ಜೈಲಲ್ಲಿ ಪುತ್ರನ ಭೇಟಿ ಮುಗಿಸಿ ಬರ್ತಿದ್ದಂತೆ ಶಾರುಖ್‌ಗೆ ಎನ್‌ಸಿಬಿ ಬಿಸಿ; ವಿಚಾರಣೆಗೆ ಬರುವಂತೆ ಅನನ್ಯಾ ಪಾಂಡೆಗೂ ಸಮನ್ಸ್‌

ಬಾಲಿವುಡ್ ನಟ ಶಾರುಖ್ ಖಾನ್ ಮತ್ತು ನಟಿ ಅನನ್ಯಾ ಪಾಂಡೆ ಅವರ ಮುಂಬೈ ನಿವಾಸಗಳ ಮೇಲೆ ರಾಷ್ಟ್ರೀಯ ಮಾದಕ ವಸ್ತು ನಿಯಂತ್ರಣ ದಳ (ಎನ್​ಸಿಬಿ) ಅಧಿಕಾರಿಗಳು ಇಂದು ದಾಳಿ ನಡೆಸಿದ್ದಾರೆ.

ಮುಂಬೈ (ಮಹಾರಾಷ್ಟ್ರ):ಬಾಲಿವುಡ್​ ನಟ ಶಾರುಖ್​ ಖಾನ್ ತಮ್ಮ ಪುತ್ರ ಆರ್ಯನ್‌ ಖಾನ್‌ ಅವರನ್ನು ಆರ್ಥರ್‌ ರೋಡ್‌ ಜೈಲಲ್ಲಿ ಭೇಟಿ ಮಾಡಿ ಬರುತ್ತಿದ್ದಂತೆ ಅವರ​ ನಿವಾಸದ ಮೇಲೆ ಎನ್​ಸಿಬಿ ಅಧಿಕಾರಿಗಳು ದಾಳಿ ನಡೆಸಿದ್ದಾರೆ. ಇನ್ನೊಂದೆಡೆ, ನಟಿ ಅನನ್ಯಾ ಪಾಂಡೆ ಮನೆಯ ಮೇಲೂ ಅಧಿಕಾರಿಗಳು ದಾಳಿ ನಡೆಸಿದ್ದು, ವಿಚಾರಣೆಗೆ ಹಾಜರಾಗುವಂತೆ ಸಮನ್ಸ್‌ ನೀಡಿದ್ದಾರೆ.

ಶಾರುಖ್‌ ನಿವಾಸ ಮನ್ನತ್‌ನಲ್ಲಿ ಎನ್​ಸಿಬಿ ಅಧಿಕಾರಿಗಳು ದಾಖಲೆಗಳ ಪರಿಶೀಲನೆಯಲ್ಲಿ ತೊಡಗಿದ್ದಾರೆ ಎಂದು ತಿಳಿದುಬಂದಿದೆ. ಇನ್ನು ನಟಿ ಅನನ್ಯಾ ಪಾಂಡೆ ಅವರು ಆರ್ಯಖಾನ್​ ಜೊತೆ ವಾಟ್ಸಪ್​ ಚಾಟ್​ ಮಾಡಿದ್ದಾರೆ ಎಂದು ಹೇಳಲಾಗುತ್ತಿದ್ದು ಅಧಿಕಾರಿಗಳು ಈ ಬಗ್ಗೆ ಶೋಧ ಕಾರ್ಯ ನಡೆಸಿದ್ದಾರೆ.

ಇಂದು ಬೆಳಗ್ಗೆ ಅರ್ಥರ್​ ರೋಡ್​ನಲ್ಲಿರುವ ಜೈಲಿಗೆ ಆಗಮಿಸಿದ್ದ ಶಾರುಖ್​ ಖಾನ್​ ಮಗನನ್ನು ಭೇಟಿ ಮಾಡಿದ್ದರು. ಪುತ್ರನ ಭೇಟಿ ಮುಗಿಸಿ ಮನೆಗೆ ಬರುತ್ತಿದ್ದಂತೆ ಎನ್‌ಸಿಬಿ ಅಧಿಕಾರಿಗಳು ಶಾರುಖ್‌ ಖಾನ್​ಗೆ ಶಾಕ್​ ನೀಡಿದ್ದಾರೆ.

ಕ್ರೂಸ್​​ನಲ್ಲಿ ಡ್ರಗ್ಸ್​ ಪಾರ್ಟಿ ಮಾಡಿರುವ ಹಿನ್ನೆಲೆ ಅ.3 ರಂದು ಆರ್ಯನ್‌ ಖಾನ್​ನನ್ನು ಎನ್​ಸಿಬಿ ಬಂಧಿಸಿತ್ತು. ಇದೀಗ ಅರ್ಥರ್​ ರೋಡ್​ ಜೈಲಿನಲ್ಲಿರುವ ಆರ್ಯನ್‌ ಖಾನ್ ಬುಧವಾರ ಜಾಮೀನಿಗಾಗಿ ಅರ್ಜಿ ಸಲ್ಲಿದ್ದರು. ಎನ್​ಡಿಪಿಎಸ್​ ವಿಶೇಷ ಕೋರ್ಟ್ ಅವರ ಜಾಮೀನು ಅರ್ಜಿಯನ್ನು ವಜಾಗೊಳಿಸಿದೆ.