ಭೂಮಿಯ ಆಳದಲ್ಲಿದೆ 4.5 ಬಿಲಿಯನ್ ವರ್ಷಗಳ ಹಿಂದಿನ ರಾಸಾಯನಿಕ: ಅಧ್ಯಯನ

ಭೂಮಿಯ ಯಾವ ಜಾಗದಲ್ಲೂ ಸಿಗದ ವಿಶಿಷ್ಠ ಅಥವಾ ಅಪರೂಪದ ಅಥವಾ ಭಿನ್ನವಾದ ವಸ್ತುಗಳು ಭೂಮಿಯ ಒಳಗೆ ದೊರೆಯಬಹುದು ಎಂದು ಉತಾಹ್ ವಿಶ್ವವಿದ್ಯಾಲಯದ ವಿಜ್ಞಾನಿಗಳು ಅಭಿಪ್ರಾಯಪಟ್ಟಿದ್ದಾರೆ.

ಮಾನವನಿಗೆ ಎಲ್ಲವೂ ಕೌತುಕಮಯ. ಒಮ್ಮೊಮ್ಮೆ ತಾನಿರುವ ಪರಿಸರದಲ್ಲೇ ಅನೇಕ ಅಚ್ಚರಿಗಳನ್ನು ಕಂಡು ಬೆರಗಾಗುವ ಆತನಿಗೆ ಭೂಮಿಯ ಒಳಗೇನಿದೆ ಎಂಬ ಕುತೂಹಲ ಅನಾದಿಕಾಲದಿಂದಲೂ ಕಾಡುತ್ತಾ ಬಂದಿದೆ. ಆ ಕುತೂಹಲಕ್ಕೆ ಉತ್ತರ ಕಂಡು ಹಿಡಿಯಲು ಅನೇಕ ಪ್ರಯತ್ನಗಳನ್ನು ನಡೆಸಿಯೂ, ಕೆಲವೊಂದು 'ಅಂದಾಜುಗಳಲ್ಲೇ' ಸದ್ಯಕ್ಕೆ ಕುತೂಹಲವನ್ನು ತಣಿಸಿಕೊಳ್ಳುತ್ತಿದ್ದಾನೆ.

ಹೌದು, ಈಗ ಒಂದು ಹೊಸ ಸಂಶೋಧನೆ ನಡೆದಿದೆ. ಈ ಸಂಶೋಧನೆ ಭೂಮಿಯ ಆಳಕ್ಕೆ ಸಂಬಂಧಿಸಿದ್ದು. ಭೂಮಿಯು ಸೃಷ್ಟಿಯಾಗುವ ವೇಳೆಯಲ್ಲಿ ಅಂದರೆ ಸುಮಾರು 4.5 ಬಿಲಿಯನ್ ವರ್ಷಗಳ ಹಿಂದೆ ಇದ್ದ ಕೆಲವೊಂದು ರಾಸಾಯನಿಕ ವಸ್ತುಗಳು ಈಗಲೂ ಭೂಮಿಯ ಆಳದಲ್ಲಿರುವ ಸಾಧ್ಯತೆಯ ಬಗ್ಗೆ ಸಂಶೋಧನೆ ಬೆಳಕು ಚೆಲ್ಲುತ್ತದೆ.

ಈ ಸಂಶೋಧನಾ ವರದಿ ನೇಚರ್ ಜಿಯೋಸೈನ್ಸ್ (Nature Geoscience)​ ಎಂಬ ಸಂಶೋಧನಾ ಪತ್ರಿಕೆಯಲ್ಲಿ ಪ್ರಕಟವಾಗಿದೆ. ಅಮೆರಿಕದ ಉತಾಹ್ ವಿಶ್ವವಿದ್ಯಾಲಯ ಇಂಥದ್ದೊಂದು ಮಹತ್ವದ ಸಂಶೋಧನೆ ಕೈಗೆತ್ತಿಕೊಂಡಿತ್ತು.

