ಬಾಲಿವುಡ್ ನಟ ಅಮಿತಾಭ್ ಬಚ್ಚನ್ ಸಂಭಾವನೆ ಈಗ ಕೋಟಿ ರೂ.ಗಳು ಮುಟ್ಟಿವೆ. ಇಂದು ಸಿನಿ ಜೀವನದಲ್ಲಿ ಇಷ್ಟೆಲ್ಲ ಸಕ್ಸಸ್ ಕಂಡು ಗೆಲುವಿನ ಶಿಖರವೇರಿರುವ ಬಿಗ್ ಬಿ, ಒಂದು ಕಾಲದಲ್ಲಿ ಕಷ್ಟದ ಕೂಪದಲ್ಲಿ ಮುಳುಗಿದ್ದರು. ಈ ಸಂಕೋಲೆ ತೊಡೆದು ಚಿತ್ರರಂಗದಲ್ಲಿ 5 ದಶಕಗಳನ್ನು ಸವೆಸಿರುವ ಅಮಿತಾಭ್ ತಮ್ಮ ಕಷ್ಟದ ದಿನಗಳನ್ನು ಮೆಲುಕು ಹಾಕಿದ್ದಾರೆ.
ಬಿಟೌನ್ ಬಾದ್ ಷಾ ಶಾರೂಖ್ ಖಾನ್ ಅವರು ಬಿಗ್ಬಿ ಅವರನ್ನು ಸಂದರ್ಶಿಸಿರುವ ವಿಡಿಯೋವನ್ನು ರೆಡ್ ಚಿಲ್ಲೀಸ್ ಸಂಸ್ಥೆ ಟ್ವಿಟರ್ನಲ್ಲಿ ಹಂಚಿಕೊಂಡಿದೆ. ಈ ವಿಶೇಷ ಸಂದರ್ಶನಲ್ಲಿ ಸಾಕಷ್ಟು ಇಂಟ್ರೆಸ್ಟಿಂಗ್ ವಿಚಾರಗಳನ್ನು ಬಿಗ್ ಬಿ ರಿವೀಲ್ ಮಾಡಿದ್ದಾರೆ.
'1969ರಲ್ಲಿ ಕಲೆಯಲ್ಲೇ ಬದುಕು ರೂಪಿಸಿಕೊಳ್ಳಬೇಕೆಂದು ಊರು ತೊರೆದು ಮುಂಬೈಗೆ ಬಂದೆ. ನನ್ನ ಸ್ನೇಹಿತರು ಆಲ್ ಇಂಡಿಯಾ ರೇಡಿಯೋದಲ್ಲಿ ನ್ಯೂಸ್ ರೀಡರ್ ಆಗುವಂತೆ ಸಲಹೆ ನೀಡಿದರು. ಆದರೆ, ಧ್ವನಿ ಗಡುಸಾಗಿದೆ ಎಂಬ ಕಾರಣಕ್ಕೆ ಎಐಆರ್ ಇಂಗ್ಲಿಷ್ ವಿಭಾಗದಲ್ಲಿ ನಾನು ರಿಜೆಕ್ಟ್ ಆದೆ. ಹಿಂದಿಯಲ್ಲೂ ಕೂಡ ಟ್ರೈ ಮಾಡಿದೆ ಅಲ್ಲೂ ಸೆಲೆಕ್ಟ್ ಆಗಲಿಲ್ಲ. 1969ರಲ್ಲಿ ಅದೃಷ್ಟ ಹುಡುಕಿಕೊಂಡು ಬಂತು. 'ಸಾತ್ ಹಿಂದೂಸ್ಥಾನಿ' ಸಿನಿಮಾದಲ್ಲಿ ನಟಿಸಿದೆ. ಅದಕ್ಕೆ 5 ಸಾವಿರ ರೂಪಾಯಿ ಸಂಭಾವನೆ ಸಿಕ್ಕಿತು. ಈಗ ಕೋಟಿ ರೂ.ಗಳ ಸಂಭಾವನೆ ನನ್ನನ್ನು ಅರಸಿ ಬರುತ್ತಿದೆ. ಅದಕ್ಕೆ ನಾನು ಹಾಕಿದ ಪರಿಶ್ರಮವೇ ಕಾರಣ ಎಂದು ಬಿಗ್ ಬಿ ಹೇಳಿದ್ದಾರೆ.
ಇನ್ನು ಸದ್ಯ ಶಾರೂಖ್ ಒಡೆತನದ 'ರೆಡ್ ಚಿಲ್ಲೀಸ್ ' ಎಂಟರ್ಟ್ರೆನ್ಮೆಂಟ್ ಸಂಸ್ಥೆ ನಿರ್ಮಿಸುತ್ತಿರುವ 'ಬದ್ಲಾ' ಸಿನಿಮಾದಲ್ಲಿ ಶಾರೂಖ್ ಜತೆ ಅಮಿತಾಭ್ ಪ್ರಮುಖ ರೋಲ್ನಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ಇದು 'ದಿ ಇನ್ವಿಸಿಬಲ್ ಗೆಸ್ಟ್' ಎಂಬ ಸ್ಪ್ಯಾನಿಶ್ ಸಿನಿಮಾದ ರೀಮೇಕ್ ಆಗಿದೆ.