ಕಂಗನಾ ರಣಾವತ್ ಉತ್ತಮ ನಟಿ ಮಾತ್ರವಲ್ಲ ನೇರ ನುಡಿಯ ವ್ಯಕ್ತಿತ್ವ ಹೊಂದಿದವರು. ಹೇಳಬೇಕೆಂದಿದ್ದನ್ನು ಥಟ್ ಅಂತ ಹೇಳಿಬಿಡುತ್ತಾರೆ. ಉದಾಹರಣೆಗೆ ಕಾಫಿ ವಿತ್ ಕರಣ್ ಕಾರ್ಯಕ್ರಮದಲ್ಲಿ ಸ್ವತ: ಕರಣ್ ಜೋಹರ್ ಕೇಳಿದ ಪ್ರಶ್ನೆಯೊಂದಕ್ಕೆ ಅವರೆಡೆಗೆ ಬೆರಳು ಮಾಡಿ ತೋರಿಸಿದ್ದರು ಕಂಗನಾ.
ಸುಶಾಂತ್ ಸಿಂಗ್ ರಜಪೂತ್ ಆತ್ಮಹತ್ಯೆ ನಂತರ ಬಾಲಿವುಡ್ ಸ್ವಜನ ಪಕ್ಷಪಾತದ ಬಗ್ಗೆ ಕಂಗನಾ ದನಿ ಎತ್ತಿದ್ದರು. ಇದೀಗ ತಾಪ್ಸಿ ಪನ್ನು ಹಾಗೂ ಕಂಗನಾ ರಣಾವತ್ ನಡುವಿನ ಯುದ್ಧದ ಬಗ್ಗೆ ಬಾಲಿವುಡ್ನಲ್ಲಿ ಚರ್ಚೆ ನಡೆಯುತ್ತಿದೆ. ಈ ಬಗ್ಗೆ ಬಾಲಿವುಡ್ ನಿರ್ಮಾಪಕ, ನಿರ್ದೇಶಕ ಅನುರಾಗ್ ಕಶ್ಯಪ್ ಮಾತನಾಡಿದ್ದಾರೆ. ಕಂಗನಾ ಹಾಗೂ ತಾಪ್ಸಿ ನಡುವಿನ ಮನಸ್ತಾಪವನ್ನು ಬಗೆಹರಿಸಲು ನಾನು ಇಷ್ಟಪಡುತ್ತೇನೆ. ಆದರೆ ಕಂಗನಾಗೆ ನನ್ನ ಮೇಲೆ ಕೂಡಾ ಕೋಪ ಇದೆ. ರಣಾವತ್ ಅವರೊಂದಿಗೆ ನನಗೆ ಉತ್ತಮವಾದ ಸ್ನೇಹವಿತ್ತು. ಆದರೆ ಕೆಲವು ದಿನಗಳಿಂದ ಇಬ್ಬರ ನಡುವೆ ಸ್ವಲ್ಪ ಮನಸ್ತಾಪವಿದೆ. ಇದನ್ನು ಬಗೆಹರಿಸಿಕೊಳ್ಳಲು ನಾನು ಪ್ರಯತ್ನಿಸುತ್ತಿದ್ದೇನೆ ಎಂದು ಹೇಳಿದ್ದಾರೆ.
ಇತ್ತೀಚಿನ ಸಂದರ್ಶನದವೊಂದರಲ್ಲಿ ಈ ಬಗ್ಗೆ ಮಾತನಾಡಿದ ಅನುರಾಗ್ ಕಶ್ಯಪ್, 2018 ರಲ್ಲಿ 'ಮನ್ಮರ್ಜಿಯಾನ್' ಚಿತ್ರದ ಪ್ರಮೋಷನ್ ವೇಳೆ ವಾಹಿನಿಯೊಂದರ ಫನ್ ರೌಂಡ್ ಕಾರ್ಯಕ್ರಮದಲ್ಲಿ ತಾಪ್ಸಿ ಪನ್ನು ನೀಡಿದ್ದ ಉತ್ತರದಿಂದ ಕಂಗನಾ ಮನಸ್ಸಿಗೆ ಬಹಳ ನೋವಾಗಿತ್ತು. ಅದಕ್ಕೂ ಮುನ್ನ ಇಬ್ಬರು ಒಳ್ಳೆಯ ನಡುವೆ ಒಳ್ಳೆ ಸ್ನೇಹವಿತ್ತು. ಆದರೆ ಈ ಘಟನೆ ಆದಾಗಿನಿಂದ ಇವರ ನಡುವೆ ಕೂಡಾ ವೈಮನಸ್ಸು ಉಂಟಾಗಿದ್ದು ಅದನ್ನು ಬಗೆಹರಿಸಲು ಕೂಡಾ ನಾನು ಯತ್ನಿಸಿದ್ದೆ ಎಂದು ಅನುರಾಗ್ ಹೇಳಿಕೊಂಡಿದ್ದಾರೆ.