ಕೆಲವು ದಿನಗಳ ಹಿಂದೆ ದೇಶದಲ್ಲಿ ದೊಡ್ಡ ಸುದ್ದಿಯಾಗಿದ್ದ ವಿವಾದಾತ್ಮಕ 'ಬಾಯ್ಸ್ ಲಾಕರ್ ರೂಮ್' ಚರ್ಚೆ ನಂತರ ಇದೀಗ 'ಗರ್ಲ್ಸ್ ಲಾಕರ್ ರೂಮ್' ಟ್ರೆಂಡಿಂಗ್ ವಿಷಯವಾಗಿದೆ. ಇಂಟರ್ನೆಟ್ನಲ್ಲಿ ಇದೀಗ ಇದೇ ವಿಚಾರ ಹರಿದಾಡುತ್ತಿದ್ದು ಈ ಬಗ್ಗೆ ಬಾಲಿವುಡ್ ನಟಿ ಸ್ವರಾ ಭಾಸ್ಕರ್ ಕಳವಳ ವ್ಯಕ್ತಪಡಿಸಿದ್ದಾರೆ.
ಕೆಲವು ದಿನಗಳ ಹಿಂದೆ ಟ್ವಿಟ್ಟರ್ ಯೂಸರ್ ಒಬ್ಬರು ಇನ್ಸ್ಟಾಗ್ರಾಮ್ನಲ್ಲಿ ಬಾಯ್ಸ್ ಲಾಕರ್ ರೂಮ್ ಗುಂಪಿನ ಸದಸ್ಯರು ಚಾಟ್ ಮಾಡಿದ್ದ ಸ್ಕ್ರೀನ್ಶಾಟ್ವೊಂದನ್ನು ತಮ್ಮ ಟ್ವಿಟ್ಟರ್ನಲ್ಲಿ ಹಂಚಿಕೊಂಡಿದ್ದರು. ಈ ಚಾಟ್ನಲ್ಲಿ ಯುವತಿಯರ ಕೆಲವೊಂದು ಅಶ್ಲೀಲ ಪೋಟೋಗಳನ್ನು ಷೇರ್ ಮಾಡಿದ್ದು, ಸಾಮೂಹಿಕ ಅತ್ಯಾಚಾರದ ಬಗ್ಗೆ ಚರ್ಚಿಸಲಾಗಿತ್ತು. ಈ ಗ್ರೂಪ್ನಲ್ಲಿ ಸುಮಾರು 20 ಯುವಕರಿದ್ದು ಎಲ್ಲರೂ 12-18 ವರ್ಷ ವಯಸ್ಸಿನವರು ಎಂದು ಈ ಟ್ವಿಟ್ಟರ್ ಯೂಸರ್ ಬಾಯ್ಸ್ ಲಾಕರ್ ರೂಮ್ ಬಗ್ಗೆ ಆಘಾತಕಾರಿ ಅಂಶವನ್ನು ಬಹಿರಂಗಗೊಳಿಸಿದ್ದರು.
ಕೆಲವು ದಿನಗಳ ಹಿಂದೆ ಬಾಲಿವುಡ್ ನಟಿ ಸ್ವರಾ ಭಾಸ್ಕರ್ ಈ ವಿಚಾರವಾಗಿ ತಮ್ಮ ಟ್ವಿಟ್ಟರ್ನಲ್ಲಿ ಪ್ರತಿಕ್ರಿಯಿಸಿದ್ದರು. 'ಪೋಷಕರು ಹಾಗೂ ಶಿಕ್ಷಕರು ತಮ್ಮ ಮಕ್ಕಳಿಗೆ ಈ ವಿಚಾರವಾಗಿ ತಿಳಿಹೇಳಬೇಕು. ಅತ್ಯಾಚಾರಿಗಳನ್ನು ಗಲ್ಲಿಗೇರಿಸಿದರೆ ಸಾಲದು, ಅತ್ಯಾಚಾರಿಗಳನ್ನು ಹುಟ್ಟುಹಾಕುವ ವಿಕೃತ ಮನಸ್ಸುಗಳನ್ನು ನಾವು ನಾಶ ಮಾಡಬೇಕು' ಎಂದು ಟ್ವೀಟ್ ಮಾಡಿದ್ದರು.
