ಮಂಗಳಾದೇವಿಗೆ ನೀನೇನು ದೊಡ್ಡ ಡಾನ್ ಅನ್ಕೊಂಡಾ?. ಬರ್ಲಾ ನಾನು ಅಲ್ಲಿಗೆ, ನೋಡೆ ಬಿಡೋಣಾ, ನಾನಾ ನೀನಾ ಅಂತ..! ಇದು, ಹ್ಯಾಟ್ರಿಕ್ ಹೀರೋ ಶಿವರಾಜಕುಮಾರ್ ಅವರು ನಟ ರಾಜ್ ಬಿ. ಶೆಟ್ಟಿಗೆ ಹಾಕಿದ ಆವಾಜ್. ಇಬ್ಬರು ಸ್ಟಾರ್ ನಟರ ಮಧ್ಯೆ ಏನಾಯ್ತು. ಶಿವರಾಜಕುಮಾರ್ ಅವರು ಯಾಕೆ ಹೀಗೆ ರಾಜ್ ಬಿ ಶೆಟ್ಟಿಗೆ ಬೈದ್ರು ಅಂತ ಅನ್ಕೊಂಡ್ರಾ.
ಗುರುಡ ಗಮನ ವೃಷಭ ವಾಹನ ಸಿನಿಮಾ ಭಾರಿ ಯಶಸ್ಸು ಕಂಡಿದ್ದು, ಇದೀಗ ಚಿತ್ರವನ್ನು ಒಟಿಟಿಯೊಂದು ಖರೀದಿಸಿದೆ. ಇದೇ ಸಂಕ್ರಾಂತಿ ಹಬ್ಬಕ್ಕೆ ಒಟಿಟಿಯಲ್ಲಿ ಜನರಿಗೆ ವೀಕ್ಷಣೆಗೆ ಸಿಗಲಿದೆ. ಶಿವರಾಜಕುಮಾರ್ ನಟನೆಯ ಭಜರಂಗಿ-2 ಸಿನಿಮಾದ ಪ್ರಸಾರದ ಹಕ್ಕನ್ನು ಕೂಡ ಇದೇ ಒಟಿಟಿ ಖರೀದಿಸಿದ್ದು, ಎರಡು ದೊಡ್ಡ ಸಿನಿಮಾಗಳು ಒಟಿಟಿಯಲ್ಲಿ ಸದ್ದು ಮಾಡಲಿವೆ.
ಈ ಕಾರಣಕ್ಕಾಗಿ ಶಿವರಾಜಕುಮಾರ್ ಅವರು ರಾಜ್ ಬಿ ಶೆಟ್ಟಿಗೆ ಕರೆ ಮಾಡಿ ವಿಶ್ ಮಾಡುವ ಮುನ್ನ ಈ ರೀತಿಯಾಗಿ ಆವಾಜ್ ಹಾಕುವ ಮೂಲಕ ಕಾಲೆಳೆದಿದ್ದಾರೆ. ಇಬ್ಬರ ನಡುವಿನ ತಮಾಷೆಯ ಸಂಭಾಷಣೆ ಇದೀಗ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.
ಸಂಭಾಷಣೆ ಆರಂಭದಲ್ಲಿ ಶಿವಣ್ಣ, ರಾಜ್ ಬಿ ಶೆಟ್ಟಿಗೆ ನೀನೇನು ದೊಡ್ಡ ಡಾನ್ ಅನ್ಕೊಂಡಾ?.. ಬರ್ಲಾ ನಾನು ಎಂದು ಆವಾಜ್ ಹಾಕುವ ರೀತಿಯಲ್ಲಿ ಮಾತನಾಡಿಸಿದ್ದಾರೆ. ಈ ವೇಳೆ ರಾಜ್ ಬಿ ಶೆಟ್ಟಿ ಕೂಲ್ ಆಗಿಯೇ ಉತ್ತರಿಸುತ್ತಾ ಯಾರು ನೀವು ಎಂದು ಕೇಳಿದ್ದಾರೆ. ಬಳಿಕ ಶಿವಣ್ಣ ನಾನು ಭಜರಂಗಿ ಎಂದು ಹೇಳಿದಾಗ ರಾಜ್ ಬಿ ಶೆಟ್ಟಿ ಇದು ಶಿವಣ್ಣ ಎಂದು ಗುರುತು ಹಿಡಿದಿದ್ದಾರೆ.
ಬಳಿಕ ರಾಜ್ ಬಿ ಶೆಟ್ಟಿ ಮಾತನಾಡಿ, ನೀವು ಕನ್ನಡ ಸಿನಿಮಾದ ಮೊದಲ ಡಾನ್. ನೀವು ಓಂ ಸಿನಿಮಾ ಮಾಡಿದ ಮೇಲೆಯೇ ನಾನು ಗರುಡ ಗಮನ ಮಾಡಿದ್ದೇನೆ ಸರ್ ಅಂತಾ ಹೇಳಿದ್ದಾರೆ. ಮುಂದುವರಿದು ಮಾತನಾಡಿದ ಶಿವಣ್ಣ, ಒಟಿಟಿಯಲ್ಲಿ ಇಬ್ಬರ ಸಿನಿಮಾ ಪ್ರಸಾರವಾಗುವ ಕಾರಣ ವಿಶ್ ಮಾಡಲು ಕರೆ ಮಾಡಿದೆ. ಗರುಡ ಗಮನ ಸಿನಿಮಾ ತುಂಬಾ ಚೆನ್ನಾಗಿದೆ. ನಿಮ್ಮ ನಟನೆಯೂ ಸೂಪರ್ ಎಂದು ರಾಜ್ ಬಿ ಶೆಟ್ಟಿಗೆ ಶಿವರಾಜಕುಮಾರ್ ಹುರಿದುಂಬಿಸಿದ್ದಾರೆ. ಇದಕ್ಕೆ ಶೆಟ್ಟಿ ನಮ್ರತೆಯಿಂದ ಧನ್ಯವಾದ ಹೇಳಿದ್ದಾರೆ.
ಇದನ್ನೂ ಓದಿ:ಸ್ಯಾಂಡಲ್ವುಡ್ ಮತ್ತು ಟಾಲಿವುಡ್ನಲ್ಲಿ ಒಟ್ಟಿಗೆ ಎಂಟ್ರಿ ನೀಡಲು ಜನಾರ್ದನ ರೆಡ್ಡಿ ಪುತ್ರ ರೆಡಿ..