ಉತಾಹ್ ವಿಶ್ವವಿದ್ಯಾಲಯದ ಸಂಶೋಧಕರು ಭೂಮಿಯ ಒಳಗಿನ ಸಂರಚನೆಯನ್ನು ಅರಿಯಲು ರೆಡಾರ್​​ಗಳನ್ನು ಬಳಕೆ ಮಾಡಿಕೊಂಡಿದ್ದಾರೆ. ಹಾಗೆಯೇ ಭೂಕಂಪನದ ಅಲೆಗಳನ್ನು ದಿಕ್ಕುಗಳನ್ನು ತಿಳಿಯಲು ಸಂಶೋಧನೆಯಲ್ಲಿ ಬಳಸಿಕೊಂಡಿದ್ದಾರೆಂದು ತಿಳಿದುಬಂದಿದೆ.

ಸಂಶೋಧನೆಗೆ ಕಾರಣವಾದ ಅಲೆಗಳ ವೇಗ:

ಅತ್ಯಂತ ಪ್ರಮುಖವಾಗಿ ಭೂಮಿಯನ್ನು ಮೇಲ್ಪದರ​ (Crust), ಮ್ಯಾಂಟಲ್ (Mantle) ಔಟರ್​ ಕೋರ್ (Outer Core) ಮತ್ತು ಇನ್ನರ್ ಕೋರ್​ (Inner Core) ಎಂದು ನಾಲ್ಕು ಭಾಗಗಳಾಗಿ ವಿಂಗಡಣೆ ಮಾಡುತ್ತೇವೆ.

ಈ ಇನ್ನರ್ ಕೋರ್​​ನ ಮೂಲಕ ಹಾದು ಬರುವ ಭೂಕಂಪನ ಅಲೆಗಳು ತುಂಬಾ ನಿಧಾನವಾಗಿ ಚಲಿಸುತ್ತವೆ ಎಂಬುದನ್ನು ಮೊದಲಿಗೆ ವಿಜ್ಞಾನಿಗಳು ಕಂಡುಕೊಂಡರು. ಇದರ ಜೊತೆಗೆ, ಅಲೆಗಳು ಹಾದುಹೋಗುವ ಇನ್ನರ್ ಕೋರ್​​ನ ಭಾಗಗಳು ಪದರುಗಳಿಂದ ಕೂಡಿವೆ ಎಂಬುದು ತಿಳಿದುಬಂದಿದೆ.

ಭೂಮಿ ಸೃಷ್ಟಿಯಾಗುವ ಕಾಲದಲ್ಲಿಯೇ ಅನೇಕ ರಾಸಾಯನಿಕ ವಸ್ತುಗಳು ಶೇಖರಣೆಯಾಗಿರುವುದೇ ಭೂಕಂಪನದ ಅಲೆಗಳು ಇನ್ನರ್ ಕೋರ್ ಭಾಗದಲ್ಲಿ ನಿಧಾನಕ್ಕೆ ಚಲಿಸಲು ಕಾರಣ ಎಂಬುದು ವಿಜ್ಞಾನಿಗಳ ವಾದ.

ಎಲ್ಲಾ ಗ್ರಹಗಳಲ್ಲಿ ಇರಬಹುದಾದ ವಸ್ತು ಭೂಮಿಯಲ್ಲಿ?

