ಅಂತ್ಯಕ್ರಿಯೆಗೆ ಹಣವಿಲ್ಲದೆ ತಾಯಿಯ ಮೃತದೇಹವನ್ನ ಫುಟ್​ಪಾತ್​ನಲ್ಲೇ ಬಿಟ್ಟು ಹೋದ ಮಗ!

ತಾಯಿ ಮೃತಪಟ್ಟ ಬಳಿಕ ಅಂತಿಮ ಕಾರ್ಯ ನಡೆಸಲು ಬಿಡಿಗಾಸು ಜೇಬಲ್ಲಿರದೆ ದಿಕ್ಕು ತೋಚದಂತಾದ ಮಗ ಮೃತದೇಹವನ್ನ ಫುಟ್​ಪಾತ್​ನಲ್ಲೇ ಬಿಟ್ಟು ಹೋಗಿದ್ದಾನೆ.

ಹೈದರಾಬಾದ್:ಅಂತ್ಯಕ್ರಿಯೆ ನೆರವೇರಿಸಲು ಹಣವಿಲ್ಲದೆ ಹೆತ್ತಮ್ಮನ ಮೃತದೇಹವನ್ನ ಫುಟ್​ಪಾತ್​ನಲ್ಲೇ ಮಗ ಬಿಟ್ಟು ಹೋಗಿರುವ ಘಟನೆ ತೆಲಂಗಾಣದ ಹೈದರಾಬಾದ್​ನ ಬಂಜಾರ ಹಿಲ್ಸ್​ನಲ್ಲಿ ನಡೆದಿದೆ.

ಕಳೆದ ಮೂರು ದಿನಗಳಿಂದ ಜ್ವರದಿಂದ ಬಳಲುತ್ತಿದ್ದರೂ ಕೈಯಲ್ಲಿ ಹಣವಿಲ್ಲದ ಕಾರಣ ಹಾಗೂ ಕೊರೊನಾ ಭೀತಿಯಿಂದಾಗಿ ತಾಯಿಯನ್ನು ಮಗ ರಮೇಶ್​​ ಆಸ್ಪತ್ರೆಗೆ ಕರೆದುಕೊಂಡು ಹೋಗಲೇ ಇಲ್ಲ. ಕೊನೆಗೆ ತಾಯಿ ಮೃತಪಟ್ಟ ಬಳಿಕ ಅಂತಿಮ ಕಾರ್ಯ ನಡೆಸಲು ಕೂಡ ಬಿಡಿಗಾಸು ಜೇಬಲ್ಲಿರಲಿಲ್ಲ. ಹೀಗಾಗಿ ದಿಕ್ಕು ತೋಚದಂತಾದ ರಮೇಶ್, ಮೃತದೇಹವನ್ನ ರಸ್ತೆ ಬದಿ ಇಟ್ಟು ಹೋಗಿದ್ದಾನೆ.

ಇಂದು ಬೆಳಗ್ಗೆ ಶವವನ್ನು ಕಂಡ ಸ್ಥಳೀಯರು ಪೊಲೀಸರಿಗೆ ದೂರು ನೀಡಿದ್ದಾರೆ. ಸ್ಥಳಕ್ಕೆ ಬಂದ ಪೊಲೀಸರು ಮೃತ ಮಹಿಳೆಯನ್ನು ರಮೇಶ್​ನ ತಾಯಿ ಭಾಗಿರಥಿ (68) ಎಂದು ಗುರುತಿಸಿ, ತನಿಖೆ ನಡೆಸಿದ್ದಾರೆ.