ನ್ಯೂಯಾರ್ಕ್ :ಮಾನವನ ಬೆವರಿನಲ್ಲಿ ನಿರ್ದಿಷ್ಟ ಗ್ಲೂಕೋಸ್ ಮಟ್ಟವನ್ನು ಮೂರು ವಾರಗಳ ಕಾಲ ಪತ್ತೆಹಚ್ಚುವ ಮತ್ತು ಅದೇ ಸಮಯದಲ್ಲಿ ದೇಹದ ತಾಪಮಾನ ಮತ್ತು ಪಿಎಚ್ ಮಟ್ಟವನ್ನು ಮೇಲ್ವಿಚಾರಣೆ ಮಾಡುವ ಹೊಸ ಧರಿಸಬಹುದಾದ ಪ್ಯಾಚ್ ಒಂದನ್ನು ಸಂಶೋಧಕರ ತಂಡವು ತಯಾರಿಸಿದೆ. ಬೆವರಿನ ನಿರಂತರ ಮೇಲ್ವಿಚಾರಣೆಯು ದೇಹದ ಗ್ಲೂಕೋಸ್ ಮಟ್ಟಗಳಂತಹ ಮಾನವ ಆರೋಗ್ಯದ ಬಗ್ಗೆ ಅಮೂಲ್ಯವಾದ ಮಾಹಿತಿಯನ್ನು ಬಹಿರಂಗಪಡಿಸುತ್ತದೆ.
ಅಮೆರಿಕದ ಪೆನ್ ಸ್ಟೇಟ್ ಯೂನಿವರ್ಸಿಟಿಯ ಸಂಶೋಧಕರು ಲೇಸರ್-ಮಾರ್ಪಡಿಸಿದ ಗ್ರ್ಯಾಫೀನ್ ನ್ಯಾನೊಕಂಪೊಸೈಟ್ ವಸ್ತುವಿನೊಂದಿಗೆ ತಯಾರಿಸಲಾದ ಹೊಸ ಧರಿಸಬಹುದಾದ ಸಂವೇದಕವನ್ನು (wearable sensor) ರಚಿಸಿದ್ದಾರೆ.
"ನೈಜ ಸಮಯದಲ್ಲಿ, ನಿರಂತರವಾಗಿ ಮತ್ತು ದೇಹದ ಹೊರಗಿನಿಂದಲೇ ಬಯೋಮಾರ್ಕರ್ ಪತ್ತೆಗೆ ಬೆವರು ಸೂಕ್ತವಾಗಿದೆ. ಆದರೆ ಬೆವರಿನಲ್ಲಿ ಕಡಿಮೆ ಬಯೋಮಾರ್ಕರ್ ಸಾಂದ್ರತೆಯ ಮಟ್ಟಗಳು ಮತ್ತು ಪಿಎಚ್, ಲವಣಾಂಶ ಮತ್ತು ತಾಪಮಾನದಂತಹ ಇತರ ಅಂಶಗಳ ವ್ಯತ್ಯಾಸದಿಂದ ಈ ಹಿಂದೆ ತಯಾರಿಸಲಾದ ಬೆವರು ಬಯೋಸೆನ್ಸರ್ಗಳು ನಿಖರವಾಗಿ ಕೆಲಸ ಮಾಡುತ್ತಿರಲಿಲ್ಲ" ಎಂದು ಪ್ರಧಾನ ಸಂಶೋಧನಾ ವಿಜ್ಞಾನಿ ಹುವಾನ್ಯು ಲ್ಯಾರಿ ಚೆಂಗ್ ಹೇಳಿದರು.
"ಈಗ ತಯಾರಿಸಲಾದ ಹೊಸ ಸಾಧನವು ಗ್ಲೂಕೋಸ್ ಅನ್ನು ಒಂದು ಸಮಯದಲ್ಲಿ ವಾರಗಳವರೆಗೆ ಅಗತ್ಯ ಮಾನದಂಡಗಳೊಂದಿಗೆ ಲೆಕ್ಕಹಾಕಲು ಸಹಾಯ ಮಾಡುತ್ತದೆ" ಎಂದು ಚೆಂಗ್ ಅಡ್ವಾನ್ಸ್ಡ್ ಫಂಕ್ಷನಲ್ ಮೆಟೀರಿಯಲ್ಸ್ ಜರ್ನಲ್ನಲ್ಲಿ ಪ್ರಕಟವಾದ ಸಂಶೋಧನಾ ಪ್ರಬಂಧದಲ್ಲಿ ಉಲ್ಲೇಖಿಸಿದ್ದಾರೆ.
