ಕೋತಿಗೆ ನೇಣು ಬಿಗಿದು ಅಮಾನವೀಯವಾಗಿ ಕೊಂದ ಪಾಪಿಗಳು..!

ಕೋತಿಯೊಂದಕ್ಕೆ ನೇಣು ಬಿಗಿದು ಕೊಂದಿರುವ ಘಟನೆ ತೆಲಂಗಾಣದ ಖಮ್ಮಂ​​ ಜಿಲ್ಲೆಯಲ್ಲಿ ನಡೆದಿದ್ದು, ಈ ಸಂಬಂಧ ಮೂವರು ಯುವಕರನ್ನು ಬಂಧಿಸಲಾಗಿದೆ.

ತೆಲಂಗಾಣ: ಕೋತಿಯೊಂದಕ್ಕೆ ನೇಣು ಬಿಗಿದು ಅಮಾನವೀಯವಾಗಿ ಕೊಂದು ದುಷ್ಕರ್ಮಿಗಳು ಅಟ್ಟಹಾಸ ಮೆರೆದಿರುವ ಘಟನೆ ತೆಲಂಗಾಣದ ಖಮ್ಮಂ​​ ಜಿಲ್ಲೆಯಲ್ಲಿ ನಡೆದಿದೆ.

ಘಟನೆ ಸಂಬಂಧ ಮೂವರು ಆರೋಪಿಗಳನ್ನು ತೆಲಂಗಾಣದ ಅರಣ್ಯ ಇಲಾಖೆ ಅಧಿಕಾರಿಗಳು ವಶಕ್ಕೆ ಪಡೆದು 25 ಸಾವಿರ ರೂ. ದಂಡ ವಿಧಿಸಿದ್ದಾರೆ. ಖಮ್ಮಂ​​ ಜಿಲ್ಲೆಯ ಸತುಪಲ್ಲಿ ನಿವಾಸಿಗಳಾದ ವೆಂಕಟೇಶ್ವರರಾವ್​, ಗೌಡೆಲ್ಲಿ ಗಣಪತಿ, ರಾಜಶೇಖರ್ ಪ್ರಕರಣದ ಆರೋಪಿಗಳು.

ನಿತ್ಯ ಮಂಗಗಳ ಗುಂಪೊಂದು ತೋಟಕ್ಕೆ ನುಗ್ಗಿ ಮಾವಿನ ಬೆಳೆ ನಾಶ ಮಾಡುತ್ತಿತ್ತು. ಇದರಲ್ಲಿ ಒಂದು ಕೋತಿ ವೆಂಕಟೇಶ್ವರರಾವ್ ಮನೆ ಬಳಿ ಇದ್ದ ನೀರಿನ ತೊಟ್ಟಿಯಲ್ಲಿ ನೀರು ಕುಡಿಯಲು ಹೋಗಿ ಬಿದ್ದಿದೆ. ಈ ಕೋತಿಯನ್ನು ಹಿಡಿದ ಆತ ಇತರರೊಂದಿಗೆ ಸೇರಿ ತೋಟದ ಬಳಿ ಅದನ್ನು ತೆಗೆದೊಕೊಂಡು ಹೋಗಿ, ಬೇರೆ ಕೋತಿಗಳನ್ನು ಹೆದರಿಸಲು ಕೃತ್ಯ ಎಸಗಿರುವುದಾಗಿ ತಿಳಿದು ಬಂದಿದೆ.

ಕೃತ್ಯದ ದೃಶ್ಯ ಮೊಬೈಲ್​ನಲ್ಲಿ ಸೆರೆಯಾಗಿದ್ದು, ಸಾಮಾಜಿಕ ಜಾಲತಾಣದಲ್ಲಿ ವಿಡಿಯೋ ವೈರಲ್​ ಆಗಿದೆ. ಈ ಸಂಬಂಧ ಮೂವರು ಯುವಕರನ್ನು ಬಂಧಿಸಿ, ವನ್ಯಜೀವಿ ಸಂರಕ್ಷಣಾ ಕಾಯ್ದೆಯಡಿ ಪ್ರಕರಣ ದಾಖಲಿಸಲಾಗಿದೆ ಎಂದು ಸತುಪಲ್ಲಿ ಅರಣ್ಯಾಧಿಕಾರಿ (ಎಫ್‌ಆರ್‌ಒ) ತಿಳಿಸಿದ್ದಾರೆ.