ಅಂಡ್ರಾಯ್ಡ್ ಗೂಗಲ್​ ಮ್ಯಾಪ್​ನಲ್ಲಿ ಮತ್ತೆ ಬರಲಿದೆ ಕಂಪಾಸ್

ಆಂಡ್ರಾಯ್ಡ್ ಗೂಗಲ್ ಮ್ಯಾಪ್​​ನಲ್ಲಿ ಈ ಹಿಂದೆ ತೆಗೆದು ಹಾಕಲಾಗಿದ್ದ ದಿಕ್ಸೂಚಿ (ಕಂಪಾಸ್) ಅನ್ನು ಮತ್ತೆ ತರಲು ಗೂಗಲ್ ಮುಂದಾಗಿದೆ.

ಸ್ಯಾನ್ ಫ್ರಾನ್ಸಿಸ್ಕೋ :ಆಂಡ್ರಾಯ್ಡ್ ಸಾಧನಗಳಲ್ಲಿ ಮ್ಯಾಪ್​ ಒಳಗಡೆ ದಿಕ್ಸೂಚಿ (ಕಂಪಾಸ್) ವಿಜೆಟ್ ಅನ್ನು ಮರಳಿ ತರುತ್ತಿರುವುದಾಗಿ ಗೂಗಲ್ ಪ್ರಕಟಿಸಿದೆ.

ಆಂಡ್ರಾಯ್ಡ್ ದಿಕ್ಸೂಚಿ ವಿಜೆಟ್ ಅನ್ನು ಮರಳಿ ತರುವ ಬಗ್ಗೆ ಘೋಷಿಸಲು ನಾವು ಸಂತೋಷಗೊಂಡಿದ್ದೇವೆ. ನ್ಯಾವಿಗೇಶನ್ ಸ್ಕ್ರೀನ್​ ಅನ್ನು ಸ್ವಚ್ಛಗೊಳಿಸುವ ಸಲುವಾಗಿ 2019 ರ ಆರಂಭದಲ್ಲಿ ಆಂಡ್ರಾಯ್ಡ್ ಸಾಧನಗಳ ಮ್ಯಾಪ್​ನಿಂದ ದಿಕ್ಸೂಚಿಯನ್ನು ತೆಗೆದು ಹಾಕಲಾಗಿತ್ತು. ಇದೀಗ ಹೆಚ್ಚಿನ ವೈಶಿಷ್ಟ್ಯಗಳೊಂದಿಗೆ ಅದನ್ನು ಮತ್ತೆ ತರಲಾಗ್ತಿದೆ ಎಂದು ಗೂಗಲ್ ಹೇಳಿದೆ.

ತಲುಪಬೇಕಾದ ಸ್ಥಳಕ್ಕೆ ನ್ಯಾವಿಗೇಟ್ ಮಾಡಲು ನೀವು ಆಂಡ್ರಾಯ್ಡ್‌ನಲ್ಲಿ ಮ್ಯಾಪ್​ ಬಳಸುವಾಗ, ದಿಕ್ಸೂಚಿ ಮತ್ತೆ ಪರದೆಯ ಬಲಭಾಗದಲ್ಲಿರುವ ವಿಜೆಟ್‌ಗಳಲ್ಲಿ ಒಂದಾಗಿ ಕಾಣಿಸುತ್ತದೆ. ನೀವು ತಿರುಗುತ್ತಿರುವಾಗ, ಕೆಂಪು ಬಾಣವು ಉತ್ತರ ದಿಕ್ಕಿನಲ್ಲಿದೆ ಎಂಬುದನ್ನು ಸೂಚಿಸುತ್ತದೆ. ಜಾಗತಿಕವಾಗಿ ಆಂಡ್ರಾಯ್ಡ್ 10.62 ಆವೃತ್ತಿಯ ಬಳಕೆದಾರರಿಗೆ ಈ ವೈಶಿಷ್ಟ್ಯ ಲಭ್ಯವಿದೆ. ಐಒಎಸ್​ನಲ್ಲಿ ಗೂಗಲ್ ಮ್ಯಾಪ್​ ಬಳಕೆದಾರರಿಗೆ ದಿಕ್ಸೂಚಿ ತೆಗೆದುಹಾಕಲಾಗಿಲ್ಲ. ಅದು ಈಗಲೂ ಲಭ್ಯವಿದೆ ಎಂದು ಗೂಗಲ್ ತಿಳಿಸಿದೆ.