ಆದರೆ ಇದೀಗ ಗರ್ಲ್ಸ್ ಲಾಕರ್ ರೂಮ್ ಕೂಡಾ ಚರ್ಚೆಯ ವಿಚಾರವಾಗಿದ್ದು ಬಾಯ್ಸ್ ಲಾಕರ್ ರೂಮ್ನಲ್ಲಿ ಯುವಕರ ಗುಂಪು ಯುವತಿಯರ ಬಗ್ಗೆ ಹೇಗೆ ಚರ್ಚಿಸುತ್ತಾರೋ, ಅದೇ ರೀತಿ ಗರ್ಲ್ಸ್ ಲಾಕರ್ ರೂಮ್ನಲ್ಲಿ ಯುವತಿಯರ ಗುಂಪು ಕೂಡಾ ಯುವಕರ ಬಗ್ಗೆ ಚಾಟ್ ಮೂಲಕ ಚರ್ಚಿಸಲು ಆರಂಭಿಸಿದ್ದಾರೆ. ಈ ಬಗ್ಗೆ ಸ್ವರಾ ಭಾಸ್ಕರ್ ಟ್ರೋಲ್ಗೆ ಒಳಗಾಗಿದ್ದಾರೆ. ಯುವತಿಯರು ಚಾಟ್ ಮಾಡಿರುವ ಕೆಲವೊಂದು ಸ್ಕ್ರೀನ್ಶಾಟ್ಗಳನ್ನು ಟ್ರೋಲರ್, ಸ್ವರಾ ಭಾಸ್ಕರ್ ಅವರಿಗೆ ಟ್ಯಾಗ್ ಮಾಡಿ ಈ ಬಗ್ಗೆ ಕೂಡಾ ಅಭಿಪ್ರಾಯ ವ್ಯಕ್ತಪಡಿಸುವಂತೆ ಕೇಳಿದ್ದಾರೆ. ಇದನ್ನು ನೋಡಿ ಸ್ವರಾ ಭಾಸ್ಕರ್ ಶಾಕ್ ಆಗಿದ್ದಾರೆ. ಯುವಜನತೆಯ ಮನಸ್ಥಿತಿ ಬಗ್ಗೆ ಕಳವಳ ವ್ಯಕ್ತಪಡಿಸಿದ್ಧಾರೆ.
ಈ ನಡುವೆ ದೆಹಲಿ ಸೈಬರ್ ಸೆಲ್, ಬಾಯ್ಸ್ ಲಾಕರ್ ರೂಮ್ ಗ್ರೂಪ್ ಅಡ್ಮಿನ್ ಒಬ್ಬನನ್ನು ಬಂಧಿಸಿದ್ದಾರೆ. ಬಂಧಿತ, ದಕ್ಷಿಣ ದೆಹಲಿಯ ಶಾಲೆಯ 15 ವರ್ಷದ ವಿದ್ಯಾರ್ಥಿ ಎನ್ನಲಾಗಿದೆ. ನಾನು ಗ್ರೂಪ್ ಮಾತ್ರ ಮಾಡಿದ್ದೆ, ಗುಂಪಿನ ಸದಸ್ಯರ ನಂಬರ್ ವಿನ: ಅವರ ಬಗ್ಗೆ ಬೇರೆ ಯಾವ ಮಾಹಿತಿ ಕೂಡಾ ನನಗೆ ಗೊತ್ತಿಲ್ಲ ಎಂದು ಬಾಲಕ ಹೇಳಿರುವುದಾಗಿ ವಿಚಾರಣೆ ವೇಳೆ ತಿಳಿದುಬಂದಿದೆ. ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ಗುಂಪಿನ ಇತರ ಸದಸ್ಯರ ಹುಡುಕಾಟದಲ್ಲಿದ್ದಾರೆ.
