ಆನ್​ಲೈನ್ ವಂಚನೆ: ಉಡುಗೊರೆಗೆ ಆಸೆ ಬಿದ್ದು ₹40 ಸಾವಿರ ಕಳೆದುಕೊಂಡ ವ್ಯಕ್ತಿ..

ಸಾಮಾಜಿಕ ಜಾಲತಾಣಗಳಲ್ಲಿ ಪರಿಚಯವಾಗುವವರ ಪೂರ್ವಾಪರ ತಿಳಿದುಕೊಳ್ಳದೇ ಸ್ನೇಹ ಇಲ್ಲವೇ ಯಾವುದೇ ರೀತಿಯ ವ್ಯವಹಾರ ಇರಿಸಿಕೊಂಡ್ರೆ ಮಕ್ಮಲ್‌ ಟೋಪಿ ಬೀಳೋದು ಗ್ಯಾರಂಟಿ. ಅದ್ಹೇಗೆ ಅಂತಾ ಇಲ್ನೋಡಿ..

ಬಳ್ಳಾರಿ: ಗಿಫ್ಟ್ ನೀಡುವ ನೆಪದಲ್ಲಿ ಕರೆಮಾಡಿ ಆನ್‌ಲೈನ್​ನಲ್ಲಿ 40 ಸಾವಿರ ರೂಪಾಯಿ ವಂಚನೆ ಮಾಡಿದ ಘಟನೆ ಗಣಿನಾಡು ಬಳ್ಳಾರಿ ನಗರದಲ್ಲಿ ನಡೆದಿದೆ‌‌‌.

ನಗರದ ನೆಹರು ಕಾಲೋನಿಯ ನಿವಾಸಿ ಗೋಪಿಕೃಷ್ಣ ಅವರಿಗೆ ಅಪರಿಚಿತರೊಬ್ಬರು ಸಾಮಾಜಿಕ ಜಾಲತಾಣದಲ್ಲಿ ಪರಿಚಯವಾದ ಬಳಿಕ ಉಡುಗೊರೆ ಕಳಿಸುತ್ತೇನೆ ಎಂದು ಜನವರಿ 6 ರಂದು ಸಂದೇಶ ಕಳಿಸಿದ್ದರು. ಮರುದಿನ ಮತ್ತೊಬ್ಬ ವ್ಯಕ್ತಿ ಅಧಿಕಾರಿ ನೆಪದಲ್ಲಿ ಕರೆ ಮಾಡಿದ್ದಾರೆ. ನಿಮ್ಮ ಹೆಸರಿನಲ್ಲಿ ಉಡುಗೊರೆ ಬಂದಿದೆ, ನಿಮ್ಮ ಮನೆಗೆ ತಲುಪಿಸಲು ₹40 ಸಾವಿರ ತೆರಿಗೆ ಪಾವತಿಸಬೇಕು ಎಂದಿದ್ದರು. ಇದರಿಂದಾಗಿ ಉಡುಗೊರೆಗೆ ಆಸೆ ಬಿದ್ದು ಗೋಪಿಕೃಷ್ಣ ಆನ್‌ಲೈನ್‌ನಲ್ಲಿ ₹40 ಸಾವಿರ ಹಣ ಪಾವತಿ ಮಾಡಿದ್ದಾರೆ.

ಕೆಲವು ದಿನಗಳ ನಂತರ ಯಾವುದೇ ಉಡುಗೊರೆ ಬಂದಿಲ್ಲ. ತಾವು ಮೋಸ ಹೋಗಿರುವುದು ಖಚಿತವಾದ ಬಳಿಕ ಬಳ್ಳಾರಿ ನಗರದ ಸೈಬರ್ ಠಾಣೆಯಲ್ಲಿ ದೂರು ಸಲ್ಲಿಸಿದ್ದಾರೆ.