ಟ್ವಿಟರ್​​ಗೆ ರಿಕ್ಕಿ ರೀ-ಎಂಟ್ರಿ... ಸ್ಟ್ರಾಂಗ್​ ಆಗಿದೆ ಫಸ್ಟ್​ ಟ್ವೀಟ್​

ಕಳೆದ ವರ್ಷ ಕೆಲವೊಂದು ವೈಯಕ್ತಿಕ ಕಾರಣಗಳಿಂದ ಸೋಷಿಯಲ್​​ ಮೀಡಿಯಾಗಳಿಗೆ ಗುಡ್​ ಬೈ ಹೇಳಿದ್ದ ನಟ ರಕ್ಷಿತ್ ಶೆಟ್ಟಿ, ಇದೀಗ ಸೋಷಿಯಲ್​ ಅಂಗಳಕ್ಕೆ ಮರು ಪ್ರವೇಶ ಮಾಡಿದ್ದಾರೆ.

ತಮ್ಮ ಹುಟ್ಟುಹಬ್ಬದ ದಿನದಂದು ಅಭಿಮಾನಿಗಳಿಗೆ ಉಡುಗೊರೆ ನೀಡಿರುವ ರಿಕ್ಕಿ, ತಮ್ಮ ಟ್ವಿಟರ್​ ಅಕೌಂಟ್​ನ್ನು ರೀ-ಆ್ಯಕ್ಟಿವ್​ ಮಾಡಿದ್ದಾರೆ. ಕಳೆದ ಒಂದು ವರ್ಷದಿಂದ ಟ್ವಿಟರ್​​, ಇನ್​ಸ್ಟಾಗ್ರಾಂನಿಂದ ದೂರವಿದ್ದ ಅವರು, ಅಭಿಮಾನಿಗಳ ಜತೆ ಒಡನಾಟ ಇಟ್ಟುಕೊಳ್ಳಲು ಸಾಧ್ಯವಾಗಿರಲಿಲ್ಲ. ಇದೀಗ ಹಿತೈಷಿ ಹಾಗೂ ಅಭಿಮಾನಿಗಳ ಒತ್ತಾಸೆಯ ಮೇರೆಗೆ ಮತ್ತೆ ಸೊಷಿಯಲ್​ ತಾಣಗಳಿಗೆ ವಾಪಾಸ್ ಬಂದಿದ್ದಾರೆ.

ರಕ್ಷಿತ್ ರೀ-ಎಂಟ್ರಿ ಅವರ ಅಭಿಮಾನಿಗಳಿಗೆ ಸಂತಸದ ಜತೆಗೆ ಕುತೂಹಲ ಮೂಡಿಸಿತ್ತು. ಅವರ ಮೊದಲ ಟ್ವೀಟ್ ಏನಾಗಿರುತ್ತದೆ ಎನ್ನುವದನ್ನು ತಿಳಿಯಲು ಕೌತುಕದಿಂದ ಕಾಯುತ್ತಿದ್ದರು. ಅವನೇ ಶ್ರೀಮನ್ನಾರಾಯಣ ಚಿತ್ರದ ಟೀಸರ್ ಇಲ್ಲವೆ ಪೋಸ್ಟರ್​ ಹಾಗೂ ಚಾರ್ಲಿ 777 ಸಿನಿಮಾದ ಹೊಸ ಪೋಸ್ಟರ್ ಹಂಚಿಕೊಳ್ಳಬಹುದು ಎನ್ನುವುದು ಅಭಿಮಾನಿಗಳ ಊಹೆಯಾಗಿತ್ತು. ಆದರೆ, ರಕ್ಷಿತ್ ಶೆಟ್ಟಿ ಮಾತ್ರ ಅರ್ಥಗರ್ಭಿತವಾದ ಪವರ್​ಫುಲ್​ ಮೆಸೇಜ್​ವೊಂದನ್ನು ನೀಡಿದ್ದಾರೆ.

'ಚಂಡಮಾರುತ ಬೀಸೋ ಮೊದಲು ಎಲ್ಲವೂ ಶಾಂತವಾಗಿರುತ್ತದೆ ಅಲ್ಲವೇ ?' ಎಂದು ರಕ್ಷಿತ್ ಟ್ವೀಟ್ ಮಾಡಿದ್ದಾರೆ. ಕಳೆದ ವರ್ಷದಿಂದ ಅವರು ಸೋಷಿಯಲ್ ಮೀಡಿಯಾದಲ್ಲಿ ಮೌನವಹಿಸಿದ್ದರು. ಜತೆಗೆ ಮೂರು ವರ್ಷಗಳಿಂದ ಅವರ ಯಾವುದೇ ಸಿನಿಮಾ ರಿಲೀಸ್ ಆಗಿಲ್ಲ. ಇದೀಗ ಮತ್ತೆ ಟ್ವಿಟರ್​ಗೆ ದಾಂಗುಡಿ ಇಟ್ಟಿರುವುದು, ಮುಂದಿನ ತಿಂಗಳು ಅವರ ಅವನೇ ಶ್ರೀಮನ್ನಾರಾಯಣ ಸಿನಿಮಾ ರಿಲೀಸ್ ಆಗುತ್ತಿರುವ ಹೊತ್ತಿನಲ್ಲಿ ಅವರ ಈ ಟ್ವೀಟ್ ಮಹತ್ವ ಪಡೆದುಕೊಂಡಿದೆ.