ವ್ಯಾಯಾಮ ಮತ್ತು ಆಹಾರ ಸೇವನೆಯಂಥ ಚಟುವಟಿಕೆಗಳಿಂದ ಬೆವರು, ಪಿಎಚ್ ಮತ್ತು ದೇಹದ ತಾಪಮಾನದಲ್ಲಿನ ಏರಿಳಿತಗಳ ಆಧಾರದ ಮೇಲೆ ಗ್ಲೂಕೋಸ್ ಮಟ್ಟಗಳನ್ನು ಅಳೆಯಲು ಹೊಸ ಸಾಧನ ಸೂಕ್ತವಾಗಿದೆ. ಸಾಮಾನ್ಯ ಅಂಚೆ ಚೀಟಿಯ ಸುಮಾರು ಎರಡು ಪಟ್ಟು ಅಗಲದ ಪ್ಯಾಚ್ ಆಗಿರುವ ಸಾಧನವನ್ನು ಮೈಮೇಲೆ ಧರಿಸಬಹುದು. ಇದನ್ನು ಅಂಟಿಕೊಳ್ಳುವ ಟೇಪ್ ನೊಂದಿಗೆ ಚರ್ಮಕ್ಕೆ ಅಂಟಿಸಲಾಗುತ್ತದೆ. ಇದು ಸಂಗ್ರಹಿಸಿದ ಡೇಟಾವನ್ನು ನೈಜ-ಸಮಯದ ಮೇಲ್ವಿಚಾರಣೆ ಮತ್ತು ವಿಶ್ಲೇಷಣೆಗಾಗಿ ಕಂಪ್ಯೂಟರ್ ಅಥವಾ ಮೊಬೈಲ್ ಸಾಧನಕ್ಕೆ ವೈರ್ ಲೆಸ್ ಆಗಿ ಕನೆಕ್ಟ್ ಮಾಡಬಹುದು.
"ನಾವು ತಯಾರಿಸಿರುವ ಸೆನ್ಸರ್ ಅನೇಕ ವಾರಗಳವರೆಗೆ ಗ್ಲುಕೋಸ್ ಮಟ್ಟವನ್ನು ಮೇಲ್ವಿಚಾರಣೆ ಮಾಡಲು ಗಮನಾರ್ಹ ನಿಖರತೆಯನ್ನು ಹೊಂದಿದೆ. ಇದು ವೈವಿಧ್ಯಮಯ ಪರಿಸ್ಥಿತಿಗಳಲ್ಲಿ ಬೆವರಿನ ಅನುಕೂಲಕರ, ನಿಖರ ಮತ್ತು ನಿರಂತರ ವಿಶ್ಲೇಷಣೆ ಮಾಡಬಲ್ಲ ಕಡಿಮೆ ವೆಚ್ಚದ ಸಾಧನವಾಗಿದೆ. ಇದು ವೈಯಕ್ತಿಕ ಮತ್ತು ಸಮುದಾಯದ ಆರೋಗ್ಯ ರಕ್ಷಣೆಯಲ್ಲಿ ಮಹತ್ವದ ಪಾತ್ರ ವಹಿಸಲಿದೆ" ಎಂದು ಚೆಂಗ್ ಹೇಳಿದರು.
ತೀರ್ಮಾನ:ವರ್ಕ್ ಫ್ರಂ ಹೋಮ್ ನಿಲ್ಲಿಸಿದ ಟಿಸಿಎಸ್; ಅ.1 ರಿಂದ ಕಚೇರಿಗೆ ಬರುವಂತೆ ಉದ್ಯೋಗಿಗಳಿಗೆ ಸೂಚನೆ
