿಷ್​ ಆರ್​ ವರ್ಣಮಾಲೆಯ ಸುಂದರ ಅಕ್ಷರ. ನನ್ನ ಅದೃಷ್ಟದ ಅಕ್ಷರ ಎಂದು ಒಪ್ಪಿಕೊಂಡಿದ್ದಾರೆ. ಕೆಲ ಸಮಯದ ಹಿಂದೆ ಆಲಿಯಾ ಭಟ್​ ಹಾಗೂ ರಣಬೀರ್ ಕಪೂರ್​ ರಿಲೇಷನ್​ ಶಿಪ್​ನಲ್ಲಿ ಇರುವುದಾಗಿ ದೃಢಪಡಿಸಿದ್ದಾರೆ.

ಇದನ್ನೂ ಓದಿ:RRR Trailer ನೋಡಿದ್ರಾ?: ಯೂಟ್ಯೂಬ್-ಥಿಯೇಟರ್​ಗಳಲ್ಲಿ ‘ಆರ್‌ಆರ್‌ಆರ್‌’ ಟ್ರೈಲರ್ ರಿಲೀಸ್

ತೆಲುಗು ಸ್ವಾತಂತ್ರ್ಯ ಹೋರಾಟಗಾರರಾದ ಅಲ್ಲೂರಿ ಸೀತಾರಾಮ ರಾಜು ಮತ್ತು ಕೊಮರಾಂ ಭೀಮ್ ಅವರಿಂದ ಪ್ರೇರಿತವಾದ ಕಾಲ್ಪನಿಕ ಕಥೆಯನ್ನು ಈ ಸಿನಿಮಾ ಹೇಳಲಿದೆ. 2022ರ ಜನವರಿ 7 ರಂದು ತೆಲುಗು, ಕನ್ನಡ, ತಮಿಳು, ಮಲಯಾಳಂ ಹಾಗೂ ಹಿಂದಿ ಭಾಷೆಯಲ್ಲಿ 'ಆರ್​ಆರ್​ಆರ್' ಸಿನಿಮಾ ತೆರೆ ಮೇರೆ ಬರಲಿದೆ.