'ವುಮೆನ್ಸ್​ ಡೇ'; ಇನ್​ಸ್ಟಾಗ್ರಾಮ್​ನಲ್ಲಿ ಬಂದಿವೆ ಹೊಸ ಸ್ಟಿಕ್ಕರ್ಸ್​

ಅಂತಾರಾಷ್ಟ್ರೀಯ ಮಹಿಳಾ ದಿನಾಚರಣೆ ಅಂಗವಾಗಿ ಇನ್​ಸ್ಟಾಗ್ರಾಮ್ ತನ್ನ ಬಳಕೆದಾರರಿಗಾಗಿ ಹೊಸ ವಿನ್ಯಾಸದ ಸ್ಟಿಕ್ಕರ್​ಗಳನ್ನು ಬಿಡುಗಡೆ ಮಾಡಿದೆ. ಮಹಿಳೆಯರನ್ನು ವಿಶೇಷವಾಗಿ ಗಮನದಲ್ಲಿಟ್ಟುಕೊಂಡು ಈ ಸ್ಟಿಕ್ಕರ್​ಗಳನ್ನು ತಯಾರಿಸಲಾಗಿದೆ.

ಹೈದರಾಬಾದ್:ಮಾರ್ಚ್​ 8 ರಂದು ವಿಶ್ವಾದ್ಯಂತ ಅಂತಾರಾಷ್ಟ್ರೀಯ ಮಹಿಳಾ ದಿನ ಆಚರಿಸಲಾಗುತ್ತಿದ್ದು, ಅದಕ್ಕೂ ಮುನ್ನವೇ ತನ್ನ ಬಳಕೆದಾರರಿಗಾಗಿ ಫೇಸ್​ಬುಕ್ ಒಡೆತನದ ಫೋಟೊ ಶೇರಿಂಗ್ ಸೋಶಿಯಲ್ ಮೀಡಿಯಾ ಆ್ಯಪ್ ಇನ್​ಸ್ಟಾಗ್ರಾಮ್, ಹೊಸ ವರ್ಣರಂಜಿತ ಹಾಗೂ ಆಕರ್ಷಕ ಸ್ಟಿಕ್ಕರ್​ಗಳನ್ನು ಗುರುವಾರ ಬಿಡುಗಡೆ ಮಾಡಿದೆ.

ಮಹಿಳೆಯರ ಹಕ್ಕುಗಳಿಗಾಗಿ ಮುಂಚೂಣಿಯಲ್ಲಿ ನಿಂತು ಹೋರಾಡುತ್ತಿರುವ ಕಾರ್ಯಕರ್ತರು, ತಾಯಂದಿರು ಮತ್ತು ಸಮುದಾಯಗಳ ಸದಸ್ಯರನ್ನು ಬೆಂಬಲಿಸುವ ರೀತಿಯಲ್ಲಿ ಹೊಸ ಸ್ಟಿಕ್ಕರ್​ಗಳನ್ನು ವಿನ್ಯಾಸಗೊಳಿಸಲಾಗಿದೆ ಎಂದು ಇನ್​ಸ್ಟಾಗ್ರಾಮ್ ಹೇಳಿದೆ.

ಓದಿ: ಇಳಕಲ್ ಸೀರೆ ಉಟ್ಕೊಂಡು, ಮೂಗುತ್ತಿ ತೊಟ್ಟು ಮಹಿಳಾ ದಿನಾಚರಣೆ ಆಚರಿಸಿದ ವಿದ್ಯಾರ್ಥಿನಿಯರು

ಕೊರೊನಾ ವೈರಸ್​ ಬಿಕ್ಕಟ್ಟಿನ ಸಮಯದಲ್ಲಿ ವಿಶೇಷಚೇತನರು, ಅಸಮಾನತೆಗೆ ಒಳಗಾದವರು, ವೃದ್ಧರು ಹೀಗೆ ದುರ್ಬರರ ಸೇವೆ ಮಾಡಿದ ಮಹಳಾ ಸಮುದಾಯದ ಜೊತೆಗೆ ನಾವಿದ್ದೇವೆ ಎಂಬ ಸಂದೇಶವನ್ನು ಸಾರುವ ರೀತಿಯಲ್ಲಿ ಹೊಸ ಸ್ಟಿಕ್ಕರ್​ಗಳು ಮೂಡಿಬಂದಿವೆ. ಐವರು ಪ್ರಖ್ಯಾತ ಚಿತ್ರಕಲಾವಿದರು ಈ ಸ್ಟಿಕ್ಕರ್​ಗಳನ್ನು ಡಿಸೈನ್ ಮಾಡಿದ್ದಾರೆ ಎಂದು ಇನ್​ಸ್ಟಾಗ್ರಾಮ್​ ಪ್ರಕಟಣೆಯಲ್ಲಿ ಹೇಳಿದೆ.