ಶೆಡ್​ ಹೋಟೆಲ್​ಗೆ ನುಗ್ಗಿದ ಟ್ರಕ್​... ಯಮಸ್ವರೂಪಿ ಲಾರಿಗೆ ನಾಲ್ವರು ಮಹಿಳೆಯರು ಬಲಿ

ಅವರೆಲ್ಲ ಮತ್ತೊಂದು ರಾಜ್ಯದಿಂದ ಕೂಲಿಗಾಗಿ ಬಂದ ಮಹಿಳೆಯರು. ದಿನವಿಡೀ ಕೆಲಸ ಮಾಡಿ ಟೀಗಾಗಿ ಪಕ್ಕದ ಹೋಟೆಲ್​ಗೆ ತೆರಳಿದ್ದರು. ಆದ್ರೆ ಯಮಸ್ವರೂಪಿ ಟ್ರಕ್​ವೊಂದು​ ಅವರ ಜೀವವನ್ನೇ ಬಲಿ ಪಡೆದಿದೆ.

ಹೌದು, ಛತ್ತಿಸ್​ಗಡ್​ನ ಸುಕ್ಮಾ ಜಲ್ಲೆಯ ಕಾಮರಾಜುಪಾಡು ಗ್ರಾಮದಿಂದ ಹನ್ನೊಂದು ಜನ ಮಹಿಳೆಯರು ಕೂಲಿಗಾಗಿ ಆಂಧ್ರಪ್ರದೇಶದ ಪೂರ್ವ ಗೋದಾವರಿ ಜಿಲ್ಲೆಯ ಚಿಂತೂರು ತಾಲೂಕಿಗೆ ಬಂದಿದ್ದರು. ದಿನವಿಡೀ ಕೆಲಸ ಮಾಡುವ ಮಹಿಳೆಯರು ಟೀ ಕುಡಿಯಲು ರಸ್ತೆ ಬದಿಯಲ್ಲಿರುವ ಶೆಡ್​ ಹೋಟೆಲ್​ಗೆ ತೆರಳುತ್ತಿದ್ದರು. ಪ್ರತಿದಿನದಂತೆ ಇಂದು ಸಹ ನಾಲ್ವರು ಮಹಿಳೆಯರು ಹೋಟೆಲ್​ಗೆ ತೆರಳಿ ಟೀ ಕುಡಿಯುತ್ತಾ ಟಿವಿ ನೋಡುತ್ತಿದ್ದಾಗ ದುರಂತ ಸಂಭವಿಸಿದೆ.

ಛತ್ತಿಸ್​ಗಡ್​ನಿಂದ ಭದ್ರಾಚಲಂ ಕಡೆ ತೆರಳುತ್ತಿದ್ದ ಟ್ರಕ್​ವೊಂದು​ ಚಾಲಕನ ನಿಯಂತ್ರಣ ತಪ್ಪಿ ಟ್ರಕ್​ ನೇರ ಹೋಟೆಲ್​ಗೆ ನುಗ್ಗಿದೆ. ಟಿವಿ ನೋಡುತ್ತಾ ಟೀ ಕುಡಿಯುತ್ತಿದ್ದ ಮಹಿಳೆಯರ ಮೇಲೆ ಟ್ರಕ್​ ಹರಿದು ಪಲ್ಟಿಯಾಗಿದೆ. ಟ್ರಕ್​ ನುಗ್ಗಿದ ರಭಸಕ್ಕೆ ಆ ಜಾಗದಲ್ಲಿದ್ದ ಶೆಡ್​ ಹೋಟೆಲ್​ ಸಹ ನೆಲಸಮವಾಗಿದೆ. ಈ ಅಪಘಾತದಲ್ಲಿ ಸೋಯಂ ಕಮಲ (20), ಸೋಯಂ ಜೋಗಿ (35), ಚುಕ್ಕಮ್ಮ (22) ಎಂಬ ಮೂವರು ಮಹಿಳೆಯರು ಸ್ಥಳದಲ್ಲೇ ಸಾವನ್ನಪ್ಪಿದ್ದಾರೆ.

ಈ ಅಪಘಾತದಲ್ಲಿ ಡ್ರೈವರ್​, ಕ್ಲೀನರ್​ ಮತ್ತು ಸುಬ್ಬಮ್ಮ (30) ಗಂಭೀರವಾಗಿ ಗಾಯಗೊಂಡಿದ್ದರು. ಗಾಯಾಳುಗಳನ್ನು ಸ್ಥಳೀಯ ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಆದ್ರೆ ಸುಬ್ಬಮ್ಮ ಚಿಕಿತ್ಸೆ ಫಲಿಸದೇ ಸಾವನ್ನಪ್ಪಿದ್ದಾರೆ. ಈ ಘಟನೆ ಕುರಿತು ಚಿಂತೂರು ಪೊಲೀಸ್​ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಪೊಲೀಸರು ಮುಂದಿನ ಕ್ರಮ ಕೈಗೊಂಡಿದ್ದಾರೆ.