ಫೇಸ್​ಬುಕ್, ಇನ್​ಸ್ಟಾದಿಂದ ನೇರವಾಗಿ ಅಮೆಜಾನ್ ಶಾಪಿಂಗ್; ಬರಲಿದೆ ಹೊಸ ವೈಶಿಷ್ಟ್ಯ

ಇನ್ನು ಮುಂದೆ ಗ್ರಾಹಕರು ತಮ್ಮ ಫೇಸ್​ಬುಕ್ ಅಥವಾ ಇನ್​ಸ್ಟಾಗ್ರಾಮ್​ ಪುಟದಿಂದ ನೇರವಾಗಿ ಅಮೆಜಾನ್​ನಲ್ಲಿನ ವಸ್ತುಗಳನ್ನು ಖರೀದಿಸಬಹುದು.

ಸ್ಯಾನ್ ಫ್ರಾನ್ಸಿಸ್ಕೋ: ಫೇಸ್ ಬುಕ್ ಮತ್ತು ಇನ್ ಸ್ಟಾಗ್ರಾಮ್​ನಿಂದ ನೇರವಾಗಿ ಅಮೆಜಾನ್ ಉತ್ಪನ್ನಗಳನ್ನು ಖರೀದಿಸಲು ಸಾಧ್ಯವಾಗುವಂತೆ ಮೆಟಾ ಅಮೆಜಾನ್ ನೊಂದಿಗೆ ಕೈಜೋಡಿಸಿದೆ. ಬಳಕೆದಾರರು ತಮ್ಮ ಫೇಸ್​ಬುಕ್ ಮತ್ತು ಇನ್​ಸ್ಟಾಗ್ರಾಮ್ ಖಾತೆಗಳನ್ನು ಅಮೆಜಾನ್​ಗೆ ಲಿಂಕ್ ಮಾಡಲು ಅನುವು ಮಾಡಿಕೊಡುವ ಹೊಸ ವೈಶಿಷ್ಟ್ಯವನ್ನು ಮೆಟಾ ಪರಿಚಯಿಸಿದೆ. ಇದನ್ನು ಬಳಸಿ ಫೀಡ್​ನಲ್ಲಿ ಕಾಣಿಸುವ ಪ್ರಮೋಶನ್​ಗಳನ್ನು ಕ್ಲಿಕ್ ಮಾಡಿ ಅಮೆಜಾನ್​ನಿಂದ ನೇರವಾಗಿ ವಸ್ತುಗಳನ್ನು ಖರೀದಿಸಬಹುದು ಎಂದು ಟೆಕ್​ಕ್ರಂಚ್ ವರದಿ ಮಾಡಿದೆ.

"ಇದೇ ಮೊದಲ ಬಾರಿಗೆ ಗ್ರಾಹಕರು ಫೇಸ್​ಬುಕ್ ಮತ್ತು ಇನ್​ಸ್ಟಾಗ್ರಾಮ್​ನಲ್ಲಿ ಕಾಣಿಸುವ ಅಮೆಜಾನ್​ನ ಜಾಹೀರಾತುಗಳನ್ನು ಕ್ಲಿಕ್ ಮಾಡಿ, ಫೇಸ್​ಬುಕ್ ಮತ್ತು ಇನ್​ಸ್ಟಾಗ್ರಾಮ್​ನಿಂದ ಹೊರಗೆ ಹೋಗದೆಯೇ ಅಮೆಜಾನ್​ನಲ್ಲಿ ವಸ್ತುಗಳನ್ನು ಖರೀದಿಸಲು ಸಾಧ್ಯವಾಗಲಿದೆ" ಎಂದು ಅಮೆಜಾನ್ ವಕ್ತಾರ ಕ್ಯಾಲಿ ಜೆರ್ನಿಗನ್ ಹೇಳಿದ್ದಾರೆ.

