ಮೂರು ವರ್ಚುವಲ್ ರಿಯಾಲಿಟಿ ಗೇಮ್ಸ್​ ಸ್ಥಗಿತಗೊಳಿಸಿದ ಮೆಟಾ

ಮೆಟಾ ತನ್ನ ಮೂರು ವಿಆರ್ ಗೇಮ್​ಗಳನ್ನು ನಿಲ್ಲಿಸುವುದಾಗಿ ಘೋಷಿಸಿದೆ.

ಸ್ಯಾನ್ ಫ್ರಾನ್ಸಿಸ್ಕೋ :ಮೆಟಾ (ಈ ಹಿಂದೆ ಫೇಸ್​​ಬುಕ್) ತನ್ನ ಮೂರು ವರ್ಚುವಲ್ ರಿಯಾಲಿಟಿ (ವಿಆರ್) ಗೇಮ್​ಗಳಾದ ಡೆಡ್ ಆ್ಯಂಡ್ ಬರೀಡ್ (Dead and Buried), ಡೆಡ್ ಆ್ಯಂಡ್ ಬರೀಡ್ II (Dead and Buried II) ಮತ್ತು ಬೋಗೊ (Bogo) ಇವನ್ನು ಸ್ಥಗಿತಗೊಳಿಸುವುದಾಗಿ ತಿಳಿಸಿದೆ. ಆದರೆ ಈ ಗೇಮ್​ಗಳನ್ನು ಏಕಾಏಕಿ ಸ್ಥಗಿತಗೊಳಿಸುವುದರ ಹಿಂದಿನ ಕಾರಣವೇನು ಎಂಬುದನ್ನು ಮೆಟಾ ಹೇಳಿಲ್ಲ.

ಸದ್ಯ ಅಸ್ತಿತ್ವದಲ್ಲಿರುವ ಗೇಮ್ ಮಾಲೀಕರಿಗೆ ಮೆಟಾ ಇಮೇಲ್ ಕಳುಹಿಸಿದ್ದು, ಮಾರ್ಚ್ 15, 2024 ರಂದು ಮೂರೂ ಗೇಮ್​ಗಳ ಸಪೋರ್ಟ್​ ಅನ್ನು ನಿಲ್ಲಿಸಲಾಗುವುದು ಎಂದು ತಿಳಿಸಿದೆ. "ಮಾರ್ಚ್ 15, 2024 ರ ಶುಕ್ರವಾರದ ನಂತರ ಡೆಡ್ ಅಂಡ್ ಬರೀಡ್​​ ಆಡಲು ಲಭ್ಯವಿರುವುದಿಲ್ಲ ಎಂದು ಈ ಮೂಲಕ ನಾವು ನಿಮಗೆ ತಿಳಿಸುತ್ತಿದ್ದೇವೆ" ಎಂದು ಗೇಮ್ ಮಾಲೀಕರಿಗೆ ಕಳುಹಿಸಲಾದ ಸಂದೇಶದಲ್ಲಿ ತಿಳಿಸಲಾಗಿದೆ.

"ನಿಮ್ಮ ರಿಫ್ಟ್, ರಿಫ್ಟ್ ಎಸ್ ಅಥವಾ ಕ್ವೆಸ್ಟ್ (ಲಿಂಕ್ ಮೂಲಕ) ಸಾಧನಗಳಲ್ಲಿ ಆ ದಿನಾಂಕದಂದು ರಾತ್ರಿ 11.59 ರವರೆಗೆ ಘೋಸ್ಟ್​ಗಳನ್ನು ಬೇಟೆಯಾಡುವುದನ್ನು ಮುಂದುವರಿಸಬಹುದು" ಎಂದು ಅದು ಹೇಳಿದೆ. 2016 ರಲ್ಲಿ ಬಿಡುಗಡೆಯಾದ ಡೆಡ್ ಅಂಡ್ ಬರೀಡ್ ಗೇಮ್ ಕೋ-ಆಪ್, ಪಿವಿಪಿ ಮತ್ತು ಸಿಂಗಲ್-ಪ್ಲೇಯರ್ ಮೋಡ್​ಗಳನ್ನು ಒಳಗೊಂಡಂತೆ ರೂಮ್-ಸ್ಕೇಲ್ ಗೇಮ್​ ಪ್ಲೇಯೊಂದಿಗೆ ಪ್ರಯೋಗ ಮಾಡಿದ ಮೊದಲ ಮಲ್ಟಿಪ್ಲೇಯರ್ ವಿಆರ್ ಶೂಟರ್​ಗಳಲ್ಲಿ ಒಂದಾಗಿದೆ.

