'ಓಪನ್ ಚಾಲೆಂಜ್'ಗೆ ಪ್ರಥಮ್ ಪಂಚ್...ಕ್ಯಾಪ್​​ ತೆರೆಯೋದು ಕಲಿಸಿಕೊಟ್ಟ ಒಳ್ಳೆಯ ಹುಡುಗ

ಈಗ ಸೋಷಿಯಲ್ ಮೀಡಿಯಾದಲ್ಲಿ ಶುರುವಾಗಿರುವ 'ಬಾಟಲ್ ಕಾಪ್ ಚಾಲೆಂಜ್' ವಿರುದ್ಧ ನಟ ಪ್ರಥಮ್ ಸಿಡಿದಿದ್ದಾರೆ. ಕೆಲಸಕ್ಕೆ ಬಾರದ ಈ ತುಕಾಲಿ ಚಾಲೆಂಜ್​ ಹಿಂದೆ ಓಡಬೇಡಿ ಎಂದು ಎಲ್ಲರಲ್ಲೂ ಭಿನ್ನವಿಸಿಕೊಂಡಿದ್ದಾರೆ.

ಕಳೆದೆರಡು ದಿನಗಳಿಂದ 'ಬಾಟಲ್ ಕಾಪ್ ಚಾಲೆಂಜ್' ಭಾರೀ ಸದ್ದು ಮಾಡ್ತಿದೆ. ಕಾಲಿನಿಂದ ಒದ್ದು ಬಾಟಲ್ ಕ್ಯಾಪ್ ಓಪನ್​ ಮಾಡುವ ವಿಡಿಯೋಗಳ ಗೊಂಚಲು ಕಣ್ಣಿಗೆ ರಾಚುತ್ತಿವೆ. ಫಿಟ್ನೆಸ್​ ಭಾಗವಾಗಿ ನಡೆಯುತ್ತಿರುವ ಈ ಸವಾಲಿಗೆ ಬಿಗ್​ಬಾಸ್​ ಪ್ರಥಮ್ ಪಂಚ್ ಕೊಟ್ಟಿದ್ದಾರೆ. ಇಂದು ತಮ್ಮ ಫೇಸ್​​ಬುಕ್​ನಲ್ಲಿ ಬಾಟಲ್ ಮುಚ್ಚಳ ಹೇಗೆ ತೆರೆಯಬೇಕೆಂದು ತೋರಿಸಿರುವ ಅವರು, ಕೈಗಳಿಂದ ಮುಚ್ಚಳ ತೆರೆದು ನೀರು ಕುಡಿಯುವುದು ಒಂದು ಪದ್ಧತಿ. ಅದನ್ನು ಬಿಟ್ಟು ಕುಡಿಯೋದನ್ನು ಕಾಲಿನಲ್ಲಿ ಒದ್ರೆ ಒಳ್ಳೆಯದಾಗುತ್ತಾ? ಇದು ತಪ್ಪು ಎಂದಿದ್ದಾರೆ.

ನೀವು ಫಿಟ್ ಆಗಿರಲು ಇಂತಹ ಚಾಲೆಂಜ್​​ಗಳ ಮೊರೆ ಹೋಗುವ ಬದಲು ಯೋಗ ಮಾಡಿ. ಇದರಿಂದ ರೋಗ ದೂರವಾಗುವುದು ಎಂದು ಕಿವಿ ಮಾತು ಹೇಳಿದ್ದಾರೆ. ನನ್ನ ಮಾತು ಕೇಳಿ.ಇದನ್ನ ಜೀವನದಲ್ಲಿ ಪ್ರಾಕ್ಟಿಸ್​ ಮಾಡಿ, ಉದ್ಧಾರ ಆಗೆ ಆಗ್ತೀರ. ನಾನ್ ಹೇಳೊದು ನಿಮ್ಮ ಒಳ್ಳಯದಕ್ಕೆ! #Isupportyoga not ಕೆಲಸಕ್ಕೆ ಬಾರದ ತುಕಾಲಿ ಚಾಲೆಂಜ್. ಇಂತ ಚಾಲೆಂಜ್​ ಹುಟ್ಟಿಹಾಕಿರುವ ಹಿಂದಿ ಸ್ಟಾರ್​​​​ಗೆ ಮೊದ್ಲು ತಲೆಮೇಲೆ ಹೊಡಿಬೇಕು ಎಂದಿದ್ದಾರೆ ಒಳ್ಳೆಯ ಹುಡ್ಗ ಪ್ರಥಮ್.

ಇನ್ನು ಈಗಾಗಲೇ ಬಾಲಿವುಡ್​ ನಟ ಅಕ್ಷಯ್ ಕುಮಾರ್​, ಹಾಲಿವುಡ್​ ನಟರು, ಸ್ಯಾಂಡಲ್​​​ವುಡ್​ನ ಕೆಲ ನಟ-ನಟಿಯರು ಈ ಚಾಲೆಂಜ್ ಮಾಡಿದ್ದಾರೆ.