ಕೋವಿಡ್​-19 ಮತ್ತು ಬೊಜ್ಜು: 2021ರ ಅಟ್ಲಾಸ್ ವರದಿ ಹೇಳುವುದೇನು?

ಜಗತ್ತಿನಾದ್ಯಂತ ಮಹಾಮಾರಿ ಕೊರೊನಾಗೆ ಬಲಿಯಾದವರಲ್ಲಿ ಅಧಿಕ ತೂಕ ಅಥವಾ ಬೊಜ್ಜಿನ ಸಮಸ್ಯೆಯಿಂದ ಬಳಲುತ್ತಿದ್ದವರ ಪ್ರಮಾಣ ಶೇ.90ರಷ್ಟಿದೆ.

ಅಧಿಕ ರಕ್ತದೊತ್ತಡ, ಮಧುಮೇಹ, ಅಸ್ಥಿಸಂಧಿವಾತ, ಹೃದಯಕ್ಕೆ ಸಂಬಂಧಿ ಕಾಯಿಲೆಗಳು, ಪಾರ್ಶ್ವವಾಯು, ಪಿತ್ತಜನಕಾಂಗದ ಕ್ಯಾನ್ಸರ್​ ಸೇರಿದಂತೆ ಹಲವು ರೀತಿಯ ಕ್ಯಾನ್ಸರ್​ಗಳನ್ನು ತಂದೊಡ್ಡುವ ಬೊಜ್ಜು, ಇದೀಗ ಕೊರೊನಾ ಸೋಂಕಿತರ ಸಾವಿಗೂ ಬಹುಮುಖ್ಯ ಕಾರಣವಾಗಿದೆ ಎಂಬ ಸತ್ಯ ಬಹಿರಂಗವಾಗಿದೆ.

ಬೊಜ್ಜು, ಅಧಿಕ ತೂಕ ಹೊಂದಿರುವ ವಯಸ್ಕರು ಹೆಚ್ಚಿರುವ ದೇಶಗಳಲ್ಲೇ ಕೋವಿಡ್​ ಮರಣ ಪ್ರಮಾಣ ಹೆಚ್ಚಿದೆ ಎಂದು 2021ರ ಅಟ್ಲಾಸ್ ವರದಿ ತಿಳಿಸಿದೆ. 2021ರ ಫೆಬ್ರವರಿ ಅಂತ್ಯದ ವೇಳೆಗೆ ಪ್ರಪಂಚದಲ್ಲಿ 2.5 ಮಿಲಿಯನ್ ಜನರು ಕೊರೊನಾಗೆ ಬಲಿಯಾಗಿದ್ದಾರೆ. ಈ ಪೈಕಿ 2.2 ಸಾವುಗಳು ಅಧಿಕ ತೂಕದ ಜನರಿರುವುದಾಗಿ ವರ್ಗೀಕರಿಸಿದ ದೇಶಗಳಲ್ಲಿ ಸಂಭವಿಸಿದೆ.

ಇದನ್ನೂ ಓದಿ: ಭಾರತೀಯ ಮಹಿಳೆಯರು ಹೆಚ್ಚು ಚರ್ಚಿಸುವ ವಿಷಯಗಳಾವುವು ಗೊತ್ತೇ? ಇಲ್ಲಿದೆ ಓದಿ..

ಅಟ್ಲಾಸ್ ವರದಿ ಹೇಳುವ ಪ್ರಕಾರ, ಯಾವ ದೇಶದಲ್ಲಿ ಶೇ.50ಕ್ಕಿಂತ ಹೆಚ್ಚಿನ ವಯಸ್ಕರು ಅಧಿಕ ತೂಕ ಹೊಂದಿದ್ದಾರೋ ಅಲ್ಲಿ ಒಂದು ಲಕ್ಷ ಜನಸಂಖ್ಯೆಗೆ 66.8 ಕೋವಿಡ್​ ಸಾವು ವರದಿಯಾಗಿದೆ. ಯಾವ ದೇಶದಲ್ಲಿ ಅಧಿಕ ತೂಕ ಹೊಂದಿರುವ ವಯಸ್ಕರು ಸಂಖ್ಯೆ ಶೇ.50ಕ್ಕಿಂತ ಕಡಿಮೆ ಇದೆಯೋ ಅಲ್ಲಿ ಲಕ್ಷ ಜನಸಂಖ್ಯೆಗೆ 4.5 ಸಾವು ವರದಿಯಾಗಿದೆ.

ಅಧಿಕ ತೂಕ ಹೊಂದಿರುವ ವಯಸ್ಕರು	ಒಂದು ಲಕ್ಷ ಜನಸಂಖ್ಯೆಗೆ ಕೋವಿಡ್​ ಸಾವು	ರಾಷ್ಟ್ರಗಳ ಸಂಖ್ಯೆ
<30%	6.6	38
30% -<40%	0.5	19
40%-<50%	3.2	13
50%- <60%	67.9	55
60%	65.6	39

ಒಟ್ಟಾರೆ ಜಗತ್ತಿನಾದ್ಯಂತ ಮಹಾಮಾರಿಗೆ ಬಲಿಯಾದವರಲ್ಲಿ ಅಧಿಕ ತೂಕ ಅಥವಾ ಬೊಜ್ಜಿನ ಸಮಸ್ಯೆಯಿಂದ ಬಳಲುತ್ತಿದ್ದವರ ಪ್ರಮಾಣ ಶೇ.90ರಷ್ಟಿದೆ. ಬೊಜ್ಜು ಅಧಿಕ ತೂಕವನ್ನು ಸೂಚಿಸುತ್ತದೆ. ಬೊಜ್ಜಿನ ಸಮಸ್ಯೆ ಎದುರಿಸುತ್ತಿರುವ ರಾಷ್ಟ್ರಗಳ ಪೈಕಿ ಭಾರತ ಮೂರನೇ ಸ್ಥಾನದಲ್ಲಿದೆ.

ಇದನ್ನೂ ಓದಿ: ಬ್ರೆಜಿಲ್​​ನಲ್ಲಿ ಮತ್ತೆ ಕೊರೊನಾ ಅಬ್ಬರ: ಒಂದೇ ದಿನ 71 ಸಾವಿರ ಕೇಸ್​ ಪತ್ತೆ!

ಕೊಬ್ಬಿನ ಅಂಶ ಇರುವ ಆಹಾರ ಹಾಗೂ ಜಂಕ್​ ಫುಡ್​ ಸೇವನೆ ಕಡಿಮೆ ಮಾಡುವುದರಿಂದ, ಯೋಗ, ಏರೋಬಿಕ್ಸ್ ಅಥವಾ ಇನ್ನಾವುದೇ ವ್ಯಾಯಾಮವನ್ನು ಮಾಡುವುದರಿಂದ, ಹಸಿರು ತರಕಾರಿಗಳನ್ನು ಅಧಿಕವಾಗಿ ತಿನ್ನುವುದರಿಂದ ಬೊಜ್ಜಿನ ಸಮಸ್ಯೆಗೆ ಪರಿಹಾರ ಸಿಗುತ್ತದೆ.