ಒಂದೇ ಒಂದು ಹಾಡಿನ ಮೂಲಕ ಸಾಮಾಜಿಕ ಜಾಲತಾಣದಲ್ಲಿ ಇತ್ತೀಚೆಗೆ ಸೆನ್ಸೇಶನ್ ಹುಟ್ಟುಹಾಕಿದ್ದ ರಾನು ಮೊಂಡಲ್ ಜೀವನಚರಿತ್ರೆ ಪರದೆ ಮೇಲೆ ಮೂಡಿ ಬರಲಿದೆಯಂತೆ. ಬಯೋಪಿಕ್ಗಳ ಹಿಂದೆ ಬಿದ್ದಿರುವ ಬಾಲಿವುಡ್ ಸಿನಿ ರಂಗ, ಇದೀಗ ರಾನು ಮೊಂಡಲ್ ಅವರ ಕಥೆಯನ್ನು ತೆರೆ ಮೇರೆ ತರಲಿದೆ ಅನ್ನೋ ಮಾತುಗಳು ಕೇಳಿ ಬರುತ್ತಿದೆ.
ನಿರ್ಮಾಪಕ ಹೃಷಿಕೇಶ್ ಮೊಂಡಲ್ ಅವರು ಈ ಬಯೋಪಿಕ್ ಮಾಡಲು ಸಿದ್ಧತೆ ನಡೆಸಿದ್ದಾರಂತೆ. ರಾನು ಪಾತ್ರವನ್ನು ರಾಷ್ಟ್ರೀಯ ಪ್ರಶಸ್ತಿ ಪುರಸ್ಕೃತರಾದ ಬಂಗಾಳಿ ನಟಿ ಸುದೀಪ್ತಾ ಚಕ್ರವರ್ತಿಯನ್ನು ಸಂಪರ್ಕಿಸಲಾಗಿದೆಯಂತೆ.
ಈ ಬಗ್ಗೆ ನಟಿ ಸುದೀಪ್ತಾ ಚಕ್ರವರ್ತಿ ಸಹ ಸ್ಪಷ್ಟನೆ ನೀಡಿದ್ದಾರೆ. ನನಗೆ ಈ ಸದಾವಕಾಶ ಹುಡುಕಿಕೊಂಡು ಬಂದಿದ್ದು ನಿಜ. ಆದರೆ, ನಾನಿನ್ನೂ ಸ್ಕ್ರಿಪ್ಟ್ ಓದಿಲ್ಲ. ಓದಿದ ನಂತರವೇ ನನ್ನ ನಿರ್ಧಾರ ತಿಳಿಸುತ್ತೇನೆ ಎಂದಿದ್ದಾರೆ.
ಮತ್ತೊಂದೆಡೆ ಒಂದೇ ಹಾಡಿನ ಮೂಲಕ ಸ್ಟಾರ್ ಆದ ಈ ಬಡ ಗಾಯಕಿಯ ಬಯೋಪಿಕ್ ತರಲು ಇದು ಸೂಕ್ತ ಸಮಯ ಎಂದಿದ್ದಾರೆ ನಿರ್ಮಾಪಕ ಹೃಷಿಕೇಶ್ ಮೊಂಡಲ್. ರಾನು ಮೊಂಡಲ್ ಅವರ ತವರೂರಾದ ರಾಣಾ ಘಾಟ್, ಮುಂಬೈ ಮತ್ತು ಕೋಲ್ಕತ್ತಾದಲ್ಲಿ ಚಿತ್ರೀಕರಣ ನಡೆಸಲಾಗುತ್ತದೆಯಂತೆ. ಚಿತ್ರ ಮುಂದಿನ ವರ್ಷ ಫೆಬ್ರವರಿಯಲ್ಲಿ ಬಿಡುಗಡೆಯಾಗುವ ನಿರೀಕ್ಷೆಯಿದೆ.
