ಬೆಂಗಳೂರಿಗೆ ಭೂಗತ ಪಾತಕಿ ರವಿ ಪೂಜಾರಿ ಕರೆತಂದ ಪೊಲೀಸರು

ಕರ್ನಾಟಕ ಸೇರಿದಂತೆ ವಿವಿಧ ರಾಜ್ಯಗಳಿಗೆ ಬೇಕಾಗಿರುವ ಭೂಗತ ಪಾತಕಿ ರವಿ ಪೂಜಾರಿಯನ್ನು ರಾಜ್ಯ ಪೊಲೀಸರು ಇಂದು‌ ಬೆಂಗಳೂರಿಗೆ ಕರೆದುಕೊಂಡು ಬಂದಿದ್ದಾರೆ.

ಬೆಂಗಳೂರು: ಕರ್ನಾಟಕ ಸೇರಿದಂತೆ ವಿವಿಧ ರಾಜ್ಯಗಳ ಮೋಸ್ಟ್​​ ವಾಂಟೆಡ್​​ ಲಿಸ್ಟ್​​ನಲ್ಲಿರುವ ಭೂಗತ ಪಾತಕಿ ರವಿ ಪೂಜಾರಿಯನ್ನು ರಾಜ್ಯ ಪೊಲೀಸರು ಆಫ್ರಿಕಾದ ಸೆನಗಲ್ ದೇಶದಿಂದ ಭಾನುವಾರ ತಡರಾತ್ರಿ ಬೆಂಗಳೂರಿಗೆ ಕರೆ ತಂದಿದ್ದಾರೆ.

ಸುಮಾರು 15 ವರ್ಷಗಳಿಂದ ರವಿ ಪೂಜಾರಿಗಾಗಿ ರಾಜ್ಯ ಪೊಲೀಸರ ಜೊತೆಗೆ ಎನ್​ಐಎ, ರಾ ಹಾಗೂ ಕೇಂದ್ರ ತನಿಖಾ ತಂಡ‌ಗಳು ಹುಡುಕಾಟ ನಡೆಸುತ್ತಿದ್ದವು. ರವಿ ಪೂಜಾರಿ ವಿರುದ್ಧ ಕರ್ನಾಟಕ,‌ ಮಹಾರಾಷ್ಟ್ರ, ಆಂಧ್ರಪ್ರದೇಶ, ತಮಿಳುನಾಡು ಸೇರಿದಂತೆ ವಿವಿಧ ರಾಜ್ಯಗಳಲ್ಲಿ 49 ಕೇಸ್​ಗಳು ದಾಖಲಾಗಿವೆ. ಈತ 20 ವರ್ಷಗಳ ಹಿಂದೆಯೇ ಭಾರತದಿಂದ ಪರಾರಿಯಾಗಿದ್ದ. ಕಳೆದ ವರ್ಷ ಜ.19ರಂದು ಪೂಜಾರಿಯನ್ನು ಸೆನೆಗಲ್ ಪೊಲೀಸರು ಸೆರೆಹಿಡಿದಿದ್ದರು.ಸದ್ಯ ರವಿ ಪೂಜಾರಿ ರಾಜ್ಯ ಪೊಲೀಸರ ವಶದಲ್ಲಿದ್ದು, ಬೆಂಗಳೂರಿನ ಮಡಿವಾಳದ ಇಂಟರಗೇಷನ್ ಸೆಂಟರ್​ಗೆ ಕರೆದೊಯ್ಯಲಾಗಿದೆ.

ಇಂದು ಬಿಗಿ ಭದ್ರತೆಯಲ್ಲಿ ಕೋರ್ಟ್ ಮುಂದೆ ಹಾಜರುಪಡಿಸಿ ಕಸ್ಟಡಿಗೆ ಪಡೆಯಲಿದ್ದಾರೆ. ಸದ್ಯ ಈತನನ್ನು ರಾಜ್ಯ ಪೊಲೀಸರ‌ ಜೊತೆಗೆ ಎನ್​ಐಎ, ರಾ ಹಾಗೂ ಕೇಂದ್ರ ತನಿಖಾ ತಂಡದವರು ಮಡಿವಾಳದ ಇಂಟರಗೇಷನ್ ಸೆಂಟರ್​​ನಲ್ಲಿ ಬಿಗಿಭದ್ರತೆ ನಡುವೆ ವಿಚಾರಣೆ ನಡೆಸಲಿದ್ದಾರೆ.

ಸದ್ಯ ಮಡಿವಾಳ ಇಂಟರಗೇಷನ್ ಸೆಂಟರ್​​ನಲ್ಲಿ ಸಿಸಿಬಿ ಜಂಟಿ ಆಯುಕ್ತ ಸಂದೀಪ್ ಪಾಟೀಲ್, ಅಮರ್ ಕುಮಾರ್ ಪಾಂಡೆ, ಹೆಚ್ಚುವರಿ ಆಯುಕ್ತ ಮುರುಗನ್, ಡಿಸಿಪಿ ಕುಲ್ದೀಪ್, ಇಶಾ ಪಂಥ್, ಭೀಮಾಶಂಕರ್ ಗುಳೇದ್ ಸೇರಿ ಹಿರಿಯ ಅಧಿಕಾರಿಗಳು ‌ಮೊಕ್ಕಂ ಹೂಡಿದ್ದಾರೆ.