ಬಾಹ್ಯಾಕಾಶಕ್ಕೆ ಹಾರಲಿದ್ದಾರೆ ಅಮೆಜಾನ್​ ಸಂಸ್ಥಾಪಕ ಜೆಫ್ ಬೆಜೋಸ್..! ಏನಿದು ಮಹಾ ಸಾಹಸ?

ನಾನು, ನನ್ನ ಸಹೋದರ ಮತ್ತು ಸದ್ಯ ನಡೆಯುತ್ತಿರುವ ಹರಾಜಿನ ವಿಜೇತರ ಜೊತೆ ಜುಲೈ 20 ರಂದು ಪ್ರಾರಂಭವಾಗಲಿರುವ ಬ್ಲೂ ಒರಿಜಿನ್ನ​ ಹೊಸ ಶೆಪರ್ಡ್ ಬಾಹ್ಯಾಕಾಶ ನೌಕೆಯ ಮೊದಲ ಪ್ರಯಾಣದಲ್ಲಿ ಬಾಹ್ಯಾಕಾಶಕ್ಕೆ ಪ್ರಯಾಣ ಬೆಳೆಸುವುದಾಗಿ ಅಮೆಜಾನ್ ಮತ್ತು ಬ್ಲೂ ಒರಿಜಿನ್‌ನ ಬಿಲಿಯನೇರ್ ಸಂಸ್ಥಾಪಕ ಜೆಫ್ ಬೆಜೋಸ್ ಸೋಮವಾರ ಹೇಳಿದ್ದಾರೆ.

ವಾಷಿಂಗ್ಟನ್: ಸಹೋದರ ಮಾರ್ಕ್ ಜೊತೆ ಜುಲೈ 20 ರಂದು ತನ್ನ ಕಂಪನಿ ಬ್ಲೂ ಒರಿಜಿನನ್​ನ ಪ್ರವಾಸೋದ್ಯಮ ರಾಕೆಟ್ ನ್ಯೂ ಶೆಪರ್ಡ್ ಮೂಲಕ ಬಾಹ್ಯಾಕಾಶದ ಅಂಚಿಗೆ ಹಾರಲಿದ್ದೇನೆ ಎಂದು ಅಮೆಜಾನ್ ಮತ್ತು ಬ್ಲೂ ಒರಿಜಿನ್‌ನ ಬಿಲಿಯನೇರ್ ಸಂಸ್ಥಾಪಕ ಜೆಫ್ ಬೆಜೋಸ್ ಸೋಮವಾರ ಹೇಳಿದ್ದಾರೆ.

ತನ್ನ ಕಂಪನಿಯ ಮೊದಲ ಸಬ್ ಆರ್ಬಿಟಲ್ ಸೈಟ್ ಸೀಯಿಂಗ್ ಪ್ರಯಾಣದಲ್ಲಿ ನಾನು ಮತ್ತು ಸಹೋದರ ಬಾಹ್ಯಾಕಾಶ ನೌಕೆ ನ್ಯೂ ಶೆಪರ್ಡ್‌ನ ಇಬ್ಬರು ಪ್ರಯಾಣಿಕರಾಗಿರುತ್ತೇವೆ ಎಂದು ಹೇಳಿದ್ದಾರೆ.

ಈ ಬಗ್ಗೆ ಇನ್‌ಸ್ಟಾಗ್ರಾಮ್ ಪೋಸ್ಟ್ ಮಾಡಿರುವ ಅವರು, ನಾನು, ನನ್ನ ಸಹೋದರ ಮತ್ತು ಸದ್ಯ ನಡೆಯುತ್ತಿರುವ ಹರಾಜಿನ ವಿಜೇತರ ಜೊತೆ ಜುಲೈ 20 ರಂದು ಪ್ರಾರಂಭವಾಗಲಿರುವ ಬ್ಲೂ ಒರಿಜಿನ್ ನ ಹೊಸ ಶೆಪರ್ಡ್ ಬಾಹ್ಯಾಕಾಶ ನೌಕೆಯ ಮೊದಲ ಪ್ರಯಾಣದಲ್ಲಿ ಬಾಹ್ಯಾಕಾಶಕ್ಕೆ ಪ್ರಯಾಣ ಬೆಳೆಸುವುದಾಗಿ ಹೇಳಿದ್ದಾರೆ.

"ನೀವು ಭೂಮಿಯನ್ನು ಬಾಹ್ಯಾಕಾಶದಿಂದ ನೋಡುತ್ತೀರಿ. ಆದರೆ ನಾನು ಅಲ್ಲಿಗೆ ಹೋಗಲು ಬಯಸುತ್ತೇನೆ. ಏಕೆಂದರೆ ಇದು ನನ್ನ ಜೀವನದ ಕನಸು. ಇದು ಒಂದು ಸಾಹಸ. ಇದು ನನಗೆ ದೊಡ್ಡ ವಿಷಯ"ಎಂದು ಅವರು ಹೇಳಿದ್ದಾರೆ.

ನ್ಯೂ ಶೆಪರ್ಡ್‌ ವಾಹನದಲ್ಲಿ ಆಸನಕ್ಕಾಗಿ ನಡೆಯುತ್ತಿರುವ ಹರಾಜು ಶನಿವಾರ ಕೊನೆಗೊಳ್ಳಲಿದೆ. ಇದೀಗ, ಬಿಡ್ಡಿಂಗ್ ಮೊತ್ತ 2.8 ಮಿಲಿಯನ್ ಡಾಲರ್‌ಗಳಷ್ಟಿದ್ದು, 143 ದೇಶಗಳಿಂದ ಸುಮಾರು 6,000 ಮಂದಿ ಇದರಲ್ಲಿ ಭಾಗವಹಿಸಿದ್ದಾರೆ. ಹರಾಜಿನಿಂದ ಬಂದ ಹಣವನ್ನು ಬ್ಲೂ ಆರಿಜಿನ್‌ನ ಫೌಂಡೇಶನ್ ಕ್ಲಬ್ ಫಾರ್ ದಿ ಫ್ಯೂಚರ್‌ಗೆ ದೇಣಿಗೆಯಾಗಿ ನೀಡಲಾಗುವುದು ಎಂದು ಈಗಾಗಲೇ ತಿಳಿಸಿದ್ದಾರೆ.

ನ್ಯೂ ಶೆಪರ್ಡ್ ತನ್ನ ಅನೇಕ ಅಗತ್ಯ ಸುರಕ್ಷತಾ ವ್ಯವಸ್ಥೆಗಳನ್ನು ಪರೀಕ್ಷಿಸಲು ಸತತ 15 ಯಶಸ್ವಿ ಕಾರ್ಯಾಚರಣೆಗಳನ್ನು ನಡೆಸಿದೆ.