ಪ್ರೇಮವಿವಾಹ: ನವವಿವಾಹಿತನನ್ನು ಥಳಿಸಿದ ಪತ್ನಿಯ ಸಂಬಂಧಿಕರು

ಕುಟುಂಬಸ್ಥರ ತೀವ್ರ ವಿರೋಧದ ನಡುವೆ ಪ್ರೀತಿಸಿದ ಯುವತಿ ಜೊತೆ ಮದುವೆಯಾಗಿದ್ದ ವ್ಯಕ್ತಿ ಮೇಲೆ ಪತ್ನಿಯ ಸಂಬಂಧಿಕರು ಹಲ್ಲೆ ನಡೆಸಿ, ಜೀವ ಬೆದರಿಕೆ ಹಾಕಿದ್ದಾರೆ.

ಕೋಯಿಕ್ಕೋಡ್ (ಕೇರಳ): ಬೆಳ್ಳಂ ಬೆಳಗ್ಗೆಯೇ ನವವಿವಾಹಿತ ಹಾಗೂ ಆತನ ಸ್ನೇಹಿತರ ಮೇಲೆ ಎಂಟು ಜನರ ಗುಂಪೊಂದು ಹಲ್ಲೆ ನಡೆಸಿರುವ ಘಟನೆ ಕೇರಳದ ಕೋಯಿಕ್ಕೋಡ್​ನಲ್ಲಿ ನಡೆದಿದೆ.

ಕುಟುಂಬಸ್ಥರ ತೀವ್ರ ವಿರೋಧದ ನಡುವೆ ಪ್ರೀತಿಸಿದ ಯುವತಿ ಜೊತೆ ಮೊಹಮ್ಮದ್ ಸ್ವಾಲಿಹ್ ರಿಜಿಸ್ಟ್ರಾರ್ ಕಚೇರಿಯಲ್ಲಿ ಕಾನೂನುಬದ್ಧವಾಗಿ ಮದುವೆಯಾಗಿದ್ದರು. ಗುರುವಾರ ತನ್ನ ಗೆಳೆಯರೊಂದಿಗೆ ಕಾರಿನಲ್ಲಿ ಪ್ರಯಾಣಿಸುತ್ತಿದ್ದ ಮೊಹಮ್ಮದ್ ಸ್ವಾಲಿಹ್​ನನ್ನು ಕೋಯಿಕ್ಕೋಡ್​ನ ಕೊಯಿಲಾಂಡಿಯಲ್ಲಿ ಅಡ್ಡಗಟ್ಟಿದ ಗುಂಪು ಹಲ್ಲೆ ನಡೆಸಿದೆ.

ಪತ್ನಿಯ ಚಿಕ್ಕಪ್ಪ ಕಳುಹಿಸಿದ ಗ್ಯಾಂಗ್​ ಇದು ಎಂದು ಹೇಳಲಾಗಿದ್ದು, ಸ್ವಾಲಿಹ್​ಗೆ ಜೀವ ಬೆದರಿಕೆ ಹಾಕಿದ್ದಾರೆ. ಸ್ಥಳೀಯರು ಸ್ವಾಲಿಹ್​ ಮೇಲಿನ ಹಲ್ಲೆಯನ್ನು ತಡೆಯಲು ದೌಡಾಯಿಸಿದರೂ ಪ್ರಯೋಜನವಾಗಿಲ್ಲ. ಈ ಸಂಬಂಧ ಕೊಯಿಲಾಂಡಿ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದು, ತನಿಖೆ ನಡೆಸುತ್ತಿದ್ದಾರೆ.