ಸಿಬಿ-ಸಿಐಡಿಗೆ ಶ್ರೀಲಂಕಾ ಡಾನ್​ ಸಾವಿನ ಪ್ರಕರಣ ಹಸ್ತಾಂತರ

ಶ್ರೀಲಂಕಾ ಪೊಲೀಸರು ಹುಡುಕುತ್ತಿದ್ದ ಮೋಸ್ಟ್​​ ವಾಂಟೆಡ್​ ಡಾನ್ ಅಂಗೊಡಾ ಲೊಕ್ಕಾ ಸಾವಿನ ಪ್ರಕರಣವನ್ನು ಸಿಬಿ-ಸಿಐಡಿಗೆ ತಮಿಳುನಾಡು ಡಿಜಿಪಿ ಹಸ್ತಾಂತರಿಸಿದ್ದಾರೆ.

ಚೆನ್ನೈ:ಶ್ರೀಲಂಕಾದ ಭೂಗತ ದೊರೆ ಅಂಗೊಡಾ ಲೊಕ್ಕಾ ಸಾವಿನ ಪ್ರಕರಣವನ್ನು ಅಪರಾಧ ತನಿಖಾ ವಿಭಾಗ (ಸಿಐಡಿ) ಹಾಗೂ ಅಪರಾಧ ಶಾಖೆಗೆ (ಸಿಬಿ) ಹಸ್ತಾಂತರಿಸಲಾಗಿದೆ ಎಂದು ತಮಿಳುನಾಡು ಪೊಲೀಸ್ ಮಹಾನಿರ್ದೇಶಕ (ಡಿಜಿಪಿ) ಜೆ.ಕೆ.ತ್ರಿಪಾಟಿ ತಿಳಿಸಿದ್ದಾರೆ.

ಅಂಗೊಡಾ ಸಾವಿನ ಸಂಬಂಧ ಎಫ್‌ಐಆರ್ ದಾಖಲಿಸಿಕೊಂಡ ಕೊಯಮತ್ತೂರು ಪೊಲೀಸರು, ಮೃತದೇಹವನ್ನು ಪಡೆಯಲು ನಕಲಿ ದಾಖಲೆ ನೀಡಿದ ಮೂವರನ್ನು ಸೋಮವಾರ ಬಂಧಿಸಿದ್ದಾರೆ.

ಪ್ರಕರಣ ಹಿನ್ನೆಲೆ:

ಅಂಗೊಡಾ ಲೊಕ್ಕಾ ಶ್ರೀಲಂಕಾ ಪೊಲೀಸರು ಹುಡುಕುತ್ತಿದ್ದ ಮೋಸ್ಟ್​​ ವಾಂಟೆಡ್​ ಡಾನ್ ಆಗಿದ್ದು, 2017ರಿಂದ ತಲೆಮರೆಸಿಕೊಂಡಿದ್ದ. ಕಳೆದ ಜುಲೈ 3ರಂದು ತಮಿಳುನಾಡಿನ ಕೊಯಮತ್ತೂರಿನಲ್ಲಿ ಅನುಮಾನಾಸ್ಪದವಾಗಿ ಮೃತಪಟ್ಟಿದ್ದ. ಕೊಯಮತ್ತೂರು ನಗರ ಪೊಲೀಸರಿಂದ ಪ್ರಕರಣದ ವಿವರಗಳನ್ನು ಪಡೆದ ಸಿಬಿ-ಸಿಐಡಿ ಅಧಿಕಾರಿಗಳು ತನಿಖೆ ಚುರುಕುಗೊಳಿಸಿದ್ದಾರೆ.