ನಂಬೋದಿದ್ರೆ ನಂಬಿ, ಇಲ್ಲದಿದ್ದರೆ ಸುಮ್ನಿರಿ : ನಟಿ ಜೈರಾ ವಾಸಿಂ

ನನ್ನ ಯಾವುದೇ ಸೋಷಿಯಲ್ ಅಕೌಂಟ್​​ಗಳು ಹ್ಯಾಕ್​ ಆಗಿಲ್ಲ. ಸ್ವತಃ ನಾನೇ ಅವುಗಳನ್ನು ನಿಭಾಯಿಸುತ್ತಿದ್ದೇನೆ ಎಂದು ಬಾಲಿವುಡ್​ ನಟಿ ಜೈರಾ ವಾಸಿಂ ಸ್ಪಷ್ಟನೆ ನೀಡಿದ್ದಾರೆ.

ದಂಗಲ್ ಚಿತ್ರದ ಮೂಲಕ ಬಾಲಿವುಡ್​​ಗೆ ಪ್ರವೇಶಿಸಿದ ಈ ಚೆಲುವೆ, ಐದು ವರ್ಷಗಳ ನಂತರ ಸಿನಿರಂಗದಿಂದ ವಿಮುಖಗೊಂಡಿದ್ದಾರೆ. ಕೈತುಂಬ ಅವಕಾಶಗಳು ಇರುವಾಗಲೇ ಅಭಿನಯಕ್ಕೆ ಬೈ ಬೈ ಹೇಳಿ ಹೊರನಡೆದಿದ್ದಾರೆ. ತಮ್ಮ ಈ ದಿಢೀರ್ ತೀರ್ಮಾನಕ್ಕೆ ಧರ್ಮದ ಕಾರಣ ಹೇಳಿರುವ ಅವರು, ಇನ್ಮುಂದೆ ನಾನು ನಟನೆಯಲ್ಲಿ ಮುಂದುವರೆಯುವುದಿಲ್ಲ ಎಂದು ಇನ್​ಸ್ಟಾಗ್ರಾ, ಟ್ವಿಟರ್​ನಲ್ಲಿ ಹೇಳಿಕೊಂಡಿದ್ದಾರೆ.

ಚೊಚ್ಚಲ ಚಿತ್ರದಲ್ಲೇ ಪ್ರಶಸ್ತಿ ಪಡೆದುಕೊಂಡು, ಬಾಲಿವುಡ್​​ನಲ್ಲಿ ಭದ್ರ ನೆಲೆಕಂಡುಕೊಂಡ ಈ ನಟಿಯ ನಡೆ ಸಾಕಷ್ಟು ಜನರಿಗೆ ಅಚ್ಚರಿ ಮೂಡಿಸಿದೆ. ಇದರ ಬೆನ್ನಲ್ಲೇ ಇವರ ಸೋಷಿಯಲ್ ಮೀಡಿಯಾ ಅಕೌಂಟ್​ಗಳು ಹ್ಯಾಕ್ ಆಗಿರಬಹುದು. ಈ ಪೋಸ್ಟ್ ಅವರು ಹಾಕಿಲ್ಲ ಎನ್ನುವ ಮಾತುಗಳು ಸಹ ಕೇಳಿ ಬಂದಿದ್ದವು. ಇದೀಗ ತಮ್ಮ ತೀರ್ಮಾನಕ್ಕೆ ನಾನು ಬದ್ಧ ಎಂದು ಹೇಳಿರುವ ಜಹೀರಾ, ನನ್ನ ಯಾವ ಅಕೌಂಟ್​​ಗಳೂ ಹ್ಯಾಕ್ ಆಗಿಲ್ಲ. ಆ ಪೋಸ್ಟ್​ ನಾನೇ ಹಾಕಿದ್ದು, ನಂಬುವುದಿದ್ದರೆ ನಂಬಿ, ಇಲ್ಲದಿದ್ದರೆ ಈ ವಿಷಯದಿಂದ ದೂರವಿರಿ ಎಂದು ಟ್ವೀಟ್​​ ಮಾಡಿದ್ದಾರೆ. ​