ಕೊರೊನಾವನ್ನು ಗಂಭೀರವಾಗಿ ಪರಿಗಣಿಸಿ, ಕೇಂದ್ರ ಸರ್ಕಾರದ ನಿರ್ದೇಶನ ಪಾಲಿಸಿ: ಸಲ್ಮಾನ್​ ಖಾನ್​

ಪ್ರಧಾನಿ ಮೋದಿಯ ಜನತಾ ಕರ್ಫ್ಯೂಗೆ ಬಾಲಿವುಡ್​ನ ಅನೇಕ ಕಲಾವಿದರು ಬೆಂಬಲ ಸೂಚಿಸಿದ್ದಾರೆ. ಈಗ ಸಲ್ಮಾನ್​ ಖಾನ್​ ಕೂಡಾ ಬೆಂಬಲ ಸೂಚಿಸಿದ್ದು ಯಾವುದೇ ಕಾರಣಕ್ಕೂ ಸರ್ಕಾರ ಸೂಚಿಸಿರುವ ನಿಯಮಗಳನ್ನು ಉಲ್ಲಂಘಿಸಬಾರದೆಂದು ಮನವಿ ಮಾಡಿದ್ದಾರೆ.

ಮುಂಬೈ: ಕೊರೊನಾ ಸೋಂಕನ್ನು ತುಂಬಾ ಗಂಭೀರವಾಗಿ ತೆಗೆದುಕೊಳ್ಳುವಂತೆ ಹಾಗೂ ಕೇಂದ್ರ ಸರ್ಕಾರ ಸೂಚಿಸಿರುವ ನಿಯಮಗಳನ್ನು ಪಾಲಿಸಿ ಸಾಮಾಜಿಕ ಅಂತರವನ್ನು ಕಾಪಾಡಿಕೊಳ್ಳುವಂತೆ ಬಾಲಿವುಡ್​ ನಟ ಸಲ್ಮಾನ್​ ಖಾನ್​ ತನ್ನ ಅಭಿಮಾನಿಗಳಿಗೆ ಮನವಿ ಮಾಡಿದ್ದಾರೆ.

ಇನ್​ಸ್ಟಾಗ್ರಾಂ ವಿಡಿಯೋವನ್ನು ಹರಿಬಿಟ್ಟಿರುವ ಸಲ್ಮಾನ್​ ಖಾನ್​ ''ಕೊರೊನಾ ಸೋಂಕಿನ ಕುರಿತು ವದಂತಿಗಳನ್ನು ಹಬ್ಬಿಸಬೇಡಿ. ಈ ವದಂತಿಗಳು ಎಲ್ಲರಿಗೂ ಸಮಸ್ಯೆಯಾಗುತ್ತವೆ. ಯಾರಿಗೆ ಬೇಕಾದರೂ ವೈರಸ್​ ಸೋಂಕುನ ತಗುಲಬಹುದು. ಬಸ್​, ರೈಲು, ಮಾರುಕಟ್ಟೆ ಸ್ಥಳಗಳಲ್ಲಿ ಈ ಸೋಂಕು ಹರಡಬಹುದು. ಆದರಿಂದ ಯಾವುದೇ ರಿಸ್ಕ್​ ತೆಗೆದುಕೊಳ್ಳಬೇಡಿ. ಮನೆಯಲ್ಲಿಯೇ ಇದ್ದು ಸೋಂಕಿನಿಂದ ಕಾಪಾಡಿಕೊಳ್ಳಿ'' ಎಂದಿದ್ದಾರೆ.

ಇದರ ಜೊತೆಗೆ ಮನೆಯಲ್ಲಿರಿ ಎಂದರೆ ರಜಾ ದಿನ ಎಂಬ ಅರ್ಥವಿಲ್ಲ, ತಾವೂ ಸುರಕ್ಷಿತವಾಗಿದ್ದು ಬೇರೆಯವರನ್ನೂ ಸುರಕ್ಷಿತವಾಗಿಡಿ. ಮಾಸ್ಕ್​ ಧರಿಸಿ, ನಿಯಮಿತವಾಗಿ ಕೈತೊಳೆಯಿರಿ, ಸ್ವಚ್ಛವಾಗಿರಿ ಎಂದಿದ್ದಾರೆ. 14 ಗಂಟೆಗಳ ಕಾಲ ಪ್ರಧಾನಿ ಮೋದಿ ನೀಡಿರುವ ಜನತಾ ಕರ್ಫ್ಯೂ ಎಲ್ಲರೂ ಸಹಕರಿಸಬೇಕೆಂದು ಮನವಿ ಮಾಡಿದ್ದಾರೆ. ಈ ಹಿಂದೆ ಬಾಲಿವುಡ್​ನ ಹಲವು ಕಲಾವಿದರು ಪ್ರಧಾನಿಯ ಜನತಾ ಕರ್ಫ್ಯೂಗೆ ಬೆಂಬಲ ವ್ಯಕ್ತಪಡಿಸಿದ್ದರು. ಈಗ ಸಲ್ಮಾನ್​ ಖಾನ್​ ಕೂಡಾ ಮೋದಿ ನಡೆಗೆ ಬೆಂಬಲ ವ್ಯಕ್ತಪಡಿಸಿದ್ದಾರೆ.