ನವದೆಹಲಿ: ಸಮಾಜಘಾತುಕ ವ್ಯಕ್ತಿಗಳನ್ನು ಪತ್ತೆ ಮಾಡಲು ಭಾರತ ಸರ್ಕಾರವು ಅತ್ಯಾಧುನಿಕ ಫೇಸ್ ರಿಕಗ್ನಿಶನ್ ಸಿಸ್ಟಮ್ (ಮುಖ ಗುರುತಿಸುವಿಕೆ ವ್ಯವಸ್ಥೆ) ಒಂದನ್ನು ತಯಾರಿಸಿದೆ. ಮುಖ ಕಾಣಿಸುವ ಅಥವಾ ಮುಚ್ಚಿಕೊಂಡಿರುವ ಅಥವಾ ಮಾಸ್ಕ್ ಹಾಕಿರುವ ಅಥವಾ ಮಂಕಿ ಕ್ಯಾಪ್ ಹಾಕಿರುವ, ಕಡಿಮೆ ಬೆಳಕಿರುವ ನಿರ್ಬಂಧಿತ ಪ್ರದೇಶಗಳು ಹಾಗೂ ಸಾರ್ವಜನಿಕ ಪ್ರದೇಶಗಳಲ್ಲಿ ಸಮಾಜಗಾತುಕ ವ್ಯಕ್ತಿಗಳ ಮುಖವನ್ನು ಈ ತಂತ್ರಜ್ಞಾನ ಪತ್ತೆ ಮಾಡಲಿದೆ.
ರಕ್ಷಣಾ ಸಚಿವಾಲಯವು ತನ್ನ ಇತ್ತೀಚಿನ AI in Defence ಶೀರ್ಷಿಕೆಯ ವರದಿಯಲ್ಲಿ ಮಾರುವೇಷದಲ್ಲಿರುವವರ ಮುಖ ಗುರುತಿಸುವಿಕೆ ವ್ಯವಸ್ಥೆ (Face Recognition System under Disguise -FRSD) ತಂತ್ರಜ್ಞಾನದ ಬಗ್ಗೆ ತಿಳಿಸಿದೆ. ಇದನ್ನು ಮುಖ್ಯವಾಗಿ ಭಾರತೀಯ ಸೇನೆಗಾಗಿ ತಯಾರಿಸಲಾಗಿದೆ. AI in Defence ವರದಿಯಲ್ಲಿ ಇನ್ನೂ ಹಲವಾರು AI ಆಧರಿತ ವ್ಯವಸ್ಥೆಗಳ ಬಗ್ಗೆಯೂ ಹೇಳಲಾಗಿದೆ.
ಸರ್ವೇಲನ್ಸ್ ಕ್ಯಾಮೆರಾಗಳ ಮೂಲಕ ಕಾಡಿನಲ್ಲಿ ಮುಖ ಗುರುತಿಸುವಿಕೆ ಬಹಳ ಕಷ್ಟಕರ. ಕಾಡಿನಲ್ಲಿ ಸೆರೆಹಿಡಿಯಲಾದ ಚಿತ್ರಗಳು ಕಡಿಮೆ ಬೆಳಕಿನ ಕಾರಣದಿಂದ ಕಡಿಮೆ ರೆಲ್ಯೂಶನ್ ಹೊಂದಿರುತ್ತವೆ. ಅಲ್ಲದೇ ವ್ಯಕ್ತಿಗಳು ಮಾರುವೇಷದಲ್ಲಿದ್ದಾಗ, ಜನಜಂಗುಳಿಯಲ್ಲಿದ್ದಾಗ ಹಾಗೂ ಹಲವಾರು ಕಡೆಗಳಿಂದ ಬೆಳಕು ಬರುತ್ತಿರುವಾಗ ಸೆರೆಹಿಡಿದ ಚಿತ್ರಗಳಲ್ಲಿನ ವ್ಯಕ್ತಿಗಳ ಮುಖ ಗುರುತಿಸುವಾಗ ಈ ಸಮಸ್ಯೆ ಇನ್ನೂ ಹೆಚ್ಚಾಗುತ್ತದೆ.
ನೀವು ಏನೇ ಮಾಡಿದರೂ ಸಿಕ್ಕಿ ಬೀಳ್ತೀರಿ:ಫೇಸ್ ಮಾಸ್ಕ್, ಗಡ್ಡ ಬಿಡುವುದು, ಮೀಸೆ ಬೆಳೆಸುವುದು, ವಿಗ್ ಧರಿಸುವುದು, ಕನ್ನಡಕ ಧರಿಸುವುದು, ತಲೆಗೆ ಬಟ್ಟೆ ಕಟ್ಟುವುದು, ಮಂಕಿ ಕ್ಯಾಪ್ ಧರಿಸುವುದು, ಟೋಪಿ ಧರಿಸುವುದು ಮುಂತಾದ ಮಾರುವೇಷಗಳಲ್ಲಿರುವಾಗಲೂ ವ್ಯಕ್ತಿಯ ಮುಖ ಪತ್ತೆ ಮಾಡುವಂತೆ FRSD ಅಲ್ಗೋರಿದಮ್ ಅನ್ನು ತಯಾರಿಸಲಾಗಿದೆ ಎಂದು ರಕ್ಷಣಾ ಸಚಿವಾಲಯ ವರದಿಯಲ್ಲಿ ಹೇಳಲಾಗಿದೆ.