ಯಾವುದೇ ಸಿನಿಮಾಗೆ ಕಮಿಟ್ ಆದ ನಂತರ ಆ ಪಾತ್ರಕ್ಕೆ ನಟ-ನಟಿಯರು ಸಾಕಷ್ಟು ಹೋಂವರ್ಕ್ ಮಾಡಬೇಕಿರುತ್ತದೆ. ತೂಕ ಹೆಚ್ಚಿಸಿಕೊಳ್ಳುವುದು, ಸ್ಲಿಮ್ ಆಗುವುದು ಸುಲಭದ ಮಾತಲ್ಲ. ಹಾಗೆ ಮತ್ತೆ ಕೆಲವೊಂದು ಪಾತ್ರಗಳಿಗೆ ಗಂಟೆಗಟ್ಟಲೆ ವಿಭಿನ್ನ ಮೇಕಪ್ನೊಂದಿಗೆ ಕೂರುವುದು ನಿಜಕ್ಕೂ ಕಷ್ಟ.
ಪಾತ್ರಕ್ಕಾಗಿ ಇಷ್ಟೊಂದು ಪರಿಶ್ರಮ! ಯಾರೀ ಸ್ಟಾರ್ನಟಿ, ಯಾವ ಸಿನಿಮಾ?
ತಮಿಳುನಾಡು ಮಾಜಿ ಮುಖ್ಯಮಂತ್ರಿ ದಿ. ಜಯಲಲಿತಾ ಅವರ ಜೀವನಚರಿತ್ರಾಧಾರಿತ 'ತಲೈವಿ' ಸಿನಿಮಾದಲ್ಲಿ ಜಯಲಲಿತಾ ಪಾತ್ರದಲ್ಲಿ ಕಂಗನಾ ನಟಿಸುತ್ತಿದ್ದಾರೆ. ಈ ಸಿನಿಮಾ ತಯಾರಿಗಾಗಿ ಸದ್ಯಕ್ಕೆ ಅವರು ಲಾಸ್ ಏಂಜಲೀಸ್ನಲ್ಲಿದ್ದು ಪ್ರೊಸ್ತಟಿಕ್ಸ್ ಗಮ್ ಮೇಕಪ್ಗಾಗಿ ಉಸಿರು ಬಿಗಿಹಿಡಿದು ಕುಳಿತಿರುವ ಪೋಟೋಗಳು ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿವೆ.
ಕಂಗನಾ ರಣಾವತ್
ತಾವು ಮಾಡುವ ಪಾತ್ರಕ್ಕಾಗಿ ಎಂತಹ ಕಷ್ಟವನ್ನಾದರೂ ಎದುರಿಸಬಲ್ಲೆ ಎನ್ನುವ ನಟಿಯರಲ್ಲಿ ಬಾಲಿವುಡ್ ನಟಿ ಕಂಗನಾ ರಣಾವತ್ ಕೂಡಾ ಒಬ್ಬರು. ತಮಿಳುನಾಡು ಮಾಜಿ ಮುಖ್ಯಮಂತ್ರಿ ದಿವಂಗತ ಜಯಲಲಿತಾ ಕುರಿತಾಗಿ ಬಹಳಷ್ಟು ಸಿನಿಮಾಗಳು ಬರುತ್ತಿವೆ. ಬಾಲಿವುಡ್ನಲ್ಲಿ ತಯಾರಾಗುತ್ತಿರುವ 'ತಲೈವಿ' ಸಿನಿಮಾದಲ್ಲಿ ಕಂಗನಾ ಪ್ರಮುಖ ಪಾತ್ರದಲ್ಲಿ ನಟಿಸುತ್ತಿದ್ದಾರೆ. ಕಂಗನಾ, ಜಯಲಲಿತಾ ಪಾತ್ರದಲ್ಲಿ ಹೇಗೆ ಕಾಣುತ್ತಾರೆ, ಅದರಲ್ಲೂ ಮಧ್ಯವಯಸ್ಸಿನ ಜಯಲಲಿತಾ ಆಗಿ ಹೇಗೆ ಕಾಣುತ್ತಾರೆ ಎಂಬ ಕುತೂಹಲ ಎಲ್ಲರಿಗೂ ಇದೆ. ಈ ಚಿತ್ರದ ತಯಾರಿಗಾಗಿ ಸದ್ಯಕ್ಕೆ ಅವರು ಅಮೆರಿಕದ ಲಾಸ್ ಏಂಜಲೀಸ್‌ಗೆ ತೆರಳಿದ್ದಾರೆ.
ಖ್ಯಾತ ಹಾಲಿವುಡ್ ಮೇಕಪ್ ಆರ್ಟಿಸ್ಟ್ ಜಾಸನ್ ಕೊಲಿನ್ಸ್ 'ತಲೈವಿ' ಸಿನಿಮಾಗಾಗಿ ಕೆಲಸ ಮಾಡುತ್ತಿದ್ದಾರೆ. 'ಬ್ಲೆಡ್ ರನ್ನರ್', 'ಕ್ಯಾಪ್ಟನ್ ಮಾರ್ವೆಲ್' ನಂತ ಪ್ರಮುಖ ಹಾಲಿವುಡ್ ಸಿನಿಮಾಗಳಿಗೆ ಜಾಸನ್ ಕೆಲಸ ಮಾಡಿದ್ದಾರೆ. ಸದ್ಯಕ್ಕೆ ಕಂಗನಾಗೆ ಪ್ರೊಸ್ತಟಿಕ್ಸ್ ಗಮ್ ಮೇಕಪ್ ಟೆಸ್ಟ್ ಜರುಗುತ್ತಿದೆ. ಈ ಪೋಟೋಗಳನ್ನು ಕಂಗನಾ ಸಹೋದರಿ ರಂಗೋಲಿ ತಮ್ಮ ಫೇಸ್ಬುಕ್ನಲ್ಲಿ ಶೇರ್ ಮಾಡಿಕೊಂಡಿದ್ದಾರೆ. 'ಇದು ಅಂತಹ ಸುಲಭ ಅಲ್ಲ, ಎಷ್ಟೇ ತೊಂದರೆ ಆದರೂ ಸ್ವಲ್ಪವೂ ಕದಲಂತೆ ಕೂರಬೇಕು' ಎಂದು ರಂಗೋಲಿ ಹೇಳಿಕೊಂಡಿದ್ದಾರೆ. ಈ ಚಿತ್ರಕ್ಕಾಗಿ ಕಂಗನಾ ಭರತನಾಟ್ಯದ ಜೊತೆಗೆ ತಮಿಳು ಭಾಷೆಯನ್ನೂ ಕಲಿಯುತ್ತಿದ್ದಾರಂತೆ. ತಮಿಳು ನಿರ್ದೇಶಕ ಎ.ಎಲ್. ವಿಜಯ್ ಈ ಸಿನಿಮಾವನ್ನು ನಿರ್ದೇಶಿಸುತ್ತಿದ್ದಾರೆ. ಹಿಂದಿ, ತಮಿಳು ಎರಡೂ ಭಾಷೆಗಳಲ್ಲೂ ಸಿನಿಮಾ ತಯಾರಾಗುತ್ತಿದೆ. ವಿಷ್ಣು ಇಂದೂರಿ ನಿರ್ಮಾಣದ ಈ ಸಿನಿಮಾ ದೀಪಾವಳಿ ನಂತರ ಸೆಟ್ಟೇರಲಿದೆ.