ಲಾಕ್​ಡೌನ್​ ವೇಳೆ ಗಾಂಜಾ ಸಿಗಲಿಲ್ಲವೆಂದು ಈ ವ್ಯಕ್ತಿ ಮಾಡಿದ್ದೇನು ನೋಡಿ!

ಲಾಕ್​​ಡೌನ್ ವೇಳೆ ಗಾಂಜಾ ಸಿಗದ ಹಿನ್ನೆಲೆ ತಾನೇ ಬೆಳೆಯೋಕೆ ಮುಂದಾಗಿದ್ದ. ರಸ್ತೆಯಿಂದ ಟೆರೇಸ್ ನೋಡಿದವರಿಗೆ ಗಾರ್ಡನ್ ಥರ ಕಾಣುವಂತೆ ಮಾಡಿದ್ದ. ಪರಿಚಯಸ್ಥರು ಯಾರೇ ಬಂದರೂ ಗಾರ್ಡನ್​​ ಪ್ರವೇಶಿಸಲು ಬಿಡುತ್ತಿರಲಿಲ್ಲವಂತೆ.

ಬೆಂಗಳೂರು:ಮನೆಯ ಟೆರೇಸ್ ಮೇಲೆ ಸುಮಾರು 200ಕ್ಕೂ ಹೆಚ್ಚು ಗಾಂಜಾ ಗಿಡಗಳನ್ನು ಬೆಳೆಸಿದ್ದ ಆರೋಪಿಯನ್ನು ಹೆಬ್ಬಾಳ ಪೊಲೀಸರು ಬಂಧಿಸಿದ್ದಾರೆ.

ಆರ್‌.ಟಿ.ನಗರದ ಕೀರ್ತಿ ಚಕ್ರವರ್ತಿ ಬಂಧಿತ ಆರೋಪಿಯಾಗಿದ್ದು, ಈತ ಗಾಂಜಾ ವ್ಯಸ್ಯನಿಯಾಗಿದ್ದ. ರೇಸ್ ಕೋರ್ಸ್​ನಲ್ಲಿ ಕೆಲಸ ಮಾಡುತ್ತಿದ್ದ ಈತ, ಹೆಂಡತಿ-ಮಕ್ಕಳಿಂದ ದೂರವಾಗಿ ಹೆಬ್ಬಾಳದ ಮನೆಯಲ್ಲಿ ಉಳಿದುಕೊಂಡಿದ್ದ. ವೈಯಕ್ತಿಕ ಕಲಹ ಹಿನ್ನೆಲೆ ಹೆಂಡತಿ‌‌-ಮಕ್ಕಳು ದೂರವಾದಾಗಿನಿಂದ ಗಾಂಜಾಗೆ ಅಡಿಕ್ಟ್ ಆಗಿದ್ದನಂತೆ.

ಲಾಕ್​​ಡೌನ್ ವೇಳೆ ಗಾಂಜಾ ಸಿಗದ ಹಿನ್ನೆಲೆ ತಾನೇ ಬೆಳೆಯೋಕೆ ಮುಂದಾಗಿದ್ದ. ರಸ್ತೆಯಿಂದ ಟೆರೇಸ್ ನೋಡಿದವರಿಗೆ ಗಾರ್ಡನ್ ಥರ ಕಾಣುವಂತೆ ಮಾಡಿದ್ದ. ಪರಿಚಯಸ್ಥರು ಯಾರೇ ಬಂದರೂ ಗಾರ್ಡನ್​​ ಪ್ರವೇಶಿಸಲು ಬಿಡುತ್ತಿರಲಿಲ್ಲ. ಹೂ ಕುಂಡಗಳ ಮಧ್ಯೆಯೇ ಗಾಂಜಾ ಗಿಡಗಳನ್ನು ಬೆಳೆದಿದ್ದ ಚಕ್ರವರ್ತಿ, ಗಾಂಜಾ ಗಿಡಗಳನ್ನು ಒಣಗಿಸಿ ಅದನ್ನೇ ಪುಡಿ ಮಾಡಿ ಸೇವಿಸುವ ರೂಢಿ ಮಾಡಿಕೊಂಡಿದ್ದನಂತೆ.

ಇತ್ತೀಚೆಗೆ ಚಕ್ರವರ್ತಿ ಅಣ್ಣನ‌ ಮಗ ಬಂದು ನೋಡಿದಾಗ ಗಾಂಜಾ ಬೆಳೆದಿರೋದು ಪತ್ತೆಯಾಗಿದೆ‌. ಈ ವೇಳೆ ಅಣ್ಣನ ಮಗನಿಗೂ ಗಾಂಜಾ ಸೇದುವಂತೆ ಚಕ್ರವರ್ತಿ ಪ್ರೇರೇಪಿಸಿದ್ದನಂತೆ. ಗಾಂಜಾ ಗಿಡಗಳನ್ನು ನೋಡಿದ್ದೇ ಹೆಬ್ಬಾಳ ಪೊಲೀಸರಿಗೆ ಮಾಹಿತಿ ನೀಡಲಾಗಿದೆ. ಇದರ ಆಧಾರದ ಮೇರೆಗೆ ಸ್ಥಳಕ್ಕೆ‌ ತೆರಳಿದ ಪೊಲೀಸರು, ಆರೋಪಿಯನ್ನು ಬಂಧಿಸಿ ಗಾಂಜಾ ಗಿಡಗಳನ್ನು ಜಪ್ತಿ ಮಾಡಿಕೊಂಡಿದ್ದಾರೆ.

ಎನ್​​ಡಿ‌ಪಿಎಸ್ ಕಾಯ್ದೆ ಅಡಿಯಲ್ಲಿ ಆರೋಪಿ ವಿರುದ್ಧ ಪ್ರಕರಣ ದಾಖಲಿಸಿಕೊಂಡು ಪರಪ್ಪನ ಅಗ್ರಹಾರ‌ ಜೈಲಿಗೆ ಕಳುಹಿಸಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.