ಬೆಂಗಳೂರಲ್ಲಿ ಬೆಚ್ಚಿಬೀಳಿಸುವ ಕೃತ್ಯ... ಬೆಳ್ಳಂಬೆಳಗ್ಗೆ ಒಂಟಿಯಾಗಿ ಓಡಾಡುವ ಯುವತಿಯರೇ ಎಚ್ಚರ!

ಬೆಳ್ಳಂಬೆಳಗ್ಗೆ ಯುವತಿವೋರ್ವಳು ಬೆಂಗಳೂರಿನ ವಿಕ್ಟೋರಿಯಾ ಲೇಔಟ್​ನಲ್ಲಿ ಒಂಟಿಯಾಗಿ ಫುಟ್ ಪಾತ್ ಮೇಲೆ ತೆರಳುತ್ತಿದ್ದ ವೇಳೆ ಬೈಕ್​ನಲ್ಲಿ ಬಂದ ಇಬ್ಬರು ದುಷ್ಕರ್ಮಿಗಳು ಮೊಬೈಲ್ ಕಿತ್ತುಕೊಳ್ಳಲು ಪ್ರಯತ್ನಿಸಿದ್ದಾರೆ.

ಬೆಂಗಳೂರು: ನೀವು ಬೆಳಗಿನಜಾವ ಒಬ್ಬರೇ ಓಡಾಡುತ್ತಿರಾ? ಹಾಗಾದ್ರೆ, ನಿಮ್ಮ ಮೈಯೆಲ್ಲಾ‌‌ ಕಣ್ಣಾಗಿರಲಿ. ಏಕೆಂದ್ರೆ ಯಾವಾಗ, ಎಲ್ಲಿಂದ ಸುಲಿಗೆಕೋರರು ಬರುತ್ತಾರೋ ಗೊತ್ತಿಲ್ಲ.

ನಾವು ಇಷ್ಟೆಲ್ಲ ಹೇಳೋಕೆ ಕಾರಣ, ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗುತ್ತಿರುವ ಈ ಸಿಸಿಟಿವಿ ದೃಶ್ಯಾವಳಿ. ಇಂದು ಬೆಳ್ಳಂಬೆಳಗ್ಗೆ ಯುವತಿವೋರ್ವಳು ನಗರದ ವಿಕ್ಟೋರಿಯಾ ಲೇಔಟ್​ನಲ್ಲಿ ಒಂಟಿಯಾಗಿ ಫುಟ್ ಪಾತ್ ಮೇಲೆ ತೆರಳುತ್ತಿದ್ದಾಗ ದಿಢೀರ್ ಬೈಕಿನಲ್ಲಿ ಬಂದ ಇಬ್ಬರು ದುಷ್ಕರ್ಮಿಗಳು ಮೊಬೈಲ್ ಕಿತ್ತುಕೊಳ್ಳಲು ಯತ್ನಿಸಿದ್ದಾರೆ.

ಆದರೆ‌, ಅದೃಷ್ಟವಶಾತ್​ ಯುವತಿ ದರೋಡೆಕೋರರಿಂದ ತಪ್ಪಿಸಿಕೊಂಡು ಕಿರುಚುತ್ತ ವಾಪಸ್​ ಹಿಂದೆ ಓಡಿ ಬಂದಿದ್ದಾಳೆ. ಆಕೆಯ ಚೀರಾಟದಿಂದ ಎಚ್ಚೆತ್ತುಕೊಂಡ ಖದೀಮರು ಅಲ್ಲಿಂದ ಕಾಲ್ಕಿತ್ತಿದ್ದಾರೆ. ಈ ವೇಳೆ ಯುವತಿಯ ಮೊಬೈಲ್ ಕಸಿಯಲು ಯತ್ನಿಸಿರುವ ದೃಶ್ಯ ಆ ಸ್ಥಳದಲ್ಲಿದ್ದ ಸಿಸಿಟಿವಿಯಲ್ಲಿ ಸೆರೆ‌ಯಾಗಿದೆ. ಇದರ ಆಧಾರದ ಮೇಲೆ ಪೊಲೀಸರು ಆರೋಪಿಗಳ ಬಂಧನಕ್ಕೆ ತಲಾಶ್​ ನಡೆಸಿದ್ದಾರೆ.