ಡೆಡ್ ಆ್ಯಂಡ್ ಬರೀಡ್ II ಅನ್ನು ಮೇ 2019 ರಲ್ಲಿ ಮೆಟಾದ ಆಂತರಿಕ ಗೇಮ್ ಅಭಿವೃದ್ಧಿ ಸ್ಟುಡಿಯೋ ಆಕ್ಯುಲಸ್ ಸ್ಟುಡಿಯೋಸ್ ಮೂಲ ಆಕ್ಯುಲಸ್ ಕ್ವೆಸ್ಟ್ ನ ಆರಂಭಿಕ ಗೇಮ್​ ಆಗಿ ಬಿಡುಗಡೆ ಮಾಡಲಾಗಿತ್ತು. 2019 ರಲ್ಲಿ ಬಿಡುಗಡೆಯಾದ ಉಚಿತ ಆಕ್ಯುಲಸ್ ಕ್ವೆಸ್ಟ್ ಬಿಡುಗಡೆ ಶೀರ್ಷಿಕೆಯಾದ ಬೋಗೊ, ಬಳಕೆದಾರರಿಗೆ ವರ್ಚುವಲ್ ಆಗಿ ಸಾಕುಪ್ರಾಣಿಗಳನ್ನು ಬೆಳೆಸಲು ಮತ್ತು ಮತ್ತು ಅವುಗಳನ್ನು ಆರೈಕೆ ಮಾಡಲು ಅನುವು ಮಾಡಿಕೊಡುತ್ತದೆ.

ವರ್ಚುವಲ್ ರಿಯಾಲಿಟಿ ಎಂಬುದು ಸಿಮ್ಯುಲೇಟೆಡ್ 3 ಡಿ ಪರಿಸರವಾಗಿದ್ದು, ಇದು ಬಳಕೆದಾರರಿಗೆ ವಾಸ್ತವದ ರೀತಿಯಲ್ಲಿಯೇ ವರ್ಚುವಲ್ ಪರಿಸರವನ್ನು ಅನ್ವೇಷಿಸಲು ಮತ್ತು ಸಂವಹನ ನಡೆಸಲು ಅನುವು ಮಾಡಿಕೊಡುತ್ತದೆ. ಇದರಲ್ಲಿ ಬಳಕೆದಾರರು ನಿರ್ದಿಷ್ಟ ಉದ್ದೇಶಕ್ಕಾಗಿ ನಿರ್ದಿಷ್ಟವಾಗಿ ವಿನ್ಯಾಸಗೊಳಿಸಲಾದ / ಸಿಮ್ಯುಲೇಟೆಡ್ ಪರಿಸರದಲ್ಲಿ ತಲ್ಲೀನರಾಗುತ್ತಾರೆ. ವಿಆರ್ ವರ್ಚುವಲ್, ಸಿಮ್ಯುಲೇಟೆಡ್ ಪರಿಸರವನ್ನು ಸೃಷ್ಟಿಸುತ್ತದೆ. ಇದರಲ್ಲಿ ಜನರು ವಿಆರ್ ಕನ್ನಡಕಗಳು ಅಥವಾ ಇತರ ಸಾಧನಗಳನ್ನು ಬಳಸಿಕೊಂಡು ಸಿಮ್ಯುಲೇಟೆಡ್ ಪರಿಸರದಲ್ಲಿ ಸಂವಹನ ನಡೆಸುತ್ತಾರೆ.

ಇದನ್ನೂ ಓದಿ : ಪಿಕ್ಸೆಲ್​ ವಾಚ್ ರಿಪೇರಿ ಮಾಡಲ್ಲ ಗೂಗಲ್; ಸರ್ವಿಸ್ ಸೆಂಟರೇ ಇಲ್ಲ ಎಂದ ಕಂಪನಿ!