"ಹೊಸ ವೈಶಿಷ್ಟ್ಯದ ಭಾಗವಾಗಿ ಯುಎಸ್ ಗ್ರಾಹಕರಿಗೆ ಫೇಸ್​ಬುಕ್ ಮತ್ತು ಇನ್​ಸ್ಟಾಗ್ರಾಮ್​ನಲ್ಲಿ ಆಯ್ದ ಅಮೆಜಾನ್ ಉತ್ಪನ್ನ ಜಾಹೀರಾತುಗಳಲ್ಲಿ ನೈಜ-ಸಮಯದ ಬೆಲೆ, ಪ್ರೈಮ್ ಅರ್ಹತೆ, ಡೆಲಿವರಿ ಸಮಯ ಮತ್ತು ಉತ್ಪನ್ನದ ವಿವರಗಳು ಕಾಣಿಸಲಿವೆ" ಎಂದು ಅವರು ಹೇಳಿದರು. ಈ ವಾರದ ಆರಂಭದಲ್ಲಿ, ಮೆಟಾ "ಫೇಸ್​ಬುಕ್ ಅಥವಾ ಇನ್​ಸ್ಟಾಗ್ರಾಮ್ ತೊರೆಯದೆ ಅಮೆಜಾನ್​ನಲ್ಲಿ ಖರೀದಿ ಮಾಡಿ" ಹೆಸರಿನ ಸಪೋರ್ಟ್​ ಪೇಜ್​ನಲ್ಲಿ ಹೊಸ ವೈಶಿಷ್ಟ್ಯದ ಬಗ್ಗೆ ಕೆಲ ವಿವರಗಳನ್ನು ನೀಡಿತ್ತು.

ಅಮೆಜಾನ್​ಗೆ ಹರಿದು ಬಂದ 1.1 ಬಿಲಿಯನ್ ಗ್ರಾಹಕರು: ಗ್ರೇಟ್ ಇಂಡಿಯನ್ ಫೆಸ್ಟಿವಲ್ 2023 ರ ಸಮಯದಲ್ಲಿ ಅಮೆಜಾನ್​​ ವೆಬ್​ಸೈಟ್​ಗೆ 1.1 ಬಿಲಿಯನ್ ಗ್ರಾಹಕರು ಭೇಟಿ ನೀಡಿದ್ದಾರೆ ಎಂದು ಗುರುವಾರ ಕಂಪನಿ ಘೋಷಿಸಿದೆ. ಇದು ಈ ಹಿಂದಿನ ಎಲ್ಲಾ ಫೆಸ್ಟಿವಲ್​ಗಳಿಗಿಂತ ಅತ್ಯಧಿಕವಾಗಿದೆ. ಒಂದು ತಿಂಗಳ ಕಾಲ ನಡೆಯುವ ಈ ಸೇಲ್ ಅಕ್ಟೋಬರ್ 8ರಂದು ಆರಂಭವಾಗಿತ್ತು.

ಅಮೆಜಾನ್​ಗೆ ಬಂದ ಶೇಕಡಾ 80 ರಷ್ಟು ಗ್ರಾಹಕರು ಶ್ರೇಣಿ 2 ಮತ್ತು 3 ನಗರಗಳಿಗೆ ಸೇರಿದವರು ಎಂದು ಕಂಪನಿ ತನ್ನ ಪ್ರಕಟಣೆಯಲ್ಲಿ ತಿಳಿಸಿದೆ. "38,000 ಕ್ಕೂ ಹೆಚ್ಚು ಮಾರಾಟಗಾರರು ತಮ್ಮ ಅತ್ಯಧಿಕ ಒಂದು ದಿನದ ಮಾರಾಟವನ್ನು ಸಾಧಿಸಿದ್ದಾರೆ ಮತ್ತು ನಾಲ್ಕು ದಶಲಕ್ಷಕ್ಕೂ ಹೆಚ್ಚು ಹೊಸ ಗ್ರಾಹಕರು ತಮ್ಮ ನೆಚ್ಚಿನ ಉತ್ಪನ್ನಗಳು ಮತ್ತು ಬ್ರಾಂಡ್​ಗಳಿಗಾಗಿ ಮೊದಲ ಬಾರಿಗೆ ಶಾಪಿಂಗ್ ಮಾಡಿದ್ದಾರೆ. ಇದು ಅಮೆಜಾನ್ ಇಂಡಿಯಾ ಮತ್ತು ಅದರ ಪಾಲುದಾರರಿಗೆ ಅತ್ಯುತ್ತಮ ಹಬ್ಬದ ಋತುವಾಗಿದೆ" ಎಂದು ಅದು ಹೇಳಿದೆ.

ಇದನ್ನೂ ಓದಿ: ಯುದ್ಧದ ಪರಿಣಾಮ: ತೀವ್ರ ಬಡತನದ ಸುಳಿಯಲ್ಲಿ ಪ್ಯಾಲೆಸ್ಟೈನ್