ಬಾಲಿವುಡ್ 'ಲಕ್ಷ್ಮಿಬಾಂಬ್' ಸಿನಿಮಾದ ಅಕ್ಷಯ್ ಕುಮಾರ್ ಮಂಗಳಮುಖಿ ಲುಕ್ ರಿವೀಲ್ ಆಗಿದೆ. ಸ್ವತ: ಅಕ್ಷಯ್ ಕುಮಾರ್ ತಮ್ಮ ಟ್ವಿಟ್ಟರ್ನಲ್ಲಿ ಈ ಫೋಟೋ ಹಂಚಿಕೊಂಡಿದ್ದಾರೆ. ರಾಘವ ಲಾರೆನ್ಸ್ ನಿರ್ದೇಶಿಸಿ ಅಭಿನಯಿಸಿದ್ದ ತಮಿಳಿನ 'ಕಾಂಚನ' ಸಿನಿಮಾದ ರಿಮೇಕ್ ಇದು.
'ನವರಾತ್ರಿಯ ಶುಭದಿನದ ಅಂಗವಾಗಿ ನಾನು ಸಿನಿಮಾದ ಈ ಲುಕ್ ರಿವೀಲ್ ಮಾಡಿದ್ದೇನೆ. ನಾನೂ ಕೂಡಾ ಸಿನಿಮಾ ಬಿಡುಗಡೆಗೆ ಕಾಯುತ್ತಿದ್ದು ಬಹಳ ಎಕ್ಸೈಟ್ ಆಗಿದ್ದೇನೆ ' ಎಂದು ಅಕ್ಷಯ್ ಕುಮಾರ್ ಹೇಳಿಕೊಂಡಿದ್ದಾರೆ.
ಈ ಫೋಟೋದಲ್ಲಿ ಅಕ್ಷಯ್ ಕುಮಾರ್ ಕೆಂಪು ಸೀರೆ ಧರಿಸಿ ಹಣೆಗೆ ಕಾಸಗಲ ಕುಂಕುಮವಿಟ್ಟು, ಕೈಯ್ಯಲ್ಲಿ ಬಳೆ ತೊಟ್ಟು ಆಕ್ರೋಶಭರಿತರಾಗಿ ನಿಂತಿದ್ದಾರೆ. ಅಕ್ಷಯ್ ಹಿಂದೆ ಅಸುರನನ್ನು ಸಂಹಾರ ಮಾಡುತ್ತಿರುವ ದುರ್ಗಾಮಾತೆಯ ವಿಗ್ರಹ ಇದೆ. ತನ್ನ ಜೀವನವನ್ನು ನಾಶ ಮಾಡಿದವರ ವಿರುದ್ಧ ಸೇಡು ತೀರಿಸಿಕೊಳ್ಳುವ ಮಂಗಳಮುಖಿ ಆತ್ಮದ ಕಥೆಯನ್ನು ಸಿನಿಮಾದಲ್ಲಿ ತೋರಿಸಲಾಗಿದೆ.
ಈ ಸಿನಿಮಾ ಕನ್ನಡದಲ್ಲಿ 'ಕಲ್ಪನ' ಹೆಸರಿನಲ್ಲಿ ರಿಮೇಕ್ ಆಗಿತ್ತು. ಉಪೇಂದ್ರ ಚಿತ್ರದ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದರು. ಹಿಂದಿಯ 'ಲಕ್ಷ್ಮಿಬಾಂಬ್' ಚಿತ್ರದಲ್ಲಿ ಅಕ್ಷಯ್ ಕುಮಾರ್ ಜೊತೆಗೆ ಕೈರಾ ಅಡ್ವಾಣಿ ನಟಿಸಿದ್ದಾರೆ. ಈ ಚಿತ್ರವನ್ನು ರಾಘವ ಲಾರೆನ್ಸ್ ಅವರೇ ನಿರ್ದೇಶಿಸುತ್ತಿದ್ದು ಈ ಮೂಲಕ ಅವರು ಬಾಲಿವುಡ್ಗೆ ನಿರ್ದೇಶಕನಾಗಿ ಎಂಟ್ರಿ ನೀಡಿದ್ದಾರೆ. ಚಿತ್ರಕ್ಕೆ ಅಕ್ಷಯ್ ಕುಮಾರ್, ಶಬೀನಾ ಖಾನ್, ತುಷಾರ್ ಕಪೂರ್ ಮೂವರೂ ಹಣ ಹೂಡಿದ್ದಾರೆ. ಮುಂದಿನ ವರ್ಷ ಲಕ್ಷ್ಮಿಬಾಂಬ್ ತೆರೆ ಮೇಲೆ ಸಿಡಿಯಲಿದೆ.