ಅಂಗಡಿ ಬಾಗಿಲು ಮುರಿದು ಮೊಬೈಲ್​​ಗಳನ್ನು ಎಗರಿಸಿದ ಖತರ್ನಾಕ್ ಕಳ್ಳರು: ಸಿಸಿಟಿವಿಯಲ್ಲಿ ದುಷ್ಕೃತ್ಯ ಸೆರೆ

ಬೆಣ್ಣೆ ನಗರಿಯಲ್ಲಿ ಖದೀಮರು ಕೈಚಳಕ ತೋರಿಸಿದ್ದಾರೆ. ಕೆ ಬಿ ಬಡಾವಣೆಯಲ್ಲಿರುವ ಎಫ್​​ಡಿ ಕಮ್ಯೂನಿಕೇಷನ್ ಅಂಗಡಿಯಲ್ಲಿ ಕಳ್ಳತನ ನಡೆದಿದೆ. ಕದ್ದ ಮೊಬೈಲ್​​ಗಳನ್ನು ಬ್ಯಾಗ್​​ವೊಂದರಲ್ಲಿ ಹಾಕಿಕೊಂಡು ಖದೀಮರು ತೆರಳುತ್ತಿರುವ ದೃಶ್ಯ ಸಿಸಿಟಿವಿಯಲ್ಲಿ ಸೆರೆಯಾಗಿದೆ.

ದಾವಣಗೆರೆ: ಮೊಬೈಲ್ ಅಂಗಡಿ ಬಾಗಿಲು ಮುರಿದು ಸೆಕೆಂಡ್ ಹ್ಯಾಂಡ್ ಮೊಬೈಲ್​ಗಳನ್ನು ಕದ್ದೊಯ್ದಿರುವ ಘಟನೆ ನಗರದ ಕೆ ಬಿ ಬಡಾವಣೆಯಲ್ಲಿ ನಡೆದಿದೆ.

ಚಾಲಾಕಿ ಕಳ್ಳರು ಸುಮಾರು 2 ಲಕ್ಷ ರೂ. ಮೌಲ್ಯದ ಸೆಕೆಂಡ್ ಹ್ಯಾಂಡ್ ಮೊಬೈಲ್​​ಗಳನ್ನು ಎಗರಿಸಿದ್ದಾರೆ. ಕೆ ಬಿ ಬಡಾವಣೆಯಲ್ಲಿರುವ ಶಶಿ ಎಂಬುವರ ಮಾಲೀಕತ್ವದ ಎಫ್​​ಡಿ ಕಮ್ಯೂನಿಕೇಷನ್ ಅಂಗಡಿಯಲ್ಲಿ ಕಳ್ಳತನ ನಡೆದಿದ್ದು, ಕದ್ದ ಮೊಬೈಲ್​​ಗಳನ್ನು ಬ್ಯಾಗ್​​ವೊಂದರಲ್ಲಿ ಹಾಕಿಕೊಂಡು ಖದೀಮರು ತೆರಳುತ್ತಿರುವ ದೃಶ್ಯ ಸಿಸಿಟಿವಿಯಲ್ಲಿ ಸೆರೆಯಾಗಿದೆ.

ಜಗಳೂರು ಕ್ಷೇತ್ರದ ಬಿಜೆಪಿ ಶಾಸಕ ಎಸ್​​.ವಿ. ರಾಮಚಂದ್ರಪ್ಪ ಅವರ ಮನೆ ಪಕ್ಕದಲ್ಲೇ ಈ ಕಳ್ಳತನ ಆಗಿದೆ. ಮಧ್ಯಾಹ್ನ ಮೊಬೈಲ್​​ಗಳನ್ನು ಅಂಗಡಿಗೆ ತಂದಿದ್ದು, ಆ ದಿನ ರಾತ್ರಿಯೇ ಕಳ್ಳತನ ನಡೆದಿದೆ. ಈ ಸಂಬಂಧ ಬಡಾವಣೆ ಠಾಣೆಯ ಪೊಲೀಸರು ಘಟನಾ ಸ್ಥಳಕ್ಕೆ ಭೇಟಿ ನೀಡಿದ್ದು, ಪ್ರಕರಣ ದಾಖಲಿಸಿಕೊಂಡು ತನಿಖೆ ನಡೆಸುತ್ತಿದ್ದಾರೆ.