ನಟ ಸಂಜಯ್​ ದತ್ ಗುಣಮುಖ: ಆಸ್ಪತ್ರೆಯಿಂದ ಡಿಸ್ಚಾರ್ಜ್​

ಆಗಸ್ಟ್​ 8 ರಂದು ಎದೆನೋವು ಹಾಗೂ ಉಸಿರಾಟದ ತೊಂದರೆಯಿಂದ ಮುಂಬೈನ ಲೀಲಾವತಿ ಆಸ್ಪತ್ರೆಯಲ್ಲಿ ದಾಖಲಾಗಿದ್ದ ಬಾಲಿವುಡ್​ ನಟ ಸಂಜಯ್​ ದತ್ ಡಿಸ್ಚಾರ್ಜ್​ ಆಗಿದ್ದಾರೆ.

ಮುಂಬೈ: ಉಸಿರಾಟದ ತೊಂದರೆ ಹಾಗೂ ಎದೆನೋವಿನಿಂದ ಆಸ್ಪತ್ರೆಗೆ ದಾಖಲಾಗಿದ್ದ ಬಾಲಿವುಡ್​ ನಟ ಸಂಜಯ್​ ದತ್ ಗುಣಮುಖರಾಗಿ ಇಂದು ಆಸ್ಪತ್ರೆಯಿಂದ ಡಿಸ್ಚಾರ್ಜ್​ ಆಗಿದ್ದಾರೆ.

ಆಗಸ್ಟ್​ 8 ರಂದು ಮುಂಬೈನ ಲೀಲಾವತಿ ಆಸ್ಪತ್ರೆಯಲ್ಲಿ ಸಂಜಯ್​ ದತ್ ದಾಖಲಾಗಿದ್ದರು. ಇವರ ಕೋವಿಡ್​ ವರದಿ ಕೂಡ ನೆಗೆಟಿವ್​ ಬಂದಿತ್ತು. ದತ್ ಅವರ ಆರೋಗ್ಯ ಸ್ಥಿತಿ ಸ್ಥಿರವಾಗಿದೆ ಎಂದು ನಿನ್ನೆ ವೈದ್ಯರು ಹೇಳಿದ್ದರು. ಐಸಿಯುನಿಂದ ಜನರಲ್​ ವಾರ್ಡ್‌ಗೆ ಶಿಫ್ಟ್​ ಮಾಡಿದ ಒಂದು ದಿನದ ಬಳಿಕವೂ ಕೂಡ ನಟನ ಆರೋಗ್ಯದ ಮೇಲೆ ತೀವ್ರ ನಿಗಾ ವಹಿಸಲಾಗಿತ್ತು.

ಜುಲೈ 29 ರಂದು 61 ನೇ ವರ್ಷಕ್ಕೆ ಕಾಲಿಟ್ಟಿರುವ ಮುನ್ನಾಬಾಯ್​, ಸದ್ಯ ಪ್ರಶಾಂತ್​ ನೀಲ್​ ನಿರ್ದೇಶನದ 'ಕೆಜಿಎಫ್​​ ಚಾಪ್ಟರ್‌​-2ರಲ್ಲಿ 'ಅಧೀರ'ನ ಪಾತ್ರದಲ್ಲಿ ನಟಿಸುತ್ತಿದ್ದಾರೆ. ಇವರ ನಟನೆಯ ಮಹೇಶ್ ಭಟ್ ನಿರ್ದೇಶನದ ಸಡಕ್​-2 ಸಿನಿಮಾ ಆಗಸ್ಟ್ 28 ರಂದು ಒಟಿಟಿ ಫ್ಲಾಟ್​ಫಾರ್ಮ್​ನಲ್ಲಿ ರಿಲೀಸ್​ ಆಗಲಿದೆ.