ಗುಜರಾತ್​​ನಲ್ಲಿ ಐಎಸ್‌ಐ ಏಜೆಂಟ್​ ಬಂಧನ

ಪಾಕಿಸ್ತಾನದ ಗುಪ್ತಚರ ಸಂಸ್ಥೆಯಾಗಿರುವ ಇಂಟರ್ ಸರ್ವೀಸ್ ಇಂಟೆಲಿಜೆನ್ಸ್ (ಐಎಸ್‌ಐ) ಏಜೆಂಟ್​​ವೊಬ್ಬನನ್ನು ಗುಜರಾತ್​​ನ ಪಶ್ಚಿಮ ಕಚ್​ನಲ್ಲಿ ರಾಷ್ಟ್ರೀಯ ತನಿಖಾ ದಳ ಬಂಧಿಸಿದೆ.

ಗಾಂಧಿನಗರ: ಗುಜರಾತ್​​ನ ಪಶ್ಚಿಮ ಕಚ್​ನಲ್ಲಿ ಐಎಸ್‌ಐ (ಇಂಟರ್ ಸರ್ವೀಸ್ ಇಂಟೆಲಿಜೆನ್ಸ್) ಏಜೆಂಟ್​​ವೊಬ್ಬನನ್ನು ರಾಷ್ಟ್ರೀಯ ತನಿಖಾ ದಳ ಬಂಧಿಸಿದೆ.

ಗುಜರಾತ್​ನ ಮುಂಡ್ರಾ ಡಾಕ್​​ಯಾರ್ಡ್​ನಲ್ಲಿ ಮೇಲ್ವಿಚಾರಕನಾಗಿರುವ ರಜಾಕ್​ಬಾಯ್​ ಕುಂಭಾರ್ ಎಂಬಾತ​ ಐಎಸ್‌ಐ ಏಜೆಂಟ್​ ಆಗಿ ಕಾರ್ಯನಿರ್ವಹಿಸುತ್ತಿದ್ದ ಎಂದು ತಿಳಿದು ಬಂದಿತ್ತು. ಉತ್ತರಪ್ರದೇಶದ ರಕ್ಷಣಾ ಹಾಗೂ ಐಎಸ್‌ಐ ಪ್ರಕರಣದ ತನಿಖೆ ಸಂಬಂಧ ರಜಾಕ್​ಬಾಯ್​ ಕುಂಭಾರ್​ನನ್ನು ಸೋಮವಾರ ಅರೆಸ್ಟ್​ ಮಾಡಿರುವುದಾಗಿ ರಾಷ್ಟ್ರೀಯ ತನಿಖಾ ದಳ (NIA) ಮಾಹಿತಿ ನೀಡಿದೆ.

ಕಳೆದ ಜನವರಿಯಲ್ಲಿ ರಶೀದ್ ಎಂಬಾತನ ವಿರುದ್ಧ ಉತ್ತರಪ್ರದೇಶದಲ್ಲಿನ ಭಯೋತ್ಪಾದನಾ ನಿಗ್ರಹ ದಳ ಪ್ರಕರಣ ದಾಖಲಿಸಿ ಬಂಧಿಸಿತ್ತು. ತನಿಖೆ ವೇಳೆ ಈತ ಪಾಕಿಸ್ತಾನದ ಗುಪ್ತಚರ ಸಂಸ್ಥೆಯ ಏಜೆಂಟ್​ ಜೊತೆ ಸಂಪರ್ಕದಲ್ಲಿದ್ದ ಮತ್ತು ಎರಡು ಬಾರಿ ಪಾಕಿಸ್ತಾನಕ್ಕೆ ಭೇಟಿ ನೀಡಿದ್ದ ಎಂದು ತಿಳಿದು ಬಂದಿದೆ. ಈ ಸಂಬಂಧ ತನಿಖೆ ಚುರುಕುಗೊಳಿಸಿದ ರಾಷ್ಟ್ರೀಯ ತನಿಖಾ ದಳ ರಜಾಕ್​ಬಾಯ್​ನನ್ನು ಬಂಧಿಸುವಲ್ಲಿ ಯಶಸ್ವಿಯಾಗಿದೆ.

ಇಂಟರ್ ಸರ್ವೀಸ್ ಇಂಟೆಲಿಜೆನ್ಸ್ (ಐಎಸ್‌ಐ) ಇದು ಪಾಕಿಸ್ತಾನದ ಗುಪ್ತಚರ ಸಂಸ್ಥೆಯಾಗಿದೆ.