ಲಾಕ್​ಡೌನ್​ ಸಮಯದ ಬಾಡಿಗೆ ಕೇಳಲು ಬಂದ ಮನೆ ಮಾಲೀಕನನ್ನೇ ಕೊಂದ ಭೂಪ!

ಲಾಕ್​ಡೌನ್​ ವೇಳೆ ಬಾಕಿ ಉಳಿಸಿಕೊಂಡಿದ್ದ ನಾಲ್ಕು ತಿಂಗಳ ಬಾಡಿಗೆ ಹಣವನ್ನು ಕೇಳಲು ಬಂದ ಮನೆ ಮಾಲೀಕನನ್ನು ಬಾಡಿಗೆದಾರನ ಮಗ ಕೊಲೆ ಮಾಡಿರುವ ಘಟನೆ ಚೆನ್ನೈನಲ್ಲಿ ನಡೆದಿದೆ.

ಚೆನ್ನೈ: ಬಾಡಿಗೆ ಪಾವತಿಸುವಂತೆ ಕೇಳಿದ ಮನೆ ಮಾಲೀಕನನ್ನು ಬಾಡಿಗೆದಾರನ ಮಗ ಕೊಲೆ ಮಾಡಿರುವ ಘಟನೆ ಚೆನ್ನೈನ ಕುಂದ್ರಾಥೂರ್​ನಲ್ಲಿ ನಡೆದಿದೆ.

ಕುಂದ್ರಾಥೂರ್ ನಿವಾಸಿ ಗುಣಶೇಖರನ್ (50) ಕೊಲೆಗೀಡಾಗಿರುವ ಮನೆ ಮಾಲೀಕ.

ಘಟನೆ ಹಿನ್ನೆಲೆ:

ಲಾಕ್​ಡೌನ್​ ವೇಳೆ ಬಾಕಿ ಉಳಿಸಿಕೊಂಡಿದ್ದ ನಾಲ್ಕು ತಿಂಗಳ ಬಾಡಿಗೆ ಹಣವನ್ನು ಬಾಡಿಗೆದಾರ ಧನರಾಜ್‌ ಬಳಿ ಗುಣಶೇಖರನ್ ಕೇಳಿದ್ದಾರೆ. ಈ ವೇಳೆ ಇಬ್ಬರ ನಡುವೆ ಮಾತಿನ ಚಕಮಕಿ ನಡೆದಿದೆ. ಬಳಿಕ ಅದೇ ದಿನ ರಾತ್ರಿ ಧನರಾಜ್​ನ ಮಗ ಅಜಿತ್ (21), ಗುಣಶೇಖರನ್​ನ ಕುತ್ತಿಗೆ ಸೀಳಿ ಹತ್ಯೆ ಮಾಡಿದ್ದಾನೆ. ಗಾಯಾಳು ಮಾಲೀಕನನ್ನು ಕ್ರೋಮೆಪೇಟ್ ಸರ್ಕಾರಿ ಆಸ್ಪತ್ರೆಗೆ ದಾಖಲಿಸಲಾಯಿತಾದರೂ ಅವರು ಬದುಕುಳಿಯಲಿಲ್ಲ.

ಈ ಸಂಬಂಧ ಪ್ರಕರಣ ದಾಖಲಿಸಿಕೊಂಡಿರುವ ಪೊಲೀಸರು ಆರೋಪಿ ಅಜಿತ್​ನನ್ನು ಬಂಧಿಸಿ, ವಿಚಾರಣೆ ನಡೆಸುತ್ತಿದ್ದಾರೆ.