ಭೂಮಿ ಉಗಮಿಸುವ ಮೊದಲು ಅಂದರೆ ಗ್ರಹಗಳು ಉದಯಿಸುವ ಮೊದಲು ಗೆಲಾಕ್ಸಿ ಪೂರ್ತಿ ಒಂದೇ ರೀತಿಯ ವಾತಾವರಣ ಹೊಂದಿರುತ್ತದೆ. ಎಲ್ಲಾ ಗ್ರಹಗಳ ಸೃಷ್ಟಿಯ ವೇಳೆ ಭೂಮಿಯೂ ಸೃಷ್ಟಿಯಾದ ಕಾರಣದಿಂದ ಆ ಎಲ್ಲಾ ಗ್ರಹಗಳಲ್ಲೂ ಇದ್ದಿರಬಹುದಾದ ಕೆಲವು ರಾಸಾಯನಿಕಗಳು ಭೂಮಿಯ ಆಳದಲ್ಲಿ ಇರಬಹುದು ಎಂದು ವಿವಿಯ ಜಿಯೋಫಿಸಿಕ್ಸ್ ಮತ್ತು ಜಿಯಾಲಜಿ ಇಲಾಖೆಯ ಸಹಾಯಕ ಪ್ರಾಧ್ಯಾಪಕ ಮೈಖಲ್ ಎಸ್​. ಥ್ರೋನ್ ಅಭಿಪ್ರಾಯಪಟ್ಟಿದ್ದಾರೆ.

ಭೂಮಿಯ ಯಾವ ಜಾಗದಲ್ಲೂ ಸಿಗದ ವಿಶಿಷ್ಠ ಅಥವಾ ಅಪರೂಪದ ಅಥವಾ ಭಿನ್ನವಾದ ವಸ್ತುಗಳು ದೊರೆಯಬಹುದು ಎಂದು ಮೈಖಲ್ ಎಸ್​. ಥ್ರೋನ್ ಹೇಳುತ್ತಾರೆ.

ಮ್ಯಾಗ್ಮಾ ಮ್ಯಾಂಟಲ್​ನಿಂದ ಬಂದಿದ್ದೇ?

ಇನ್ನೂ ಕೆಲವು ವಿಜ್ಞಾನಿಗಳ ಯೋಚನೆಯಂತೆ ಈ ಮೊದಲು ಮ್ಯಾಂಟಲ್ ಎಂದು ಹೇಳಲಾದ ಭಾಗ ಸ್ವಲ್ಪ ಮಟ್ಟಿಗೆ ಕರಗಿದೆಯೆಂದೂ, ಆ ಕರಗಿದ ಭಾಗವೇ ಭೂಮಿಯ ಕೆಲವು ಭಾಗಗಳಲ್ಲಿ ಜ್ವಾಲಾಮುಖಿಯಲ್ಲಿ ಮ್ಯಾಗ್ಮಾ ಅಥವಾ ಲಾವಾರಸ ಆಗಿದೆಯೆಂದೂ ಅಭಿಪ್ರಾಯಪಟ್ಟಿದ್ದಾರೆ.

ಇದೆಲ್ಲದರ ಹೊರತಾಗಿ 4.5 ಬಿಲಿಯನ್ ವರ್ಷಗಳ ಹಿಂದೆ ಅಂದರೆ ಭೂಮಿ ಸೃಷ್ಟಿಯಾಗುವ ವೇಳೆಯೇ ಭೂ ಫಲಕಗಳು (Plate tectonics) ಇದ್ದವೇ? ಅಥವಾ ಭೂಮಿ ಸೃಷ್ಟಿಯಾದ ಎಷ್ಟೋ ವರ್ಷಗಳ ನಂತರ ಭೂ ಫಲಕಗಳು ರೂಪುಗೊಂಡವೇ? ಎಂಬುದು ಇಂದಿಗೂ ವಿಜ್ಞಾನಿಗಳಲ್ಲಿ ಚರ್ಚೆಯ ವಿಚಾರ..

ಇದನ್ನೂ ಓದಿ:ಬಾಹ್ಯಾಕಾಶದಲ್ಲಿ ನಕ್ಷತ್ರಗಳ ಸ್ಫೋಟವೇ? ಅಪರೂಪದ ವಿದ್ಯಮಾನ ದಾಖಲಿಸಿದ ವಿಜ್ಞಾನಿಗಳು! ಇಷ್ಟಕ್ಕೂ ಏನದು?